Jeremías 7 - Quechua Ayacucho Bible 1987

Templopi Jeremias willakusqanmanta

¹ Tayta Diosmi Jeremiasta rimapayaspan nirqa:

² —Temploypa zaguanninpi sayaykamuspayá willakamuy: “Juda nacionpi *f**yachaq runakuna, Tayta Diosta adoranapaq kay zaguanninta yaykuqkuna,

³ Israelpa yupaychasqan Llapallan Kamachiq Tayta Diospa nisqantayá uyariychik: ‘Allinta kawsaspa allinta ruraptikichikqa kay allpapim kawsachisqaykichik.

⁴ Amayá kasuychikchu: Kayqa Tayta Diospa templonmi, nispa engañakuqkunataqa.

⁵ ‘Allinta kawsaspa allinta ruraptikichikqa, pleiteanakuq runakunapaq allinta arreglaykuptikichikqa,

⁶ forasterokunata, mana piyniyoqkunata, viudakunatapas mana ñakarichiptikichikqa, inocente runata kay sitiopi mana wañuchiptikichikqa chaynataq mana allinnikichikpaq kasqanrayku taytacha-mamachakunatapas mana adoraptikichikqa

⁷ abueloykichikkunaman qosqay kay allpapim qamkunatapas wiñaypaq kawsachisqaykichik.

⁸ ‘Qamkunaqa confiakuchkankichik mana valeq llulla rimaykunapim.

⁹ Suwakuchkaspaqa, runata wañuchiskaspaqa, hukwan-hukwan kakuchkaspaqa, engañanaykichikpaq jurachkaspaqa, Baal sutiyoq taytachapaq inciensota kañapuchkaspaqa, mana reqsisqaykichik dioskunata adorachkaspaqa

¹⁰ ¿hamuwaqchikraqchu sutiywan sutichasqa kay wasiman chaynapi qayllaypi kanaykichikpaq hinaspapas niwaqchikraqchu: Libreñam kaniku, nispa? ¿Creenkichikchu chay millakuypaqkuna ruranaykichikpaq libre kasqaykichikta?

¹¹ Sutiywan sutichasqa kay wasitaqa ¿salteaqkunapa machayninpaqchu hapinkichik? Ñoqaqa chayna kasqanpaqmi qawani.

¹² Ñawpaq watakunapi *f**yachasqay Silo llaqtata rispaykichiyá yachamuychik Israel casta runaykunawanqa mana allinta rurasqankurayku imam rurasqayta.

¹³ Chayna kawsasqaykichikmanta achka kutita rimapayachkaptiypas manam kasukurqankichikchu nitaqmi contestawarqankichikpaschu. Ñoqa Tayta Diosmi chaynata nini.

¹⁴ Ñoqapaq sapaqchasqa hapipakunaykichik kay templotaqa otaq qamkunaman chaynataq abueloykichikkunamanpas qosqay templotaqa Silo llaqtata castigasqayta hinam rurasaq.

¹⁵ Castaykichik Efrainpa mirayninkuna qarqosqayta hinam qamkunatapas qayllaymanta qarqosqaykichik.’ ”

Israelpa mirayninkuna mana kasukusqankumanta

¹⁶ —Yaw Jeremias, amañayá kay runakunapaqqa mañakuwayñachu nitaq qaparispa ruegakuwayñachu nitaq hikutawayñachu. Manam uyarisqaykiñachu.

¹⁷ Juda nacion llaqtakunapi chaynataq Jerusalen llaqtapa callenkunapi rurasqankutaqa ¿manachum qawachkanki?

¹⁸ Warmakunam yantata pallamunku. Taytankupas ninatam ratachinku. Warmikunañataqmi masata ruranku Cielokunapi Reina nisqanku mamachaman tortakunata qonakupaq. Taytacha-mamachakunapaqpas vinotaraqmi tallipunku. Chaykunata ruraspankum ñoqata rabiachiwanku.

¹⁹ Ñoqa Tayta Diosmi nini: ¿Ñoqata rabiachiwanankupaqchu chayta ruranku icha kikinku penqayman churakunankupaqchu?

