Josué 21 - Quechua Ayacucho Bible 1987

Leviy castakunapa llaqtankunamanta

¹ Leviy ayllupa jefenkunam rirqaku sacerdote Eleazarman, Nunpa churin Josueyman chaynataq Israel ayllukunapa jefenkunaman.

² Paykunam kachkarqaku Canaan casta runakunapa allpanpi kaq Silo llaqtapi. Leviy ayllupa jefenkunam nirqaku: —Tayta Diosmi Moisesman kamachirqa *f**yachanaykupaq llaqtakunata chaynataq animalniykupaq echaderokunatapas qowanaykikupaq —nispa.

³ Chaymi Israelpa mirayninkuna Leviy aylluman qorqaku kikinkupa herenciankumanta llaqtakunata echaderoyoqtakama, chaynataqa qorqaku Tayta Diospa kamachisqanman hinam.

⁴ Suerteaptinkum tuparurqa Coat castakunaman. Leviy Ayllu Coat castamanta kaq sacerdote Aaronpa mirayninkunamanmi tuparurqa chunka kimsayoq llaqtakuna. Chay llaqtakunam karqa Juda ayllupa allpanpi, Simeon ayllupa allpanpi chaynataq Benjamin ayllupa allpanpi.

⁵ Coatpa wakiqnin mirayninkunamanmi suerteaptinku tuparurqa chunka llaqtakuna Efrain ayllupa allpanpi, Dan ayllupa allpanpi hinaspa Manases parten ayllupa allpanpi.

⁶ Yapatawan suerteaptinkum tuparurqa Gersonpa castankunaman chunka kimsayoq llaqtakuna. Chay llaqtakunam karqa Isacar ayllupa allpanpi, Aser ayllupa allpanpi, Neftaliy ayllupa allpanpi chaynataq Manases parten ayllupa Basan law allpanpipas.

⁷ Huktawan suerteaptinkum tuparurqa Meraripa castankunaman chunka iskayniyoq llaqtakuna. Chay llaqtakunam karqa Ruben ayllupa allpanpi, Gad ayllupa allpanpi hinaspa Zabulon ayllupa allpanpi.

⁸ Moisesman Tayta Diospa kamachisqanman hinamá Leviy castakunaman suerteaspanku Israelpa mirayninkuna qorqaku chay llaqtakunata echaderonkunatawan.

⁹ Qorqakumá Juda ayllumantapas chaynataq Simeon ayllumantapas sutichananku llaqtakunata.

¹⁰ Chay llaqtakunamá puntata suerteasqankurayku tuparurqa Leviy ayllu Coat casta Aaronpa mirayninkunaman.

¹¹ Paykunamanmi qorqaku Juda ayllupa orqonpi Quiriat-arba llaqtata muyuriqninpi echaderonkunatawan, chay llaqtapa huknin sutinmi karqa Hebron. Chay Quiriat-arba llaqtam sutichasqa karqa Anacpa taytan Arbapa sutinwan.

¹² Aswanqa chay llaqtapa chakrankunatam llaqtachankunatawan qorqaku Jefonepa churin Caleb dueñochakunanpaq.

¹³ Sacerdote Aaronpa mirayninkunamanmá qorqaku runamasin wañuchiq runa amparakunanpaq Hebron llaqtata. Chay llaqta qosqankumantapas qorqakutaqmi huk llaqtakunatapas, chay llaqtakunam karqa: Libna,

¹⁴ Jatir, Estemoa,

¹⁵ Holon, Debir,

¹⁶ Ain, Juta hinaspa Bet-semes. Chay isqon llaqtakunatam echaderonkunatawan qorqaku Juda hinaspa Simeon ayllukunapa allpanpi.

¹⁷ Benjamin ayllupa allpanpiñataqmi qorqaku Gabaon llaqtata, Geba llaqtata,

¹⁸ Anatot llaqtata hinaspa Almon llaqtata. Chaykunam karqa tawa llaqtakuna echaderoyoqkama.

¹⁹ Aaronpa miraynin sacerdotekunapa llapallan llaqtankunam karqa chunka kimsayoq llaqtakuna echaderoyoqkama.

²⁰ Leviy ayllu Coatpa wakin castanmanñataqmi suerteasqankuman hina qorqaku Efrain ayllupa allpanpi.

²¹ Paykunamanmi qorqaku Efrain ayllupa orqonpi Siquem llaqtata, chay llaqtam karqa runamasin wañuchiq runa amparakunanpaq. Qorqakutaqmi Gezer llaqtatapas,

²² Kibsaim llaqtatapas chaynataq Bet-horon llaqtatapas. Chaykunam karqa tawa llaqtakuna echaderoyoqkama.

