Jeremías 6 - Quechua Ayacucho Bible 1987

Jerusalen llaqtata enemigo atacasqanmanta

¹ Benjaminpa mirayninkuna, Jerusalen llaqtamantayá lluptiychik. Benjaminpa mirayninkuna, Tecoa llaqtapiyá cornetata tocaychik. Bet-haquerem llaqtachapiyá señalta hatarichiychik. Norte lawmantam castigo hamuchkan. Llumpa-llumpay desgraciam hamuchkan.

² Pisi kallpayoq doncellaman rikchakuq Sion Moqopi llaqtatam purmarachisaq. Sumaqllaña doncellaman rikchakuq Sion Moqopi llaqtatam purmarachisaq.

³ Michiqkunam hamunqaku Jerusalen llaqtapa contranpi. Ovejankutam churanqaku kay llaqtapa contranpi. Karpankutam sayachinqaku llaqtapa contranpi. Sapakamam ovejankuta michinqaku.

⁴ Paykunapa enemigonkum ninqaku: “Alistakuychik paykunapa contranpi peleananchikpaq. Hatariychik chawpi punchawta atacamunanchikpaq, aswanqa intipas seqaykuchkanñam. Aswanqa tutayaypas hawanchikpiñam.

⁵ Chaynaqa hatarispayá tutanña atacamusunchik. Chaynaqa hatarispayá palacionkutapas tuñichimusunchik.”

⁶ Llapallan Kamachiq Tayta Diosmi nin: Sachakunata kuchumuychik. Jerusalen murallapa qepanman allpata montomuychik. Kay llaqtaqa castigasqañam kachkan. Kay llaqtapiqa daño rurayllañam kachkan.

⁷ Imaynam chiri yakuta pozo waqaychan, chaynam Jerusalenpas mana allinllata waqaychan. Daño rurayllañam chaypiqa uyarikuchkan. Ñakarichiyllañam chaypiqa uyarikuchkan. Chaypiqa qawachkani onqoqkunallatañam. Chaypiqa qawachkani heridasqa kaqkunallatañam.

⁸ Yaw Jerusalen llaqta, qamqa corregikuyñayá. Yanqañataq piñakuspay saqeruykiman. Yaw Jerusalen llaqta, qamqa corregikuyñayá. Yanqañataq chunniqman tikraruykiman, yanqañataq manaña runayoqta rikurirachikiman.

Castigasqa kanankumanta

⁹ Llapallan kamachiq Tayta Diosmi nin: Qalay-qalay uvasta maskapachkaq hinam maskapanqaku Israel casta puchuqkunata. Uvasta cosechaq runa maskapachkaq hinayá maskapay Israel casta runakunata.

¹⁰ Chaymi ñoqa nirqani: ¿Pi uyariwananpaqtaq rimasaq? —nispa. ¿Pi uyariwananpaqtaq willakusaq? —nispa. Dios Taytalláy, paykunaqa mana uyarikuqñam kachkanku. Paykunaqa mana atiendeqñam kachkanku. Dios Taytalláy, palabraykimantapas penqakuqkunam kachkan. Manañam gustonkupaqñachu kachkan.

¹¹ Dios Taytalláy, qampa rabiakuynikiwanmi rabiasqa kachkani. Manaña aguantay atiqmi kachkani. Chaymi Tayta Dios niwarqa: Callepi warmakunamanyá maqchichkaq hina rabiakuyniymanta willakamuy. Huñunasqa mozokunamanyá maqchichkaq hina rabiakuyniymanta willakamuy. Qosakunatam warmintinta presochanqaku.

¹² Ancha yuyaq machuchakunatam presochanqaku. Wasinkupas, chakrantinmi hukpaqña kanqa. Paykunapa warminkupas hukpaqñam kanqa. Kay nacionpi yachaqkunata castigaptiymi chaynaqa kanqa.

¹³ Apuyayllamanñam qokurunku warmakunapas. Apuyayllamanñam qokurunku yuyayniyoqkunapas. Engañakuqllañam rikurirunku sacerdotekunapas.

¹⁴ Runaykunapa heridantam mana kaqpaq hina hapinku. Manaña hawkayay kachkaptinpas: “Hawkallam kakusunchik” nispam ninku.

¹⁵ Millakusqaykunata rurasqankumantaqa penqakunanku kachkaptinpas manam penqakunkuchu. Penqakuytaqa manam yachankuchu. Chayraykum ñoqa Tayta Dios nini: Paykunata castigasqay tiempopim wañunqaku. Wañuchisqakunawan kuskam wañusqa wichinqaku.

