Josué 14 - Quechua Ayacucho Bible 1987

Canaan allpata Josuey partisqanmanta

¹ Canaan allpapim Israelpa mirayninkuna herenciankuta chaskirqaku. Chaytam paykunaman partirqa sacerdote Eleazar, Nunpa churin Josuey chaynataq Israel ayllukunapa kamachiqninkunapas.

² Chay allpataqa suerteaspankum paykunaman partirqaku herenciankupaq, partirqakumá isqonnintin ayllukunaman chaynataq parten ayllumanpas Moisesman Tayta Diospa kamachisqanpi hina.

³ Ruben hinaspa Gad ayllumanpas chaynataq Manases parten ayllumanpas Moisesqa qorqañam herenciankupaq allpata, qorqaqa Jordan Mayupa waklaw chimpanpim. Leviy castakunamanmi ichaqa wakin ayllukunaman hinaqa mana qorqachu herenciankupaq allpata.

⁴ Joseypa mirayninkunam karqa iskay ayllukuna, chay ayllukunaqa karqa Manaseswan Efrainmi. Chaymi Leviy castakunamanqa mana qorqakuchu herenciankupaq allpata. Paykunamanqa qorqaku *f**yachanankupaq llaqtakunallatam, qorqakutaqmi vacankupaqpas, ovejankupaqpas chaynataq cabrankupaqpas echaderokunata.

⁵ Moisesman Tayta Diospa kamachisqanta hinallam Israelpa mirayninkuna allpata partinakurqaku.

Calebpa tocancianmanta

⁶ Judapa mirayninkunam rirqaku Josueywan rimaq Gilgal lawpi kachkaptin chaymi Cenez casta Jefonepa churin Caleb Josueyta nirqa: —Qamqa yachankim ñoqamantawan qanmanta Cades-barnea lawpi kachkaptinchik serviqnin Moisesman imam Tayta Diospa nisqanta.

⁷ Ñoqaqa karqani tawa chunka watayoqmi Tayta Diospa serviqnin Moises Cades-barnea lawmanta Canaan allpa wateqaq kachawaptinqa. Chaymanta kutimuspaymi ñoqaqa imam kaqllata willakurqani.

⁸ Riqmasiykunam ichaqa wakin runakunata hukmanyarachirqaku, chaywanpas yupaychasqanchik Tayta Diosman kasukuq sonqo kaspaymi cumplirqani.

⁹ Chay punchawmi Moises juramentaspan niwarqa: “Cheqaptapunipas sarumusqayki allpaqa qampa chaynataq miraynikikunapa herencianmi kanqa, yupaychasqanchik Tayta Diosman kasukuq sonqo kasqaykiraykum wiñaypaq herenciayki kanqa” nispa.

¹⁰ Kayqaya Tayta Dios kawsachiwachkanraq nisqanpi hina tawa chunka pichqayoq watataraq, Israel casta runakunata chunniqpi purichkaptin Moisesman Tayta Dios kay palabrakunata rimasqanmantapunim kunankama kawsachkaniraq. Kunanqa kachkani pusaq chunka pichqayoq wataypiñam.

¹¹ Kallpaypiraqmi kachkani guerraman rinaypaqpas, Moisespa kachawasqan punchawpi hinaraqmi ñoqaqa kachkani imata ruranaypaqpas.

¹² Tayta Diospa chay punchawpi rimasqanta hinayá kunan qoykuway chay moqokunata. Yachankimiki chay tiempopiqa Anac casta runakuna chay moqokunapi yachasqanta chaynataq murallasqa hatun llaqtakunapas chaypi kasqanta. Tayta Dios yanapawaptinqa paypa niwasqanpi hinam qarqoruspay dueñochakurusaq —nispa.

¹³ Josueymi Jefonepa churin Calebpaq Diospa bendicionninta mañakurqa hinaspam qoykurqa Hebron allpata herencianpaq.

¹⁴ Chayraykum Hebron llaqtaqa karqa Cenez casta Jefonepa churin Calebpa herencian kay libro qellqasqa kasqan punchawkama, paypañam karqa Israelpa yupaychasqan Tayta Diosman kasukuq sonqo kasqanrayku.

¹⁵ Hebron llaqtapa ñawpaq sutinqa karqa Quiriat-arbam. Arba runaqa karqa Anac casta hatunkaray runam. Chay tiempomantam manaña guerra karqachu chay allpapi.