Josué 22 - Quechua Ayacucho Bible 1987

Wakin ayllukuna Jordan Mayupa waklaw chimpanman kutisqankumanta

¹ Josueymi qayarqa Ruben ayllumanta, Gad ayllumanta chaynataq Manases parten ayllumanta runakunata

² hinaspam paykunata nirqa: —Qamkunaqa kasurqankichikmi Tayta Diospa serviqnin Moisespa tukuy kamachisusqaykichikta chaynataq tukuy kamachisqaykunatapas.

³ Kunan punchawkamaqa manam castamasikichikkunata saqerurqankichikchu aswanqa kasukurqankichikmi yupaychasqanchik Tayta Diospa kamachisqankunata.

⁴ Prometesqanman hinam yupaychasqanchik Tayta Diosqa castamasikichikkunata hawkataña kawsachichkan. Kunanqa kutikuychikñayá Tayta Diospa qosusqaykichik allpapi wasikichikman, chaytaqa Tayta Diospa serviqnin Moisesmi qosurqankichik Jordan Mayupa waklawnin intipa qespimunan lawpi.

⁵ Ichaqa Tayta Diospa serviqnin Moisespa qosusqaykichik kamachikuynintawan yachachikuynintayá ama qonqaspa kasukuychik chaynapi yupaychasqanchik Tayta Diosta kuyanaykichikpaq, paypa tukuy munasqanman hina kawsanaykichikpaq, tukuy sonqoykichikwan chaynataq tukuy vidaykichikwan payta qatispa adoranaykichikpaq.

⁶ Josueymi paykunapaq Tayta Diospa bendicionninta mañakuspa paykunata aviaykurqa. Hinaptinmi paykunaqa pasakurqaku wasinkuman.

⁷ Manases parten ayllukunamanmi Moises qorqa allpata Basan lawpi, wakin Manases parten ayllukunamanñataqmi Josuey qorqa castamasinkunapa allpanwan kuskata, paykunamanmá qorqa intipa seqaykunan law Jordan Mayupa chimpanpi. Chaymi Basan lawman riqkunapaq Diospa bendicionninta mañakuspan paykunata aviaykurqa wasinkuman kutikunankupaq.

⁸ Paykunatam nirqa: —Kutiychikñayá wasikichikman tukuy imayoq otaq ancha animalsapa, qorisapa, qollqesapa, broncesapa, fierrosapa chaynataq ancha pachasapa. Enemigoykichikkunamanta qechusqaykichikkunatamá castamasikichikkunawan rakinakunkichik —nispa.

⁹ Ruben ayllumanta, Gad ayllumanta chaynataq Manases parten ayllumanta runakunam kutikurqaku. Pasakurqakumá Galaad law allpankuman. Chay allpatam chaskirqaku Moisesman Tayta Diospa kamachisqanta hina.

Jordan Mayupa patanpi altar hatarichisqankumanta

¹⁰ Canaan allpapi kaq Jordan Mayupa hichpan lawman chayaruspankum Ruben ayllu runakuna, Gad ayllu runakuna chaynataq Manases parten ayllu runakuna hatarichirqaku Jordan Mayupa patanpi ancha hatun altarta.

¹¹ Chay Ruben ayllupa, Gad ayllupa chaynataq Manases parten ayllu runakunapa altar hatarirachisqankutam Israelpa wakin mirayninkuna uyarirurqaku. Chay altartaqa rurarurqaku Jordan Mayupa patan Israelpa mirayninkunapa *f**yachasqanku lawpim otaq intipa seqaykunan law Canaan allpanpim.

¹² Israelpa wakin mirayninkuna chay rurasqankuta uyariruspankumá llapallanku huñunakururqaku Silo llaqtapi paykunapa contranpi peleanankupaq.

¹³ Chaymi wakin Israelpa mirayninkuna kacharqaku sacerdote Eleazarpa churin Fineesta Galaad lawpi kaq Ruben aylluman, Gad aylluman chaynataq Manases parten aylluman.

¹⁴ Fineeswantaqmi kacharqaku chunka jefekunatapas, sapa jefem karqa Israel sapa ayllumanta. Chay llapallan ayllukunamanta jefekunaqa karqa Israel sapa ayllupi kamachikuqmi.

¹⁵ Paykunam pasarqaku Galaad lawpi kaq Ruben aylluman, Gad aylluman hinaspa Manases parten aylluman, chayaruspankum nirqaku:

¹⁶ —Tayta Diospa llapallan huñunasqa runankunam kaynata nin: “¿Ima traiciontataq rurachkankichik Israelpa Diosninpa contranpi? ¿Tayta Diosta mana qatinaykichikpaqchu hinaspa mana kasukuq kanaykichikpaqchu altarta rurakuruspa Tayta Diospa contranpi hatarichkankichik?

¹⁷ ¿Baal-peor taytacharayku huchallikusqanchikpas pisillapaqchu rikchakapusunkichik? Israelpa mirayninkunata Tayta Dios castigachkaptinpas kunankamapas hinallaraqmi culpayoq kachkanchik.

¹⁸ Tayta Diospa contranpi kunan mana kasukuptikichikqa paypas paqarinchiki piñakurunqa Israelpa llapallan mirayninkunapa contranpi.

¹⁹ Dueñochakusqaykichik allpa Tayta Dios adoranapaq hina mana kaptinqa, chimpamuychikyá Tayta Diospa allpanman otaq *f**yachasqan karpapa kasqanman hinaspayá allpata dueñochakuychik ñoqaykuwan kuska. Ichaqa amayá hoqarikuychikchu Tayta Diospa contranpiqa nitaq contraykupipas, chaynataqa rurachkankichik yupaychasqanchik Tayta Diospa altarninmanta sapaq altarta rurakuruspaykichikmi.

