Joel 2 - Quechua Ayacucho Bible 1987

¹ Tayta Diosmi nin kaynata: Sion Moqopiyá cornetata tocaychik. Sapaqchakusqay Moqopiyá guerrapaq cornetata tocaychik. Kay nacionpi llapallan *f**yachaqkunayá katkatataychik. Ñoqa Tayta Diospa castiganay punchawqa chayaykamuchkanñam. Ñoqa Tayta Diospa castiganay punchawqa hichpaykamuchkanñam.

² Chay punchawqa kanqa yanay-yanay tutaykuchkaq punchawmi. Chay punchawqa kanqa yanay-yanay puyukunapa kanan punchawmi. Imaynam achikyamuqta achkiy mastarikun sumaqllataña, chaynam kallpasapa tropakuna mastarikamunqa achkallaña. Chayna tropakunaqa manam karqachu. Chaynaqa manam yapatawanqa kanqachu.

Aqarway urukuna rikuriramusqanmanta

³ Paykunapa ñawpaqninta riq ninam Tukuy imata ruparunqa. Paykunapa qepanta riq lenguachkaq ninam tukuy imata kañarunqa. Paykunapa ñawpaqninpi kaqkunaqa kanqa Eden huertapi kaqkuna hinam. Paykunapa qepanpi puchuqkunaqa kanqa purmachisqa chunniq hinam. Manam imapas puchunqachu paykunamantaqa.

⁴ Chay aqarwaykunaqa rikchakun caballokunamanraqmi otaq caballopi kallpachkaq runamanraqmi.

⁵ Orqokunata pawaptinpas uyarikun carretakunapa bulla rurasqan hinaraqmi. Orqokunata pawaptinpas uyarikun rastrojo rupachkaq nina hinaraqmi. Paykunaqa rikchakun guerrapaq alistakuq kallpasapa tropakunamanraqmi.

⁶ Runakunapas chay urukunata qawarispaqa manchakuymantam qewipakunku. Llapa runakunapa uyanpas manchakuymantam ayayarunku.

⁷ Chay urukunaqa valeroso soldadokuna hinaraqmi kallpanqaku. Guerrapaq tropakuna hinaraqmi perqatapas seqarunqaku. Sapakamam rinqaku maynin ñanninkuta. Mana muyurispam rinqaku maynin purinanta.

⁸ Chay urukunaqa riqmasinwanqa manam ñitinakunqachu. Sapakamam maymi rinanta rinqaku paykunaqa. Flechakunapa chawpinpim peleankupas paykunaqa. Suyullaña risqankumantaqa manam karuchakunkuchu.

⁹ Paykunaqa kaynaman-waknamanmi llaqtapipas kallpakachanku. Paykunaqa murallakunatapas apurawmanmi seqarunku. Wasikunatapas seqaruspam suwa hinaraq ventananta yaykurunku.

¹⁰ Ñawpaqninpiqa kay pachapas katkatatanraqmi. Ñawpaqninpiqa cielokunapas kuyukachanraqmi. Tutayarunqañam inti-killapas. Manañam kanchinqachu lucerokunapas.

¹¹ Tropankunapa ñawpaqninpim rayo hinaraq qaparimun Tayta Diosqa. Kallpasapallañam kanku paypa kamachisqanta ruraqkunaqa. ¡Mayna hatunmi Tayta Diospa castiganan punchawqa! ¡Mayna manchakuypaqmi Tayta Diospa castiganan punchawqa! ¿Pitaq aguantayta atinman chay punchawpiqa?

Tayta Diospa llakipayakuyninmanta

¹² Tayta Diosmi nin kaynata: Qamkunaqa tukuy sonqoykichikwanyá kutirikamuwaychik. Qamkunaqa ayunowan, waqaywan hinaspa qapariywanyá kutirikamuwaychik.

¹³ Qamkunaqa sonqoykichiktayá llikiparuychik. Amayá pachaykichiktachu llikiparuychikqa. Yupaychasqanchik Tayta Diosmanyá kutirikuychikqa. Payqa kuyapayakuspa llakipayakuqllañamiki. Payqa anaqta piñakuspa llumpay kuyapayakuqllañamiki. Payqa castigaruspanpas llakipayakuykuqmiki.

¹⁴ Ichapas kutirimuspan llakipayaykusunkichikman. Ichapas payqa kawsaykunawan bendeciykusunkichikman. Ichapas vinokunawanraq bendeciykusunkichikman. Chaynapichiki chay ofrendakunaqa yupaychasqanchik Tayta Diospaq kanman.

¹⁵ Sión Moqopiyá cornetata tocaychik. Qamkunaqa ayunotayá ruraychik. Qamkunaqa runakunatayá huñumuychik.

¹⁶ Qamkunaqa paykunata huñuramuspayá Diospaq sapaqchaychik. Yuyaqkunatapas ñuñuq wawakunatawanyá huñuramuychik. Noviopas wasinmantayá lloqsimuchun. Noviapas puñunanmantayá lloqsimuchun.