Israel castapa mana kasukusqankumanta

¹⁶ Tayta Diosmi nin runankunata: Ñankunapi sayaykuspayá qawariychik. Ñawpaq ñankunamantayá tapurikuychik. Allin ñanmantayá tapurikuychik, hinaspayá chayninta puriychik. Chaynata ruraspaqa samaytam tarinkichik. Aswanqa paykunam ninku: “Manam puriymankuchu” nispanku.

¹⁷ Tayta Diosqa nintaqmi: Churarqanim llaqta cuidaqkunata —nispa Kasukuychik cornetapa waqasqanta —nispa Ichaqa paykunam nirqaku: Manam kasukuymankuchu —nispanku.

¹⁸ Chaymi ñoqa Tayta Dios nini: Nacionkuna, uyariychik runaykunataqa imam pasananta. Testigokuna, uyariychik runaykunataqa imam pasananta.

¹⁹ Yaw allpa pacha, uyariy qampas. Testigo hina uyariy qampas. Ñoqaqa runaykunamanmi kachamusaq castigota. Mana allinkuna piensasqankumantam apachimusaq castigota. Palabraykunataqa manam atienderqakuchu. Yachachisqaykunataqa manam kasukurqakuchu.

²⁰ ¿Imanasaqtaq Saba nacionmanta apamusqaykichik inciensotaqa? ¿Imanasaqtaq karu nacionmantaraq apamusqaykichik especeriataqa? Lliwta kañapuwasqaykichik animalkunataqa manañam munanichu. Wakin ofrendakunatapas manañam munanichu.

²¹ Chayraykum ñoqa Tayta Dios nini: Mitkanankupaq trancata churaruptiymi kay runakuna urmarunqaku. Tayta-mamakunam churi-wawankuwan kuska urmarunqaku. Vecinokunam amistadninkunapiwan kuska wañunqaku.

Norte lawmanta hamuspa atacaqkunamanta

²² Tayta Diosmi kaynata nin: Norte lawmantam tropakuna hamuchkan. Karu-karu allpamantam ancha atiyniyoq nacion alistakamuchkan.

²³ Flechanankutam lanzakunatawan apamunqaku. Pasaypaq mana llakipayakuq cruel runakunam kanqaku. Lamar qocha hinaraqmi qaparinqaku. Caballokunapi sillasqam chaylla sayanqaku. Sion Moqopi llaqtapa contranpi peleanankupaqmi chaylla sayanqaku.

²⁴ Jerusalen llaqtapi runakunam ninku: Noticiatam uyariniku. Manaña kallpayoqmi kachkaniku. Wachakuq warmi hinaraqmi kachkaniku. Llakiwan hapichikuqllañam kachkaniku.

²⁵ Chakrakunamanqa amañayá lloqsiychikchu. Ñannintaqa amañayá puriychikchu. Enemigoqa ancha armasqam kachkan. Mancharikuymi tukuy hinastinpi kachkan.

²⁶ Llaqtamasillaykuna, luto pachawanyá churakuychik. Llaqtamasillaykuna, uchpapiyá qochpaychik. Piwi wawanmanta waqaq warmi hinayá qaparkachaychik. Saqueaqkunam qonqaymanta chayaramuwasunchik.

²⁷ Qamtaqa torre hina kanaykipaqmi churarqayki. Runaykunata pruebanaykipaqmi churarqayki. Paykunata reqsinaykipaqmi ñoqaqa churarqayki. Imaynam kawsasqankuta qawanaykipaqmi churarqayki.

²⁸ Paykunaqa llapallankum mana kasukuq runakuna. Paykunaqa llapallankum cuento qepi runakuna. Bronce hina pisi valeqllam paykunaqa. Fierro hina pisi valeqllam paykunaqa. Llapallankum daño ruraqlla paykunaqa.

²⁹ Metalkuna chullunanpaqmi pukutyachina. Titita chulluchinapaqmi chaynata rurana. Chaynata ruraptiypas mana allin ruraqkunaqa manam chinkanchu. Runaykuna ukumantam paykunaqa mana chinkanchu.

³⁰ Wischupakusqa qollqewanñam sutichasqa kachkanku. Ñoqa Tayta Dios wischupakusqayraykum chaynaqa kachkanku.