²⁰ Chayraykum Señor Diosnikichikpa piñakuyniyqa chaynataq anchallaña rabiakuyniyqa kay sitiopa contranpi kanqa chaynataq runakunapa, animalkunapa, sachakunapa hinaspa chakrakunapi wiñaqpa contranpipas. Mana amachay atina nina hinam rabiakuyniyqa kanqa.

²¹ Israelpa yupaychasqan Llapallan Kamachiq Tayta Diosmi nin kaynata: —Lliw kañana animal ofrendakunata chaynataq wakin ofrendakunatapas ofrecewaspaykichikyá aychantañataq mikuychik.

²² Egipto nacionmanta abueloykichikkunata horqomuspayqa rimarqanipas hinaspa kamachirqanipas manam wañuchispa ofrecewanaykichik lliw kañana animalkunallamantachu nitaq wakin ofrendakunallamantachu.

²³ Ichaqa abueloykichikunamanmi kamachirqani nisqaykunatapas kasukunankupaq chaynapi paykunapa Diosnin kanaypaq chaynataq paykunapas runaykunaña kanapaq. Kamachirqanitaqmi munasqayta hinaña kawsaspanku allin kanankupaqpas.

²⁴ Aswanqa mana uyariwaspam mana atiendewarqakuchu, mana kasukuspa rinankupas kachkaptinmi qepamanraq kutirqaku.

²⁵ Egipto nacionmanta abueloykichikkunata horqomusqaymantapunim kunankamapas mana samaykuspa kachamurqaykichik ñoqamanta willakuq serviqniykunata.

²⁶ Ichaqa manam uyariwarqankichikchu nitaqmi atiendewarqankichikchu. Rumi sonqo churakuruspaykichikmi abueloykichikkunamantapas astawan mana allinkunataraq rurarqankichik.

²⁷ —Yaw Jeremias, tukuy kaykunatam paykunaman willamunki mana kasusunayki kaptinpas. Qaparispam paykunaman nimunki mana contestasunayki kaptinpas.

²⁸ Kaynatam nimunki: “Kay nacionpi runakunaqa yupaychasqanku Tayta Diospa palabran mana kasukuq runakunam, corregisqapas mana corregikuy munaq runakunam. Cheqap rimay chinkaruptinmi manaña cheqap rimaq rikurirunku.

Jerusalen llaqtapi taytacha-mamachakunata adorasqankumanta

²⁹ Jerusalen llaqta, chukchaykitayá qamqa rutukuruy. Chaynata ruraspayá maqchiparuy. Chunniq orqokunapiyá qapariychik. Aya takitayá takiychik. Tayta Diosqa runaykikunapaqmi kachkan piñasqa. Payqa qepanchakuruspam saqerusunkichikña.

³⁰ Tayta Diosmi nin kaynata: —Judapa mirayninkunam mana gustoypaq kaqta rurarunku. Ñoqapaq sapaqchasqa templopim millakuypaq taytacha-mamachakunata churarunku, manaña asuykunaypaq hinam chay templota rurarunku.

³¹ Ben-hinom qechwapi kaq Tofet sutiyoq moqopim altarta hatarirachinku wawa-churinkuta kañanankupaq. Chaykuna ruranankutaqa manam kamachirqanichu nitaqmi piensarqanipaschu.

³² Chayraykum ñoqa Tayta Dios nini: Hamuchkanmi punchawkuna chay sitiota manaña “Tofet” nispa sutichanankupaq nitaq “Ben-hinom Qechwa” nispa sutichanankupaqpas, aswanqa “Runakuna Nakananku Qechwañam” sutin kanqa. Tofet sitiopim wañuqkunata pampanqaku manaña sitio kasqanrayku.

³³ Kay runakunapa aychantaqa mikunqa alton pawaq animalkunawan monte animalkunañam, manañam pipas chay animalkuna manchachiqqa kanqachu.

³⁴ Juda nacion llaqtakunamantawan Jerusalen llaqtapa callenkunamantam tanirachisaq kusikuymanta qapariyninkuta, asikuyninkutapas chaynataq casarakuqkunapa fiestantapas. Kay nacionqa pasaypaqtam chunnirunqa.