Josué 13 - Quechua Ayacucho Bible 1987

Manaraq dueñochakusqanku allpakunamanta

¹ Josuey anchata yuyaqyaruptinñam payta Tayta Dios nirqa: —Qamqa ancha yuyaqñam kanki chaywanpas kachkanraqmi achkallaña allpakuna dueñochakunapaq.

² Puchuq allpakunaqa kaykunam: Filistea casta runakunapa lliw allpankuna chaynataq Gesur casta runakunapa allpankuna.

³ Chay allpakunaqa qallarimuchkan Egipto nacionpa inti qespimunan lawpi Sihor Mayumantam hinaspam pasan Norte lawpi kaq Ecron llaqtapa linderonkama. Chay allpakunam Canaan casta runakunapa allpankuna. Chay allpakunapim kachkan Filistea casta runakunapi pichqantin kamachikuqkunapa llaqtankuna otaq: Gaza llaqta, Asdod llaqta, Ascalon llaqta, Gat llaqta hinaspa Ecron llaqta, chay allpakunapitaqmi kachkan Av casta runakunapa allpankupas.

⁴ Puchuchkanraqmi Canaan casta runakunapa surlawninpi allpakunapas, chay allpakunaqa chutarikuchkan Sidon llaqtayoq runakunapa allpanmantam Afec llaqtakama chaynataq Amor casta runakunapa linderonkama.

⁵ Puchuchkanraqmi Gebli casta runakunapa allpanpas chaynataq intipa qespimunan lawpi lliw Libano allpapas otaq Hermon Orqopa urayninpi kaq allpapas, chay allpaqa chuntarikun Baal-gad llaqtamantam Hamat Qasakama.

⁶ Israelpa mirayninkunapa ñawpaqninmantam ñoqa wischusaq Libano Orqokunapi llapallan *f**yachaqkunata, paykunataqa wischusaq Misrefot-maim lawkamam. Wischusaqtaqmi Sidon llaqtayoq llapallan runakunatapas. Qanmi allpata partinki Israel castakunaman herencia allpanku kananpaq, chaynataqa ruranki qanman kamachisqaypi hinam.

⁷ Herencianku kananpaqmi allpata partinki isqonnintin ayllukunaman chaynataq Manases parten ayllumanpas.

Intipa qespimunan lawpi allpakunamanta

⁸ Manases ayllupa huknin partenqa, Ruben aylluwanmi chaynataq Gad aylluwanmi chaskirunkuña herencia allpankuta. Chaytam Moises qorqa paykunaman Jordan Mayupa chimpan intipa qespimunan lawpi. Tayta Diospa serviqnin Moisesmá paykunaman qorqa.

⁹ Moisespa chay allpa qosqanmi qallarirqa Arnon Wayqopa patanpi kaq Aroer llaqtamanta chaynataq wayqopa chawpinpi kaq llaqtamanta hinaspam chutarikurqa Medeba pampanta Dibon llaqtakama.

¹⁰ Qorqataqmi Hesbon llaqtapi gobiernaq Rey Sehonpa llapallan llaqtankunatapas Amonpa mirayninkunapa linderonkama.

¹¹ Qorqataqmi Galaad lawpi allpatapas, Gesur casta runakunapa allpantapas, lliw Hermon Orqotapas chaynataq lliw Basan law allpatapas Salca llaqtakama

¹² otaq Basan lawpi Rey Ogpa llapallan gobiernasqan allpankunatapas. Chay Ogmi *f**yacharqa Astarot llaqtapi chaynataq Edrei llaqtapi. Paymi karqa Refaim casta runakunapa puchuqnin. Paykunatam Moises venceruspan allpankuta dueñochakururqa.

¹³ Aswanqa Gesur casta runakunatawan Maaca casta runakunataqa Israelpa mirayninkunaqa manam wischurqakuchu, chayraykum paykunaqa Israel castakunawan hinalla *f**yachachkanku kay libro qellqasqa kasqan tiempokama.

¹⁴ Leviy ayllumanmi ichaqa herenciankupaq allpata Moises mana qorqachu. Israelpa yupaychasqan Tayta Diosman Israel casta runakunapa kañanan ofrendam karqa Leviy ayllupa herencianqa.

¹⁵ Ruben ayllumanmi haykam castankuman hina Moises qorqa allpata.

¹⁶ Paykunapa allpankunam karqa Medeba pampa, chay allpapa linderonkunam qallarirqa Arnon Wayqopa patanpi kaq Aroer llaqtamanta chaynataq wayqopa chawpinpi kaq llaqtamanta.

