Jonás 4 - Quechua Ayacucho Bible 1987

Jonaspa piñakurusqanmanta

¹ Ichaqa Jonastaqa manapunim gustarqachu Tayta Diospa imam rurasqanqa chaymi paypa contranpi piñakuruspan

² mañakuyninpi kaynata nirqa: —Dios Taytalláy, kay pasananmantaqariki nirqaniñam llaqtaypiraq kachkaspay. Chayraykum ñoqaqa manaraq kaykuna pasakuchkaptin Tarsis lawman ayqekuyta munarqani. Ñoqaqariki yacharqanim llakipayakuq hinaspa kuyapayakuq Dios kasqaykita. Qamqa anaq piñakuq kaspaykim hatun kuyapayakuynikipi chay castigo ruranaykitaqa manaña rurankichu.

³ Chaynaqa Dios Taytalláy, wañurachiwayñayá, wañukuyniyñam allinqa kanman kawsanaymantaqa —nispa.

⁴ Hinaptinmi Tayta Dios nirqa: —¿Allintachum rurachkanki chaynata piñakuspaykiqa? —nispa.

⁵ Chaymi Jonasqa llaqtamanta lloqsiruspan intipa qespimunan lawpiña karqa. Chaypim payqa huk ramadata rurakururqa hinaspam chaypa llantuyninpi tiyaykurqa llaqtataqa imam pasarunanta qawananpaq.

⁶ Tayta Diosmi wiñarachirqa higuerilla plantata chaynapi umallantapas Jonasta llantuykunanpaq hinaspa mana allin kasqanmanta allinyaykunanpaq. Jonasmi llumpay kusisqallaña karqa chay plantawan.

⁷ Ichaqa paqarin punchaw achikyamuqman utuskuru uruwan Tayta Dios chay plantata kachurachiptinmi chakirurqa.

⁸ Inti qespiramuptinmi chunniq lawmanta rupaq wayrata Dios rikurirachimurqa chaymi Jonaspa umanta rupaptin yuyayninpas chinkaruchkarqaña, wañukuyllataña munaspam kaynata nirqa: —Wañukuyniyñam allinqa kanman kawsanaymantaqa —nispa.

⁹ Diosñataqmi nirqa: —¿Allintachum rurachkanki higuerilla plantamanta llumpayllataña piñakuruspaykiqa? —nispa. Hinaptinmi Jonasñataq nirqa: —Arí, ñoqaqa allintam rurachkani. Ñoqaqa rabiamantam wañuruchkaniña —nispa.

¹⁰ Hinaptinmi Tayta Diosñataq payta nirqa: —Qamqa chay higuerilla plantamantam llakikurqanki. Chay planta wiñananpaqqa manam llamkarqankichu, manataqmi qamqa wiñachirqankichu. Chay plantaqa huk tutallapi wiñaramuspam huk tutallapitaq chinkarurqa.

¹¹ Hinaptinqa ¿manachum llakipayariyman Ninive hatun llaqtapi *f**yachaqkunataqa? Chaypiqariki kachkan pachak iskay chunkan waranqa masnin mana yuyayniyoq runakunam, chaypiqa kachkantaqmi nana-nanaq animalkunapas —nispa.