¹⁷ Tayta Dios serviq sacerdotekunapas templomanta altarman riqpa chawpinpiyá waqachunku. Paykunaqa waqaspankum kaynata ninqaku: Dios Taytallayku, qamqa pampachaykullawaykuyá runallaykikunataqa. Asipayasqa kanankupaqqa amayá kachaykuychu qampa kaqkunataqa. Amayá watuchimanta hinachu paykunamantaqa rimakuchunku nacionkunapipas. ¿Imanasqataq nacionkunapiqa tapukunqaku: “¿Maypitaq kachkan Diosninkuqa?” nispapas?

¹⁸ Tayta Diosqa nacionninmantam sientinqa. Tayta Diosqa runankunamantam llakiparikunqa.

¹⁹ Tayta Diosmi runankunamanta llakipayarikunqa. Paykunata uyariykuspanmi kaynata nimunqa: Qamkunamanmi trigotapas, vinotapas hinaspa aceitetapas apachimuchkaykichik. Saksanaykichikkama mikunaykichikpaqmi chaykunataqa apachimuchkaykichik. Harkakuruptiymi runakunapa mana asipayasqanña kankichik.

²⁰ Norte lawmanta hamuq aqarway urukunatapas karumanñam qarqorusaq. Chay urukunataqa chunniqmanñam qarqorusaq. Chay urukunapa puntan riqtapas Kachi Qochapim heqeparachisaq. Chay urukunapa qepan hamuqtapas Mediterraneo Lamar Qochapim qeqeparachisaq. Chay urukunaqa ismuruspam asnarirunqa. Chayna hatun kaqkunatam payqa rurarurqa.

²¹ Allpapi *f**yachaqkuna, ama manchakuspayá kusikuychik. Qamkunaqa anchallatañayá kusikuychik. Chayna hatun kaqkunatam Tayta Diosqa rurarurqa.

²² Purun animalkuna, amayá manchakuychikchu. Chunniqpi pastokunaqa ikllirimuchkanñam. Llapa sachakunapas rururimuchkanñam. Higos sachakunawan uvas plantakunapas rururimuchkan sumaqllatañam.

²³ Sion Moqopi *f**yachaqkuna, qamkunapas kusikuychikyá, kusikuychikqa yupaychasqanchik Tayta Diospiyá. Payqariki puntamuq paratapas tiempollanpim qoykusunkichik. Puntamuq paratapas hinaspa qepamuq paratapas ñawpaq hinam qoykusunkichik.

²⁴ Erakunapas kawsaykunawan huntallañam kanqa. Vino hinaspa aceite waqaychanapas huntallañam kanqa.

²⁵ Ñoqam kutichipusqaykichik hatun aqarway urukunapa mikurusqantapas. Ñoqam kutichipusqaykichik huk rikchaq aqarway urukunapa mikurusqantapas. Chaynataq chikripa hinaspa puyu hinaña aqarway urupa mikusqantapas. Paykunaqariki karqa contraykichikpi tropaykuna hinaraqmi. Paykunaqariki karqa kachamusqay soldadoykuna hinaraqmi.

²⁶ Qamkunaqa saksanaykichikkamam mikuytapas mikukunkichik. Hinaspam yupaychasqaykichik ñoqa Tayta Diostaña alabawankichik. Ñoqaqariki admirakuypaq kaqkunatam rurapurqaykichik. Runaykunaqa manañam haykapipas penqaypiñachu kankichik.

²⁷ Chaynapim yachankichik Israel nacionpa chawpinpi kasqayta. Chaynapim yachankichik yupaychasqaykichik Tayta Dios kasqayta. Ñoqa hina Diosqa manapuni kasqantam qamkunaqa yachankichik. Runaykunaqa manañam haykapipas penqaypiñachu kankichik.

Chuya Espiritupa hamunanmanta

²⁸ Kaykunapa qepantañataqmi chaqchurimuq hina lliw runakunaman kachamusaq Espirituyta. Chaymi qari churikichikpas, warmi churikichikpas willakunqaku paykunaman nisqayta. Qamkunamanta kaq yuyaqkunapas mosqoy qosqaykunatam mosqonqaku. Qamkunamanta kaq mozokunapas revelasqaykunatam rikunqaku.

²⁹ Chay punchawkunapim Espirituyta kachamusaq. Servientekunamanwan sirvientakunamanmi kachamusaq.

³⁰ Cielokunapipas admirakuypaq kaqkunatam rurasaq. Kay pachapipas admirakuypaq kaqkunatam rurasaq. Qawachisqaykichikmi yawartawan ninata hinaspa suyullaña hoqarikuq qosnita.

³¹ Manaraq Tayta Diospa hatun castiganan punchawnin chayamuchkaptinqa manaraq Tayta Diospa manchakuypaq punchawnin chayamuchkaptinqa, intipas tuta hinam yanayarunqa. Killapas yawar hinam pukayarunqa.

³² Ichaqa “Dios Taytalláy” nispa mañakuwaqniytam ñoqaqa salvaykusaq. Ñoqa Tayta Diospa prometekusqayman hinam Sion Moqopi salvaykusaq. Ñoqa Tayta Diospa prometekusqayman hinam Jerusalen llaqtapi salvaykusaq. Qayasqaykunamanta puchuqkunatam Ñoqa Tayta Diosqa salvaykusaq.