Joel 1 - Quechua Ayacucho Bible 1987

Cosechakunata Aqarway urukuna tukusqanmanta

¹ Petuelpa churin Joelwanmi Tayta Dios kaynata nichirqa:

² ¡Kaytayá uyariychik ancianokuna! ¡Atiendeychikyá nacionpi llapallan *f**yachaqkuna! ¿Kaynaqa pasarqachu tiempoykichikpi otaq abueloykichikkunapa tiemponpi?

³ Qamkunaqa willaychikyá churikichikkunaman. Paykunañataqyá willachunku churinkunaman. Paykunapas willachunkutaqyá hamuq miraykunaman.

⁴ Puyu hinaña aqarwaypa puchusqantam mikururqa mana raprayoq aqarwaykuna. Mana raprayoq aqarwaykunapa puchusqantam mikururqa chikrikuna. Chikrikunapa puchusqantañataqmi mikururqa wakin aqarwaykuna.

⁵ Sinkakuna, rikchaspayá waqaychik. Vino upyaqkuna lliwyá qapariychik. Manaña upyanaykichikpaq kaptinyá qapariychik.

⁶ Mana yupay atina tropakuna hinam aqarwaykuna nacionniyta atacaramun. Leonpa kirunwan kachuruchkaq hinam plantaykunata mikuramun. China leon waqonwan kachuruchkaq hinam plantaykunata tukuramun.

⁷ Paykunaqa uvas plantallaytapas pasaypaqtam purmarachinku. Paykunaqa higos sachallaykunatapas pasaypaqmi pakiparunku. Kallmankunatapas qalaturuspam pampamanraq wischuykunkupas. Yuraqllatañam rikurirachinku kallmachankunatapas.

⁸ Wañukuq qosanmanta waqachkaq hinayá qaparkachaychik. Sipasllaraq viuda lutokuchkaq hinayá qaparkachaychik.

⁹ Tayta Diospa templonpiqa manam kanñachu kawsaykunamanta ofrendakunapas. Tayta Diospa templonpiqa manam kanñachu ofrecenapaq vinopas. Waqayllapiñam kachkanku Tayta Diospa serviqnin sacerdotekunapas.

¹⁰ Chakrakunapas purmasqañam kallachkanku. Allpakunapas lutoyoq hinañam kallachkanku. Chaynaqa kachkanku kawsaykunapas purmachisqa kasqanraykum. Chaynaqa kachkanku vinopas chakirusqanraykum. Chaynaqa kachkanku aceitepas pisirusqanraykum.

¹¹ Chakrapi llamkaqkuna, qamkunaqa muspaypi hinañayá rikuriruychik. Uvas plantawan llamkaqkuna, qamkunaqa waqapakuypaqyá-waqapakuychik. Trigomanta cebadamantayá waqayllapiña kaychik. Chinkaruq cosechamantayá chaynataqa waqaychik.

¹² Uvas plantapas aceitunas sachapiwanmi chakirunña. Granada sachapas palmera sachapiwanmi qawirunña. Manzana sachapas chakrakunapi lliw sachapiwanmi chakirunña. Chaynatam llapallan runakunapa kusikuyninpas chinkarunña.

¹³ Sacerdotekuna, qamkunaqa luto pachawanyá churakuychik. Qamkunaqa qapariyllawanñayá waqaychik. Altarpi servikuqkuna, qamkunaqa llakikuymantayá qaparkachaychik. Diosniypa serviqninkuna, qamkunaqa hamuspayá luto pachantin puñuychik. Diosnikichikpa templonpiqa manam kanñachu kawsay ofrendakunapas. Diosnikichikpa templonpiqa manam kanñachu vino ofrendakunapas.

¹⁴ Qamkunaqa ayunotayá ruraychik. Qamkunaqa runakunatayá huñuychik. Yupaychasqanchik Tayta Diospa templonmanyá huñumuychik ancianokunata. Yupaychasqanchik Tayta Diospa templonmanyá huñumuychik kay nacionpi llapallan *f**yachaqkunata. Qamkunaqa Tayta Diostayá qayakuychik allinneqta.

¹⁵ ¡Achachalláw imaraq pasakunqa chay punchawpiqa! Chayaykamuchkanñam Tayta Diospa castiganan punchawqa. Chayaykamuchkanñam Tukuy Atiyniyoq Diospa puchukachiyninqa.

¹⁶ Qawachkaptinchikmi mikusqanchiktapas qechuruwarqanchik. Diosninchikpa templonpi kusikuypas pasaypaqñam chinkarapuwanchik.

¹⁷ Muhukunapas kurpa ukupim mana valeqña kachkan. Kawsay waqaychana wasikunapas tuñichisqañam kachkan. Taqekunapas lliki-llikillam kachkan. Muhukunapas mana valeqña kasqanraykum chaynaqa kachkan.

¹⁸ Mikunankupaq mana kaptinmi animalkunapas waqachkanku. Bueyeskunapas muspaypi hinañam purillachkanku. Ovejakunapas yarqaymantam ñakarillachkanku.

¹⁹ Dios Taytalláy, qamllatam qayakamullayki. Chunniqpi pastokunatapas nina ruparusqanraykum qamtaqa qayakamullayki. Chakrakunapi sachakunatapas lenguachkaq nina ruparusqanraykum qamtaqa qayakamullayki.

²⁰ Chakrakunapi animalkunapas qaparkachaspam qamta qayakusunki. Wayqokunapi yakukunapas chakirusqanraykum animalkunaqa qayakamusunki. Chunniqpi pastokunatapas nina ruparusqanraykum animalkunaqa qayakamusunki.