¹⁷ Chay pampapa llaqtankunam karqa Hesbon llaqta chaynataq pampapi kaq kay lliw llaqtakunapas: Dibon llaqta, Bamot-baal llaqta, Bet-baal-meon llaqta,

¹⁸ Jahaza llaqta, Cademot llaqta, Mefaat llaqta,

¹⁹ Quiriataim llaqta, Sibma llaqta, qechwa law orqopi kaq Zaret-sahar llaqta,

²⁰ Bet-peor llaqta, Pisqa Orqopa waqtankuna chaynataq Bet-jesimot llaqta.

²¹ Ruben ayllupa allpankunamá karqa pampapi llaqtakuna chaynataq Hesbon llaqtapi gobiernaq Amor casta runakunapa reynin Sehonpa gobiernasqan allpakuna. Rey Sehontaqa Madian casta runakunapa jefenkunatawanmi Moises wañurachirqa. Chay jefekunam karqa: Evi, Requem, Zur, Hur hinaspa Reba. Chaykunam karqa Rey Sehon serviqkuna otaq paypa allpanpi yachaqkuna.

²² Israelpa mirayninkunaqa wañurachirqakutaqmi Beorpa churin adivinaq Balaamtapas, paytaqa wañurachirqaku guerrapi wañuchisqanku runakunatawan kuskatam.

²³ Rubenpa mirayninkunapa allpankupa linderonmi pasarqa Jordan Mayukama. Tukuy chaykunamá karqa Rubenpa mirayninkunapa herencia allpanku, castankuman hinam chay llaqtakunaqa paykunapaq karqa, paykunapaqtaqmi karqa muyuriqninpi llaqtachakunapas.

²⁴ Gad ayllumanmi haykam castankuman hina Moises qorqa allpata.

²⁵ Herenciankupaq allpam karqa Jazer llaqta chaynataq Galaad lawpi llapallan llaqtakunapas, chay allpaqa ñawpaqtam karqa Amonpa mirayninkunapa parten allpa, chaynaqa chaykunatapas Moisesmá qorqa Raba llaqtapa hichpanpi kaq Aroer llaqtakama.

²⁶ Qorqataqmi Hesbon llaqtamanta qallariq allpatapas Ramat-mizpa llaqtakama chaynataq Betonim llaqtakama, qorqataqmi Mahanaim llaqtamanta qallariq allpatapas Debir llaqtapa linderonkama.

²⁷ Herenciankupaq allpataqmi karqa qechwa lawpi Bet-aram llaqtapas Bet-nimra llaqtapas, Sucot llaqtapas chaynataq Zafon llaqtapas otaq Hesbon llaqtapi gobiernaq Rey Sehonpa gobiernasqan wakin allpakunapas. Chay allpakunaqa karqa intipa qespimunan law Jordan Mayupa waklaw chimpanpim, chay hatun allpaqa chayarqa Cineret Qochapa surlaw patankamam.

²⁸ Tukuy chaykunamá karqa Gadpa mirayninkunapa herencia allpanku, castankuman hinam chay llaqtakuna paykunapaq karqa muyuriqninpi llaqtachakunapiwan.

²⁹ Manases ayllupa huknin partenmanpas haykam castankuman hinam Moises qorqa allpata.

³⁰ Paykunapa allpanmi karqa Mahanaim llaqtamanta qallarispa lliw Basan law allpakuna otaq Rey Ogpa gobiernasqan lliw allpakuna otaq Basan lawpi kaq Jair castapa *f**yachasqan soqta chunka llaqtachakuna.

³¹ Paykunapataqmi karqa Galaad lawpi parten allpakunapas, Astarot llaqtapas chaynataq Edrei llaqtapas. Kay llaqtakunam karqa Basan lawpi Rey Ogpa gobiernasqan llaqtakuna. Chay allpakunam karqa Manasespa churin Maquirpa parten ayllukunapaq, chaynaqa karqa haykam castankuman hinam.

³² Kay allpakunatamá herenciankupaq Moises partirqa Jerico llaqtapa waklawnin Jordan Mayupa chimpanpi otaq intipa qespimunan law Moab runakunapa allpan pampakunapi.

³³ Leviy ayllumanmi ichaqa Moises mana qorqachu herenciankupaq allpata, kaynata nisqanrayku: —Israelpa yupaychasqan Tayta Diosmi qamkunapa herenciaykichikqa —nispa.