Jonás 2 - Quechua Ayacucho Bible 1987

Jonaspa mañakusqanmanta

¹ Challwapa ukunpiraq kachkaspanmi yupaychasqan Tayta Diosta Jonas mañakurqa

² kaynata nispa: Dios Taytalláy, sasachakuypi kaspaymi qayakamurqayki hinaptinmi qamñataq contestaykuwarqanki.

³ Qamqa ukullay-uku lamar qochapa chawpinmanmi wischuykuwarqanki. Ñoqataqa mayukunaraqmi muyuykuwarqa. Orqochakuq llapallan olaykikunam ñoqapa hawaytaraq pasawarqa.

⁴ Qayllaykimanta wischuruwasqaykitam piensarqani ñoqaqa. Chaywanpas huktawanraqmi qawaykusaq sapaqchakusqayki temploykitaqa.

⁵ Yakukunam pasaypaqta wankuykuwarqa. Uku-uku yakukunam muyuriykuwarqa. Qocha yuyukunam umayman wankukururqa.

⁶ Ñoqam wichiykurqani orqokunapa cimientonkunakamaraq. Ñoqam wichiykurqani wiñaypaq preso kanay allpakamaraq. Yupaychasqay Dios Taytalláy, wañuypa patanmantañam salvaykuwarqanki.

⁷ Dios Taytalláy, wañunayachkaspayñam yuyarimurqayki. Mañakusqaymi sapaqchakusqayki temploykiman chayaykamusurqanki.

⁸ Taytacha-mamachakunata adoraqkunaqa kuyapayakuynikimantam karunchakurunkuña.

⁹ Ñoqam ichaqa qanman graciasta qospay wañuchipusqayki animalkunataña. Cumplisaqpunim prometekusqaytaqa. Dios Taytalláy, qamllam salvanki runakunataqa.

¹⁰ Chaynapim Tayta Dios challwata kamachirqa lamar qochapa patanman Jonasta wischurunanpaq.