Josué 16 - Quechua Ayacucho Bible 1987

Joseypa mirayninkunapa allpanmanta

¹ Suerteasqa Joseypa mirayninkunaman allpa qosqankum qallarirqa intipa qespimunan lawpi tarikuq Jordan Mayumanta, chay mayuqa kachkan Jerico pukyukunapa hichpanpim, chaypi qallarispamá chunniqninta chutarikurqa Betel moqokunakama.

² Betel otaq Luz llaqtamantam pasarqa Arqui runakunapa linderonpi Atarot llaqtakama.

³ Chaymantam pasarqa intipa seqaykunan lawpi kaq Jaflet runakunapa allpanman, chaymantañataq uray lawpi kaq Bet-horon llaqtapa linderonkama, chaymantañataqmi Gezer llaqtanta pasaspan chayarqa Mediterraneo sutiyoq lamar qochakama.

⁴ Kay allpakunatam herenciankupaq chaskirqaku Josueypa mirayninkuna otaq Manasespiwan Efrain ayllukuna.

Efrain ayllupa allpanmanta

⁵ Castankuman hinataqmi Efrain ayllupaqpas allpanku karqa. Intipa qespimunan lawmanmi karqa Atarot-adar llaqtamanta hanay lawpi kaq Bet-horon llaqtakama.

⁶ Chaymantam pasarqa Mediterraneo Lamar Qochakama, chaymantañataqmi pasarqa norte lawninta Micmetat llaqtakama hinaspam muyurirqa intipa qespimunan lawninta Taanat-silo llaqtakama, chaymantam pasarqa intipa qespimunan lawpi kaq Janoa llaqtakama.

⁷ Janoa llaqtamantam pasarqa Atarot llaqtaman chaynataq Naarat llaqtaman. Jerico llaqtapa hichpanta pasaspanñataqmi lloqsirqa Jordan Mayuman.

⁸ Tapua llaqtamantam pasarqa intipa seqaykunan lawman Cana Mayukama, chayninta pasaspam lloqsirqa Mediterraneo sutiyoq lamar qochaman. Chay herencia allpamá karqa Efrain ayllupaq imaynam castankuman hina.

⁹ Paykunapaqtaqmi karqa rakisqa llapa llaqtakunapas llaqtachankunapiwan, chay tocaqnin llaqtakunaqa karqa Manases ayllupa allpan ukupim.

¹⁰ Gezer llaqtapi *f**yachaq Canaan runakunataqa manam qarqorqakuchu Efrain ayllu runakunaqa. Aswanqa chay Canaan casta runakunam paykuna ukupi yacharqaku kay libro qellqasqa kasqan tiempokama. Chaywanpas chay Canaan runakunam paykunata devaldella servirqaku.