Jeremías 9 - Quechua Ayacucho Bible 1987

¹ Amalaya ñawiykuna kallpaq yaku hina rikurirunman. Amalaya ñawiykuna toqyaq pukyu hina rikurirunman chaynapi tuta punchaw waqanaypaq, llaqtamasiykunapa wañusqanmanta waqanaypaq.

² Amalaya chunniqpi samakuna wasi karapuwanman. Chayna kaptinqa llaqtamasiykunamanta ayqekuspach pasakuyman. Llapallankum chuchumika warmi hinaña rikurirunku. Llapallankum traicionaq runakunaña rikurirunku.

³ Tayta Diosmi nin: Flechachkaq hinaraqmi listolla kachkanku llullata rimanankupaq. Enteron nacionpim chaylla kachkanku engañollata rimanankupaq. Aswan-aswan mana allinkuna ruraymanmi qokurunku. Paykunaqa manam reqsirqakuchu.

⁴ Amistadnikichikpipas amañayá confiakuychikchu. Wawqekichikpipas amaña confiakuychikchu. Wawqepurallam engañanakunku. Amistadpurallam cargochanakunku.

⁵ Manam mayqenpas runamasinta respetanchu. Manam pipas cheqap kaqtaqa rimanchu. Llullakuyllamanmi costumbrakurunku. Yanqa rimayllamanmi costumbrakurunku. Kikinkumanta wanakuytaqa manam atinkuchu.

⁶ Tayta Diosmi nin: Paykunaqa chaylla-chayllam ñakarichinakunku. Paykunaqa chaylla-chayllam engañanakunku. Paykunaqa manañam reqsiwayta munankuchu.

⁷ Llapallan Kamachiq Tayta Diosmi nini: Rurasqaymanta mastaqa ¿imataraqtaq runaykunawan rurasaq? Qorita ninapi chulluchichkaq hinaraqmi paykunataqa chuyanchasaq.

⁸ Wañuchiq flecha hinaraqmi engañaspa rimayninkuqa. Amistadninkuta respetowan rimaykuspapas wichirachiyllatam munachkanku paykunaqa.

⁹ Ñoqa Tayta Diosmi nini: Chayna rurasqankumantaqa ¿manachum paykunata castigasaq? Chayna rurasqankumantaqa ¿manachum paykunata vengakusaq?

¹⁰ Llakisqallañam waqasaq orqokunamanta. Llakiypaqmi-llakikusaq chunniqpi pastokunamanta. Pastokunaqa kañasqañam chayninta runapas manaña purinanpaq. Pastokunaqa kañasqañam animalkunapa qapariyninpas manaña uyarikunanpaq. Pawaq animalkunam lluptikunku. Purun animalkunam ayqekunku.

¹¹ Tayta Diosmi nin: Jerusalen llaqtatam tuñichisaq ruminkunapas montorayananpaq. Jerusalen llaqtatam tuñichisaq atoqkunaña chaypi *f**yachananpaq. Juda nacion llaqtakunatam chunnichisaq manaña runayoq kananpaq.

¹² Ñoqam nirqani: —¿Pitaq yachaysapa runa kanman kaykunata entiendenanpaq? ¿Pimantaq Tayta Dios chaykunata rimapayarqa wakinkunamanpas willakunanpaq? ¿Imanasqataq kay nacionqa purmachisqa hinaspa kañasqa kachkan chunniqninta hina manaña pipas purinanpaqqa? —nispa.

¹³ Tayta Diosñataqmi niwarqa: —Tukuy kaykunaqa pasarqa qosqay yachachikuykunata saqerusqankuraykum chaynataq nisqaykunata mana kasukuspanku chaykunaman hina mana kawsasqankuraykum.

¹⁴ Paykunaqa rumi sonqo kayninkuman hina kawsaspankum abuelonkupa yachachisqanman hina Baal sutiyoq taytachakunata qatirqaku.

¹⁵ Chayraykum Israelpa yupaychasqan Llapallan Kamachiq Tayta Dios nini: Kay runakunataqa qatqe mikuyta mikuchichkaq hinam hinaspa venenoyoq yakuta tomachichkaq hinam ñakarichisaq.

¹⁶ Abuelonkupapas nitaq kikinkupapas mana reqsisqanku nacionkunamanmi cheqerachisaq. Guerrapi peleaptinkupas qatikachachisaq manaña chullapas puchunankamam, nispa.

Jerusalen llaqtapi kaqkuna waqasqankumanta

¹⁷ Llapallan Kamachiq Tayta Diosmi nin: Yaw runakuna, sumaqtayá yuyaymanaychik, nispa. Aya taki yachaq warmikunatayá qayachimuychik, nispa.

¹⁸ Chaypunillayá hamuchunku ñoqanchikmanta waqanankupaq. Chaypunillayá hamuchunku ñawinchikpa weqenta kacharinankupaq. Chaypunillayá hamuchunku qechipranchikmanta sutuchinankupaq.

¹⁹ Sion Moqo llaqtamantam uyarikamuchkan. Qapariyllawanña waqasqankum uyarikamuchkan. Pasaypaq tuñichisqam puchurunchik. Hatun penqaypim saqeruwanchik. Nacionninchiktaqa saqerusunchikñam. Wasinchikkunataqa tuñirachinkuñam.

²⁰ Yaw warmikuna, Tayta Diospa palabrantayá uyariychik. Paypa nisqankunatayá chaskiychik. Warmi wawaykichiktayá waqanankupaq yachachiychik kaynata. Warmimasikichikkunatayá aya takita yachachiychik kaynata:

²¹ “Wañuchiqmi ventananta yaykuramun. Wañuchiqmi palacionchikmanpas yaykuramun callekunapi warmachakunata wañurachinanpaq, plazakunapi mozokunata wañurachinanpaq.”

²² Nimuyá ñoqa Tayta Diospa kayna nisqayta: “Wañuqkunapa ayanmi chakrakunapi wischurayachkan. Chakrakunapim wanu hina wischurayachkan. Rutuqkunapa qepanpi gamillakuna hinaraqmi wischurayachkan.”

²³ Tayta Diosmi nin kaynata: Yachaysapa runaqa amayá alabakuchunchu yachaysapa kasqanmantaqa. Valeroso runaqa amayá alabakuchunchu valeroso kasqanmantaqa. Apu runapas amataqyá alabakuchunchu apu kasqanmantaqa.

²⁴ Pipas alabakuyta munaspaqa alabakuchun ñoqata reqsiwasqanmantayá. Pipas alabakuyta munaspaqa alabakuchun ñoqa Tayta Dios kasqaymantayá. Yachachunyá kay pachapi kuyapayakuywan ruraq kasqayta. Yachachunyá kay pachapi allin arreglo ruraq kasqayta. Yachachunyá kay pachapi tukuy allinlla ruraq kasqayta. Chaykuna rurasqaymi agradawan ñoqata. Ñoqa Tayta Diosmi nini chaynata.

²⁵ Tayta Diosmi nin: —Hamuchkanmi tiempokuna cuerponkupi señalasqa llapa runakunata castiganaypaq.

²⁶ Castigasaqmi Egipto nacionpi, Juda nacionpi chaynataq Edom nacionpi *f**yachaqkunataqa. Castigasaqtaqmi Amonpa miraynintapas, Moab nacionpi yachaqkunatapas chaynataq diosninkupaq chukchankuta rutukuq chunniqpi yachaqkunatapas. Tukuy chay nacionkunapi *f**yachaqkunaqa kachkanku mana señalasqa runakunam. Israel castakunapas mana señalasqa runakuna hinam kachkanku sonqonkupi mana kasukuq runakuna.