Josué 2 - Quechua Ayacucho Bible 1987

Jerico llaqtata wateqamunankupaq kachasqanmanta

¹ Nunpa churin Josueymi samasqanku Sitim lawmanta mana pipa yachasqallanta kacharqa iskay runakunata chay allpata reqsimunankupaq. Paykunatam nirqa: —Qawamuychikyá allpatawan Jerico llaqtata —nispa. Paykunam rirqaku hinaspam chuchumika Rahab sutiyoq warmipa wasinman yaykuspanku chaypi samarurqaku.

² Ichaqa Jerico llaqtapi reymanmi willaykamurqaku kaynata: —Israelpa mirayninkunamantam runakuna kunan tuta hamurunku allpanchik wateqaq —nispa.

³ Chaymi Rahab sutiyoq warmiman rey kachaspan nichimurqa: —Qanman hamuspa wasikiman yaykumuq runakunata hawaman horqomuy. Paykunaqa lliw allpanchik wateqaqmi hamurunku —nispa.

⁴ Aswanqa chay warmim iskaynin samachisqan runakunata pakaruspan nirqa: —Cheqaptam ñoqaman hamurqaku runakuna ichaqa manam yacharqanichu maylawmantam kasqankutaqa.

⁵ Tutaykuchkaptinñam llaqtapa zaguanninta wichqanankupaq kachkaptin chay runakunaqa lloqsirurqaku. Maylawman pasasqankutaqa manam yachanichu. Apurawman qatirayaychik hinaspaqa hayparunkichikmi —nispa.

⁶ Aswanqa chay runakunataqa paymi seqarachirqa wasinpa qatanman hinaspam pakarurqa lino masasqan ukupi.

⁷ Reypa kachasqan runakunam vadokama qatiparqaku Jordan Mayu lawman riq ñanninta. Punkutam wichqarurqaku qatipaq runakuna lloqsiruptillanku.

⁸ Aswanqa chay pakasqa runakuna manaraq puñuruchkaptinkum chay warmi seqarqa wasinpa qatanman hinaspam chay wateqaq runakunata nirqa:

⁹ —Yachanim Tayta Dios kay allpa qosunaykichikta. Qamkunaraykutaqmi ancha manchakuyta Tayta Dios sonqoykuman churarun. Kay nacionpi llapallan yachaqkunam qamkunarayku manchakuymanta wañusqa hinaña kachkanku.

¹⁰ Uyarirqanikum Egipto nacionmanta lloqsimuptikichik Puka Lamar Qochata Tayta Dios qayllaykichikpi chakirachisqanta. Uyarirqanikutaqmi Jordan Mayupa waklaw chimpanpi kaq Amor casta runakunapa iskay reyninkuta otaq Rey Sehontawan Rey Ogta imam rurasqaykichiktapas. Paykunatam chinkarachirqankichik.

¹¹ Chaykuna uyarisqaykuwanmi mancharisqallaña kachkaniku. Manam pi runapipas valor kanñachu qamkunarayku. Yupaychasqaykichik Tayta Diosqa cielokunapi chaynataq kay pachapipas hina kaq Diosllam.

¹² Ruegakuykichikmi Tayta Diosrayku kunallan juramento rurawanaykichikpaq. Imaynam ñoqapas qamkunata llakipayarirqaykichik chaynatamá qamkunapas taytaypa familiankunamanta llakipayarikunkichik. Chayna kananpaqyá confianza señalta qoykuwaychik.

¹³ Chaynaqa tayta-mamaytapas turiykunatapas ñañaykunatapas chaynataq kapuqninkunatapas amamá wañurachinkichikchu. Libraykuwankikumá wañunaykumanta —nispa.

¹⁴ Hinaptinmi chay runakunañataq nirqaku: —Kay asuntoykumanta mana willakuykuptikiqa vidaykutam qoykusaqku qamkuna mana wañunaykichikpaq. Kay allpata Tayta Dios qoykuwaptinkum ñoqaykupas qamkunamanta cheqaptapuni kuyapayarikusaqku —nispa.

¹⁵ Wasinpa perqankunam llaqtapa murallanpa parten karqa chaymi murallapa hawanpi *f**yachasqanrayku Rahab uraykachirqa ventanamanta waskawan.

¹⁶ Hinaspam paykunata nirqa: —Qatipasuqnikichik runakuna mana tarirusunaykichikpaqyá paykuna kutimunankukama pasakuychik orqoman hinaspayá chaypi pakakaramuychik kimsa punchaw. Chaymantañam pasakunkichik maymi rinaykichikta —nispa.

¹⁷ Chaymi chay runakuna nirqaku: —Ñoqaykuqa juramento rurachiwasqaykikutam cumplisaqku.

¹⁸ Chaynaqa ñoqayku kay allpaman yaykumuptiykum kay guindo waskata warkunki uraykachiwasqaykiku ventanapi hinaspam huñunki wasikiman tayta-mamaykita, turi-ñañaykita chaynataq taytaykipa llapallan ayllunkunatapas.

¹⁹ Pipas wasikimanta calleman lloqsispaqa wañunqam chaynaqa kikinñam huchayoq kanqa, ñoqaykum ichaqa mana culpayoqchu kasaqku. Aswanqa pipas wasiki ukupi kachkaspan wañuchisqa kaptinqa ñoqaykum culpayoq kasaqku.

²⁰ Ichaqa kay asuntomanta willakuykuptikiqa ñoqaykum kasaqku libre chay juramento rurachiwasqaykikumanta —nispa.

²¹ Hinaptinmi chay Rahab sutiyoq warmiñataq nirqa: —Qamkunapa nisqaykichikman hinayá kachun —nispa. Chaymi paykunata aviaruptin pasakurqaku. Rahab warmiñataqmi warkururqa ventanamanta chay guindo waskata.

²² Chaymi chay allpa wateqanankupaq hamuqkuna pasaspanku chayarurqaku orqoman. Chaypim karqaku kimsa punchaw qatipaqninku runakuna kutimunankukama. Chay qatipaqkunam maskamurqaku tukuy hinastinpi ichaqa manam tarimurqakuchu.

²³ Chay iskaynin wateqaq runakunañataqmi orqomanta kutiramuspanku Jordan Mayuta chimparurqaku hinaspam Nunpa churin Josueyman pasarqaku. Paymanmi willarqaku tukuy ima paykunawan pasasqanta.

²⁴ Paykunamá nirqaku: —Tayta Diosmi lliw allpata entregaykuwanchik chaynataqmi llapallan yachaqkunapas manchakuymanta wañusqa hinaña kachkanku —nispa.