Jeremías 51 - Quechua Ayacucho Bible 1987

Babilonia llaqta tuñichisqa kananmanta

¹ Ñoqa Tayta Diosmi kaynata nini: Babilonia llaqtapa contranpim tuñichiq wayrata pukuchimusaq. Leb-kamai sutiyoq llaqtapa contranpim tuñichiq wayrata pukuchimusaq.

² Babilonia llaqtapa contranpim forasterokunata kachamusaq. Erapi trigo wayrachichkaq hinam runakunata wischuchisaq. Manaña pipas puchunankamam chaynata wischuchisaq. Desgracia punchawpim muyuriqninmanta atacachisaq.

³ Flechaqkunapas amayá ramankutaqa chutarichunchu. Qasqonku harkachinamantapas amayá alabakuchunkuchu. Babilonia llaqtapi mozonkunataqa ama llakipayarikuspayá wañuchiychik. Babilonia llaqtapi llapallan soldadokunataqa pasaypaqtayá chinkachiychik.

⁴ Caldea nacionpim wañusqakuna wischurayanqaku. Lanzawan tuksipasqakunam callenkunapi wischurayanqaku.

⁵ Israel nacionniyoq runakunawan Juda nacionniyoq runakunaqa Ñoqa Tayta Diospa qayllaypim nacionninkuta huchawan huntachirqa. Chaywanpas yupaychasqanku ñoqa Tayta Diosqa Israel naciontaqa manam saqerqanichu. Chaywanpas yupaychasqanku ñoqa Tayta Diosqa Juda naciontaqa manam saqerqanichu.

⁶ Babilonia llaqtamantayá vidaykichikta salvanaykichikpaq lluptiychik. Huchallikuqmasinku kaspa ama castigasqa kanaykichikpaqyá ayqeychik. Ñoqa Tayta Diospa vengakunay tiempom chayaramunña. Ñoqa Tayta Diospa pagakunay tiempom chayaramunña.

⁷ Llapallan nacionkunata machachinanpaqmi Babilonia nacionqa qorimanta vaso hina makiypi karqa. Llapallan nacionkunata sinkachinanpaqmi makiypi karqa. Chay vasomanta vinota upyaqkunam locoyarqa. Llapa nacionkunam llumpa-llumpayta locoyarqa.

⁸ Qonqaymantam wichirun Babilonia llaqtaqa. Qonqaymantam purmarun Babilonia llaqtaqa. Chay llaqtamantayá qaparkachaychik. Nanayninpaqyá balsamo hampita apamuychik, icharaqpas chay llaqtata sanoyachiwaqchik.

⁹ Rikuqkunam ninku: “Hampirqanikum Babilonia llaqtataqa ichaqa manam sanoyanchu chay llaqtaqa. Chaynaqa saqeruspayá kutikusunchik. Sapakamayá llaqtanchikman kutikusunchik. Huchanmanta castigasqa kasqanmi cielokamaraq hoqarikurun. Paypa huchanmanta castigasqa kasqanmi puyukamaraq hoqarikurun.

¹⁰ Tayta Diosmi sentenciaspa favoreceykuwanchik. Sion Moqo llaqtamanyá hakuchik. Yupaychasqanchik Diospa rurasqanmantayá willakamusunchik.”

¹¹ Tayta Diosmi Babilonia llaqtata castiganqa. Templonta tuñirachisqanraykum vengakunqa. Flechaykichiktayá alistakuychik. