Josué 19 - Quechua Ayacucho Bible 1987

Simeon ayllupa allpanmanta

¹ Iskay kaq suerteñataqmi tuparurqa Simeon ayllunman chaynapi castanman hina partinakunankupaq. Chay chaskisqanku allpaqa karqa Juda ayllupa herencia allpanku ukupim.

² Chay chaskisqanku allpapi llaqtakunam karqa kaykuna: Beerseba, Seba, Molada,

³ Hazar-sual, Bala, Ezem,

⁴ Eltolad, Betul, Horma,

⁵ Siclag, Bet-marcabot, Hazar-susa,

⁶ Bet-lebaot hinaspa Saruhen. Chaykunam karqa chunka kimsayoq llaqtakuna llaqtachankunapiwan.

⁷ Tocancian wakin llaqtakunañataqmi karqa: En-rimon, Eter hinaspa Asan. Chaykunam karqa tawa llaqtakuna llaqtachankunapiwan.

⁸ Simeon ayllupa tocanciantaqmi karqa chay llaqtakunapa muyuriqninpi llaqtachakunapas Baalat-beer llaqtaman chayanankama, chay llaqtapa huknin sutinmi karqa Ramat. Chay llaqtaqa karqa Neguev chunniq lawpim.

⁹ Simeon ayllupa tocancianqa karqa Juda ayllupa herencia allpanku ukupim, chaynaqa karqa Juda ayllupa allpanku paykunapaq ancha hatun kasqanraykum. Chaynapimá Simeon ayllupa herencia allpankuta partirqaku Juda ayllupa herencia allpanku ukupi.

Zabulon ayllupa allpanmanta

¹⁰ Kimsa kaq suerteñataqmi tuparurqa Zabulon ayllunman chaynapi castankuman hina partinakunankupaq. Chay chaskisqanku allpapa linderonmi karqa Sarid llaqtakama.

¹¹ Chay linderoqa pasarqa intipa seqaykunan law Marala llaqtantam Dabeset llaqtaman chayanankama, chaymantam pasarqa Jocneam llaqtapa chimpan wayqokama.

¹² Sarib llaqtamantañataqmi muyurirqa intipa qespimunan Quislot-tabor linderonkama. Chaymantañataqmi pasarqa Daberat llaqtanta Jafia llaqtakama.

¹³ Chaymantam pasarqa intipa qespimunan lawpi Gat-hefer llaqtaman chaynataq Ita-cazin llaqtaman. Chayninta lloqsispanñataqmi pasarqa Rimon llaqtaman Nea llaqtanta muyurimuspan.

¹⁴ Norte law linderoñataqmi muyumurqa Hanaton llaqtanta Jefte-el Qechwaman chayanankama.

¹⁵ Paykunapa allpanpitaqmi karqa kay llaqtakuna: Catat, Naalal, Simron, Idala hinaspa Belen. Chay llaqtakunam karqa chunka iskayniyoq llaqtakunapa wakinnin llaqta llaqtachankunapiwan.

¹⁶ Chaynamá karqa Zabulon ayllupa castankuman hina herencia allpankuqa, llaqtakunapas paykunapam karqa llaqtachankunapiwan.

Isacar ayllupa allpanmanta

¹⁷ Tawa kaq suerteñataqmi tuparurqa Isacar aylluman chaynapi castankuman hina partinakunankupaq.

¹⁸ Chay herencia allpankupim karqa kay llaqtakuna: Jezreel, Quesulot, Sunem,

¹⁹ Hafaraim, Sihon, Anaharat,

²⁰ Rabit, Quision, Abez,

²¹ Remet, En-ganim, En-hada hinaspa Bet-pases.

²² Chay herenciankupa linderonmi chayarqa Tabor Moqokama, Sahazima llaqtakama, Bet-semes llaqtakama hinaspam tukurqa Jordan Mayupi. Paykunapam karqa chunka soqtayoq llaqtakuna llaqtachankunapiwan.

²³ Chaynamá karqa Isacar ayllupa castankuman hina herencia allpankuqa, llaqtakunapas paykunapam karqa llaqtachankunapiwan.

Aser ayllupa allpanmanta

²⁴ Pichqa kaq suerteñataqmi tuparurqa Aser aylluman chaynapi castankuman hina partinakunankupaq.

²⁵ Chay herencia allpankupim karqa kay llaqtakuna: Helcat, Hali, Beten, Acsaf,

²⁶ Alamelec, Amad hinaspa Miseal. Chaynapim chay linderonqa chayarqa intipa seqaykunan lawpi Carmelo Orqokama chaynataq Sihor-libnat lawkama.

²⁷ Intipa qespimunan lawninta riq linderoñataqmi muyumurqa Bet-dagon llaqtaman. Zabulon ayllupa allpanta pasaspanmi chayarqa norte lawpi Jefte-el Qechwakama, chaymantam pasarqa Bet-emec llaqtanta, Neiel llaqtanta hinaspam lloqsirqa Cabul llaqtapa norte lawninta.

²⁸ Chay herencia allpankupim karqa kay llaqtakuna: Abdon, Rehob, Hamon hinaspa Cana, chay linderonqa chayarqa Sidon hatun llaqtakamam.

²⁹ Chaymantañataqmi muyumurqa Rama llaqtanta murallasqa Tiro llaqtakama, chaymanñataqmi Hosa llaqtaman muyumuspa lloqsirqa Mediterraneo Lamar Qochakama. Paykunapataqmi karqa kay wakin llaqtakunapas: Mahaleb, Aczib,

³⁰ Uma, Afec hinaspa Rehob. Chay llaqtakunawanmi karqa iskay chunka iskayniyoq llaqtakuna llaqtachankunapiwan.

³¹ Chaynamá karqa Aser ayllupa castankuman hina herencia allpankuqa, llaqtakunapas paykunapam karqa llaqtachankunapiwan.

Neftaliy ayllupa allpanmanta

³² Soqta kaq suerteñataqmi tuparurqa Neftaliy aylluman chaynapi castankuman hina partinakunankupaq.

³³ Allpankupa linderonmi qallarirqa Helef llaqtamanta chaynataq Alon-saananim llaqtamanta hinaspam pasarqa Adami-neceb llaqtanta chaynataq Jabneel llaqtanta Lacum llaqtakama hinaspam lloqsirqa Jordan Mayuman.

³⁴ Chaymantam muyurqa intipa seqaykunan lawman, Aznot-tabor lawninta pasaspam chayarqa Hucoc llaqtaman. Chaynapimá surlawpi Neftaliy ayllupa linderonqa karqa Zabulon ayllupa linderonwan tupanakuq. Intipa seqaykunan lawman linderoñataqmi karqa Aser ayllupa linderonwan tupanakuq, intipa qespimunan lawman linderonñataqmi chayarqa Juda lawpi Jordan Mayukama.

³⁵ Paykunaman tuparuq murallasqa llaqtakunañataqmi karqa: Sidim, Zer, Hamat, Racat, Cineret,

³⁶ Adama, Rama, Hazor,

³⁷ Cedes, Edrei, En-hazor,

³⁸ Iron, Migdal-el, Horem, Bet-anat hinaspa Bet-semes. Chaykunam karqa chunka isqonniyoq llaqtakuna llaqtachankunapiwan.

³⁹ Chaynamá karqa Neftaliy ayllupa castankuman hina herencia allpankuqa, llaqtakunapas paykunapam karqa llaqtachankunapiwan.

Dan ayllupa allpanmanta

⁴⁰ Qanchis kaq suerteñataqmi tuparurqa Dan aylluman chaynapi castankuman hina partinakunankupaq.

⁴¹ Paykunapa herencia allpankupim karqa kay llaqtakuna: Zora, Estaol, Ir-semes.

⁴² Saalabin, Ajalon, Jetla,

⁴³ Elon, Timnat, Ecron,

⁴⁴ Elteque, Gibeton, Baalat,

⁴⁵ Jehud, Bene-berac, Gat-rimon,

⁴⁶ Mejarcon hinaspa Racon. Paykunapataqmi karqa Jope llaqtapa hichpanpi kaq allpakunapas.

⁴⁷ Aswanqa Dan aylluman chay tocancianku allpa mana haypaptinmi rirqaku Lesem llaqtata atacamunankupaq. Venceruspankum runakunata espadawan wañurachirqaku hinaspam dueñochakurqaku. Chay llaqtapi *f**yachaspankutaqmi chay Lesem llaqtata suticharqaku abuelonku Danpa sutinwan.

⁴⁸ Chaynamá karqa Dan ayllupa castankuman hina herencia allpankuqa, llaqtakunapas paykunapam karqa llaqtachankunapiwan.

Josueypa tocancianmanta

⁴⁹ Israelpa mirayninkuna linderonkuman hina herenciankupaq allpata partiyta tukuruspankuñataqmi qorqaku Nunpa churin Josueyman, chay herencia allpataqa qorqaku kikinkupa allpanku ukupim.

⁵⁰ Tayta Diospa nisqanman hinam Efrain ayllupa yachasqan orqopi Josueyman qorqaku mañakusqan Timnat-sera llaqtata. Chaymi chay llaqtata pay mosoqmanta hatarichispan chaypi *f**yacharqa.

⁵¹ Chay herenciankupaq allpatamá sacerdote Eleazar, Nunpa churin Josuey chaynataq ayllukunapa jefenkuna suerteaspa partirqaku Israel ayllukunaman. Chaynatamá rurarqaku Tayta Diospa qayllanpi otaq Diosman asuykuna karpapa punkunpi, chay karpaqa karqa Silo llaqtapim. Chaynatamá herencia allpa partinakuyta tukurqaku.