²⁰ Yuyariychikyá Zarapa miraynin Acan sutiyoq runata, paymi chinkachisqa kananpaq Tayta Diospaq rakisqa kaqkunata hapikuykuspan Tayta Diosta traicionarqa. Chayraykum Israelpa llapallan mirayninkunapa contranpi Tayta Dios piñakurqa. Chay runaqa manataqmi sapallanchu wañurqa mana allin rurasqanmantaqa —nispa.

²¹ Chaymi Ruben ayllumanta, Gad ayllumanta hinaspa Manases parten ayllumanta kaq runakuna Israelpa llapallan mirayninkunapa kachasqan chay jefekunata nirqaku:

²² —Tukuy Atiyniyoq Tayta Diosmi yachan, Tukuy Atiyniyoq Tayta Diosmi yachan. Israelpa mirayninkunapas yachachunyá: Tayta Diospa contranpi mana kasukuq kanaykupaqchus icha payta traicionanaykupaqchus kayta rurasqaniku. Chayna traicionaq kaptiykuqa kunanyá castigawayku.

²³ Sichu chay altarta rurakurqaniku Tayta Diosta mana qatinaykupaq hinaptinqa kikinpuniyá cuentata mañawachunku. Animalta wañuchispa lliw kañanapaq ofrendakunata, kawsaykunamanta ofrendakunata chaynataq Dioswan huklla kasqaykumanta ofrendakunata chay altarpi ofrecenayku kaptinqa hina kikintaqyá cuentata mañawachunku.

²⁴ Kaytaqa rurarqaniku hamuq punchawkunapi sucedenanmanta manchakuspaykum. Yanqañataq qamkunapa miraynikichik mirayniykuta kaynata ninmanku: “¿Israelpa yupaychasqan Tayta Diosqa imaykichiktaq?

²⁵ Tayta Diosmi churarurqa Jordan Mayuta rakiwaqninchik lindero kananpaq. Manapunim kanchu qamkunapa partekichik Tayta Diospiqa” nispa. Chaynapim miraynikichikkuna mirayniykuta Tayta Dios mana respetaqta ruranmanku.

²⁶ Chayraykum ninakurqaniku chay altarta ruranaykupaq, ichaqa manam animalta wañuchispa lliw kañana ofrendata otaq huk rikchaq ofrendakunata ofrecekunaykupaqchu.

²⁷ Kay altarqa kanqa ñoqaykumantawan qamkunamanta testigo hinam, testigo hinataqmi kanqa mirayninchikkunapaqpas chaynapim animalkunata wañuchispa lliw kañana ofrendakunawan, wakin ofrendakunawan chaynataq Dioswan huklla kasqaykumanta ofrendakunawanpas Tayta Diosta santuarionpi adorasaqku. Chaynaqa miraynikichikkunapas mirayniykutam manaña ninqakuchu: “Tayta Diospi partekichikqa manañam kanñachu” nispa.

²⁸ Ñoqaykumá ninakurqaniku hamuq punchawkunapi ñoqaykutapas otaq mirayniykutapas chaynata niptinkuqa kaynata ninankupaq: “Abueloykupa kay rurasqanku altarqa otaq Tayta Diospa altarninman rikchakuq altarqa manam animalkunata wañuchispa lliw kañanapaqchu nitaq wakin ofrendakunata ofrecenapaqchu aswanqa qamkunamantawan ñoqaykumanta testigo hina kanallanpaqmi.

²⁹ Huk altartaraq rurakuytaqa amayá piensayllapas-piensasaqkuchu. Chaynata ruraspaqa Tayta Diospa contranpich mana kasukuq kaymanku otaqcha manaña paypa qatiqninchu kaymanku. Tayta Diospa yachasqan karpapa ñawpaqninpi altarllam kanqa animalkunata wañuchispa lliw kañanapaq altarqa chaynataq kawsaykunamanta ofrendakunatapas hinaspa wakin ofrendakunatapas ofrecenapaq altarqa” nispa.

³⁰ Chaymi sacerdote Finees riqmasinkunapiwan otaq Israelpa mirayninkunapi kamachikuqkunapiwan chaynataq Israel casta jefekunapiwan allinpaq hapirqaku Ruben ayllupa, Gad ayllupa hinaspa Manases ayllupa rimasqankuta uyariruspanku.

³¹ Sacerdote Eleazarpa churin Fineesmi paykunata nirqa: —Kunanmi entienderuniku Tayta Diosqa ñoqanchikwan kasqanta, chaynaqa manamá paypa contranpichu chay traiciontaqa piensarqankichik. Kunantaqmi Tayta Diospa castigonmanta Israelpa mirayninkunata libraruwankiku —nispa.

³² Chaymi sacerdote Eleazarpa churin Finees wakin jefekunapiwan kutikurqaku Ruben ayllupa hinaspa Gad ayllupa kasqan Galaad lawmanta, paykunaqa kutikurqaku Canaan allpamanmi otaq Israelpa wakin mirayninkunapa kasqanmanmi. Chayaruspankum paykunaman willarqaku chay asuntomanta.

³³ Chaymi Israelpa wakin mirayninkunaman chay asunto allinpaq rikchakapurqa, chayraykum alabarqaku Tayta Diosta, manañam piensarqakuchu Ruben ayllupa hinaspa Gad ayllupa contranpi peleaq riytapas nitaq *f**yachasqanku allpa purmarachiytapas.

³⁴ Ruben aylluwan Gad ayllum chay altarta suticharqaku “Ed” nispa. Chaynataqa suticharqaku: —Chay altarqa ñoqanchikpaqmi testigo hina kanqa Tayta Dioslla cheqap Dios kasqanmanta —nispankum.