Jeremías 8 - Quechua Ayacucho Bible 1987

¹ Tayta Diosmi kaynata nin: —Chay tiempopim sepulturankumanta horqonqaku Juda nacion reykunapa tullunta, kamachikuqkunapa tullunta, sacerdotekunapa tullunta, ñoqamanta willakuqkunapa tullunta chaynataq Jerusalen llaqtapi *f**yachaq runakunapa tulluntapas.

² Chay tullukunam maqchipasqa kanqa intiman, killaman chaynataq llapallan lucerokunaman. Chaykunatam paykunaqa kuyaspallaña servirqaku, qatirqaku, tapupayarqaku hinaspa adorarqaku. Chay tullukunata pampanankupaq manaña pipas huñuptinmi wanu hinaña pampapi kanqa.

³ Llapallan Kamachiq Tayta Diosmi nini: Kay mana allin casta runakunamanta puchuq runakunata qarqoruptiymi maypi kaspapas munanqaku wañuyllataña.

Huchankurayku castigasqa kanankumanta

⁴ —Yaw Jeremias, ñoqa Tayta Diospa parteymantayá paykunaman kaynata nimuy: “Pipas urmaruspanqa sayarirunpunim. Pipas karuncharuspanqa kutirinpunim.

⁵ Chaynaqa Israel casta runakuna ¿imanasqataq ñoqamantaqa karunchakurunkichik? ¿Imanasqataq sapa kutilla karunchakuwankichik? Engañawaytam mana dejayta munankichikchu. Kutirikamuwaytam mana munankichikchu.

⁶ Uyarisqayman hinaqa manam pipas wanakurqachu. Mana allin rurasqankumantam mana wanakurqakuchu. ‘¿Imatataq chaytaqa ruraruni?’ nispallapas manam nirqakuchu. Llapallankum pantay kawsayman kutirunku. Guerrapi kallpaq caballo hinaraqmi pantay kawsayman kallpanku.

⁷ Alton pawaq cigueñapas yachanmi haykapim kutimuyta. Kullkupas, wayanakuypas, chiwakupas yachanmi huklawman astakunanku tiempota. Runaykunam ichaqa mana yachankuchu ñoqa Tayta Diospa reglamentoykunata.

⁸ ¿Imanasqataq niwaqchik: “Yachaysapam kaniku” nispaqa? Qamkunaqa ¿imanasqataq niwaqchik: “Tayta Diospa yachachikuynintam hatalliniku” nispaqa? Qellqaqkunaqa llullakunatam qellqachkanku. Llullakuspankum yachachikuyniykunata qellqachkanku.

⁹ Yachaysapakunam penqayman churasqa kanqaku. Toqllapa hapisqan animal hinam sonsoyachisqa kanqaku. Manam kasukurqakuchu palabraytaqa. ¿Maypitaq kachkan yachaysapa kayninkuqa?

¹⁰ Chayraykum sapaq runakunamanña warminkutapas qoykusaq. Paykunapa chakrantapas sapaq dueñomanñam qoykusaq. Apuyayllamanñam qokurunku warmakunapas. Apuyayllamanñam qokurunku yuyayniyoqkunapas. Engañakuqllañam rikurirun ñoqamanta willakuqkunapas. Engañakuqllañam rikurirun sacerdotekunapas.

¹¹ Runaykunapa heridantam mana kaqpaq hina hapinku. Manaña hawkayay kachkaptinpas: “Hawkallam kakusunchik” nispam ninku.

¹² Millakusqaykunata rurasqankumantaqa penqakunanku kachkaptinpas manam penqakunkuchu. Penqakuytaqa manam yachankuchu. Chayraykum ñoqa Tayta Dios nini: Paykunata castigasqay tiempopim wichinqaku. Wañuchisqakunawan kuskam wañusqa wichinqaku.

¹³ Tayta Diosmi nin: Pasaypaqtam paykunata chinkarachisaq. Chulla uvaspas manam kallmanpi puchunqachu. Higospas manam sachanpi puchunqachu. Rapinkunatapas pasaypaqtam chakirachisaq. Paykunaman qosqaykunatam qechuchisaq.

¹⁴ Runakunam ninqaku: ¿Imapaqtaq kaypiqa yachachkanchik? Huñunakuruspanchikyá murallasqa llaqtakunaman pasakusunchik. Chaypiyá hukllataña wañumusunchik. Yupaychasqanchik Tayta Diosmi wañuchiwasunchik. Venenasqa yakutam tomachiwarqanchik. Contranpi huchallikusqanchikraykum wañuchiwasunchik.

¹⁵ Hawka kawsakuytam suyarqanchik ichaqa mana allinllam hamuwarqanchik. Sanoyananchikpaq tiempotam suyarqanchik ichaqa muspaypi hinam rikurirurqanchik.

¹⁶ Dan castapa allpan lawmantaraqmi caballonkupa samatyasqanpas uyarikuchkan. Potronkupa weqeqeqeyninwanmi allpakunapas katkatatachkan. Kay nacion tuñichiqmi hamuchkanku. Tukuy imanpas chinkachiqmi hamuchkanku. Llaqtata tuñichiqmi hamuchkanku. Chaypi *f**yachaqkunata wañuchiqmi hamuchkanku.

¹⁷ Tayta Diosmi nin: Contraykichikpim kachamusaq venenoyoq culebrata. Manam pipas atinqachu chaykuna mansoyachiyta. Chaykunam kachusunkichik qamkunata.

Llaqtamasinkunarayku Jeremiaspa waqasqanmanta

¹⁸ Llakisqa uyayoqmi kachkani. Ukuypipas hukmanyasqam kachkani.

¹⁹ Llaqtamasiykunapa qaparisqanmi uyarikuchkan, karumantaraqmi waqasqanku uyarikuchkan: ¿Tayta Diosqa manañachum Sion Moqo llaqtapi kachkan? ¿Reyninchikqa manañachu chaypi kachkan? nispa. Tayta Diosmi contestan: ¿Imanasqataq piñachiwarqankichik taytachakunata adoraspaykichik? ¿Imanasqataq piñachiwarqankichik huklaw nacionmanta kaq yanqakunata adoraspaykichik?

²⁰ Cosecha tiempoqa pasarunñam, ñoqanchikñataqmi manaraq salvasqa kachkanchik. Usyay tiempoqa pasarunñam ñoqanchikñataqmi manaraq salvasqa kachkanchik.

²¹ Llaqtamasiykunapa ñakarisqanwanmi ñakarini. Llakikuywan hinaspa mancharikuywanmi ñakarini.

²² Galaad lawpiqa ¿manañachum balsamo hampi kanman? Hampiqpas chaypiqa ¿manañachum kanman? Llaqtamasiykunapa heridanqa ¿manachum sanoyachisqa kanman?