Josué 11 - Quechua Ayacucho Bible 1987

Rey Jabinta yanapaqninkunatawan vencesqankumanta

¹ Hazor llaqtapi Rey Jabinmi chay pasaqkunamanta uyarispan kacharqa Madon llaqtapi Rey Jobabman, Simron llaqtapi reyman, Acsaf llaqtapi reyman,

² norte law orqokunapi kaq reykunaman, Cineret Qochapa surlawnin Araba Qechwapi kaqkunaman chaynataq intipa seqaykunan Dor llaqta lawpa waqtankunapi hinaspa orqonkunapi kaq reykunamanpas.

³ Payqa kacharqataqmi intipa qespimunan hinaspa seqaykunan lawpi kaq Canaan casta runakunamanpas, Amor casta runakunamanpas, Het casta runakunamanpas, Ferez casta runakunamanpas, orqokunapi kaq Jebus casta runakunamanpas chaynataq Hermon Orqopa waqtan Mizpa lawpi kaq Hiv casta runakunamanpas.

⁴ Chay reykunamá lloqsirqaku llapa tropankunawan. Paykunaqa karqa lamar qochapa patanpi aqo hina llumpa-llumpay achkallañam. Guerrapaq caballonkupas, carretankupas nana-nanaqmi karqa.

⁵ Llapallan chay reykunamá hukllawakuruspanku Merom Qochapa hichpanman hamururqaku hinaspam chaypi campamentonkuta sayachirqaku Israel castakunawan peleanankupaq.

⁶ Aswanqa Tayta Diosmi nirqa Josueyta: —Ama manchakuychu paykunata, paqarinmi kunan hina horata Israel castakunaman llapallan chay runakunata wañusqata entregasaq. Chaymi caballonkunapa ankuta kuchunki, carretankunatapas kañankitaqmi —nispa.

⁷ Josueymi llapallan tropankunawan paykunapa contranpi pasarqaku Merom Qochapa hichpankama, qonqayllamanta chayaruspam paykunata atacarqaku.

⁸ Tayta Diosmi qoykurqa Israel casta runakunaman chaymi paykuna venceruspanku qatirqaku Hatun Sidon llaqtakama chaynataq Misrefot-maim lawkama chaynataq intipa qespimunan law Mizpa Qechwakama. Paykunatamá wañuchirqaku mana chullatapas puchuspa.

⁹ Josueymi Tayta Diospa nisqanta hina paykunawan ruraspan caballonkupa ankunta kuchurarirqa, carretankutapas kañarurqataqmi.

¹⁰ Chay punchawllam Josuey kutiramuspan dueñochakururqa Hazor llaqtata hinaspam reyninta wañurachirqa espadawan. Ñawpaqtaqa chay Hazor llaqtam karqa yanapaqnin gobierno llaqtakuna kamachiq.

¹¹ Chay Hazor llaqtapi llapallan kawsaqkunatam espadawan wañurachirqaku. Chinkarachirqakumá mana chullatapas puchuspa. Hinaspataqmi chay Hazor llaqtataqa kañarurqaku.

¹² Josueyqa vencerurqataqmi chay wakin llaqtakunatapas reyninkunatawan. Espadawan wañurachispam pasaypaqta chinkarachirqa Tayta Diospa serviqnin Moisespa kamachisqanman hina.

¹³ Chaywanpas moqokunapi kaq llapallan llaqtakunataqa manam kañarqakuchu aswanqa Hazor llaqtallatam.

¹⁴ Chay llaqtakunamantam qechurqaku llapa kapuqninkuta chaynataq animalninkutapas. Llapallan runakunatam ichaqa wañurachirqaku espadawan mana chullallatapas puchuspa.

Moisespa kamachisqanta Josuey cumplisqanmanta

¹⁵ Tayta Diospa kamachisqanta hinam Moisespas kamachirqa Josueyman. Chaymi Josueypas chaynata rurarqa Tayta Diospa Moisesman lliw kamachisqankunata cumplispan.

¹⁶ Josueymá dueñochakurqa llapa chay allpata, orqokunata, llapallan Neguev lawta, Gosen law llapallan allpakunata, moqokuna lawta, Jordan Mayupa qechwanta, Israel castakuna *f**yachananpaq orqokunata chaynataq waqtankunatapas.

¹⁷ Seir lawman riq Malac Moqomantapunim Hermon Orqopa uraynin Libano law pampapi Baal-gad llaqtakama Josuey vencerurqa hinaspam llapallan reyninkunatapas wañurachirqa.

¹⁸ Unay tiempom Josuey karqa guerrapi chay llapallan reykunawan.

¹⁹ Manam karqachu Israelpa mirayninkunawan hawkalla kanankupaq contrato ruraq llaqta, aswanqa Gabaon llaqtapi *f**yachaq Hiv casta runakunallam. Llapallan chay llaqtakunatamá guerrapi peleaspa vencerurqaku.

²⁰ Kikin Tayta Diosmi chay runakunapa sonqonta rumiyarachirqa chaynapi Israel castapa contranpi peleaspanku mana llakipayasqa kanankupaq chaynataq chinkachisqa kanankupaq. Chinkachisqamá karqaku Moisesman Tayta Diospa kamachisqanpi hina.

²¹ Chay tiempopitaqmi Josueyqa rispan wañurachirqa orqokunapi *f**yachaq Anac casta runakunata otaq Hebron llaqtapi kaqkunata, Debir llaqtapi kaqkunata, Anab llaqtapi kaqkunata, Juda casta runakunapa *f**yachanan orqokunapi kaqkunata chaynataq Israel casta runakunapa yachanan orqokunapi kaqkunatapas. Josueymá chinkarachirqa paykunatapas chaynataq llaqtankutapas.

²² Israelpa mirayninkunapa yachanan allpapiqa Anac casta runakunamantaqa manam puchurqachu mayqanpas aswanqa puchurqa Gaza llaqtapi, Gat llaqtapi chaynataq Asdod llaqtapi kaqkunallañam.

²³ Josueymá dueñochakururqa llapallan allpata Moisesman Tayta Diospa nisqanpi hina. Chay allpatam Israel castakunaman herenciata hina partirqa, sapa ayllumanmi tupaqninta qorqa. Chay tiempomantam manaña guerra karqachu chay allpapi.