²³ Dan ayllupa allpanpipas qorqakutaqmi Elteque llaqtata, Gibeton llaqtata,

²⁴ Ajalon llaqtata chaynataq Gat-rimon llaqtatapas. Chaykunam karqa tawa llaqtakuna echaderoyoqkama.

²⁵ Paykunamanmi qorqakutaq Manases parten ayllupa allpanpi Taanac llaqtatapas chaynataq Gat-rimon llaqtatapas. Chaykunam karqa iskay llaqtakuna echaderoyoqkama.

²⁶ Chaynaqa Coatpa wakin castankunapaq chay llapallan llaqtakunam karqa chunka, paykunapataqmi karqa chay llaqtakunapa echaderonkunapas.

²⁷ Leviy ayllumanta kaq Gersonpa mirayninkunamanñataqmi qorqaku Manases parten ayllupa allpanpi kaq Basan law Golan llaqtata, chay llaqtam karqa runamasin wañurachiq amparakunanpaq. Qorqakutaqmi Beestera llaqtatapas. Chaykunam karqa iskay llaqtakuna echaderoyoqkama.

²⁸ Qorqakutaqmi Isacar ayllupa allpanpipas Cison llaqtata, Daberat llaqtata,

²⁹ Jarmut llaqtata chaynataq En-ganim llaqtatapas. Chaykunam karqa tawa llaqtakuna echaderoyoqkama.

³⁰ Qorqakutaqmi Aser ayllupa allpanpi Misael llaqtatapas, Abdon llaqtatapas,

³¹ Helcat llaqtatapas chaynataq Rehob llaqtatapas. Chaykunam karqa tawa llaqtakuna echaderoyoqkama.

³² Neftaliy ayllupa allpanpipas qorqakutaqmi Galilea lawpi Cedes llaqtata, chay llaqtam karqa runamasin wañuchiq runa amparakunanpaq. Qorqakutaqmi Hamot-dor llaqtatapas chaynataq Cartan llaqtatapas. Chaykunam karqa kimsa llaqtakuna echaderoyoqkama.

³³ Chaynaqa Gersonpa castankunapa llapallan llaqtankunam karqa chunka kimsayoq llaqtakuna echaderoyoqkama.

³⁴ Leviy ayllumanta kaq Meraripa castankunamanmi qorqaku Zabulon ayllupa allpanpi Jocneam llaqtata, Carta llaqtata,

³⁵ Dimna llaqtata hinaspa Naalal llaqtata. Chaykunam karqa tawa llaqtakuna echaderoyoqkama.

³⁶ Ruben ayllupa allpanpipas qorqakutaqmi Beser llaqtata, Jahaza llaqtata,

³⁷ Cademot llaqtata hinaspa Mefaat llaqtata, chaykunam karqa tawa llaqtakuna echaderoyoqkama.

³⁸ Gad ayllupa allpanpipas qorqakutaqmi Galaad lawpi Ramot llaqtata, chay llaqtam karqa runamasin wañuchiq runa amparakunanpaq. Qorqakutaqmi Mahanaim llaqtatapas,

³⁹ Hesbon llaqtatapas chaynataq Jazer llaqtatapas. Chaykunam karqa tawa llaqtakuna echaderoyoqkama.

⁴⁰ Chaynaqa Leviy ayllu wakin runakunaman otaq Merari casta runakunaman suerteaspanku qosqanku llapallan llaqtakunam karqa chunka iskayniyoq llaqtakuna.

⁴¹ Israelpa mirayninkunapa dueñochakusqanku allpapi kaq Leviy aylluman qosqanku llapallan llaqtakunam karqa tawa chunka pusaqniyoq llaqtakuna echaderoyoqkama.

⁴² Chay llaqtakunaqa sapakamam karqa muyuriqninpi echaderoyoqkama.

Prometesqankunata Tayta Dios cumplisqanmanta

⁴³ Abuelonkunaman juramentasqanman hinamá Israelpa mirayninkunaman llapallan allpata Tayta Dios qorqa. Chaymi paykuna dueñochakuruspanku chaypi *f**yacharqaku.

⁴⁴ Abuelonkuman tukuy jurasqanta hinam muyuriqninkupi nacionkunawan hawkaña kanankupaq Tayta Dios chaynata rurarqa. Chaymi llapallan enemigonkunapas paykunawan peleayta manaña atirqakuchu, Tayta Dios yanapaptinmi enemigonkunatapas vencerqaku.

⁴⁵ Israel castakunaman Tayta Dios prometespa llapa allin rimasqankunaqa manam yanqachu karqa aswanqa llapallanmi cumplikurqa.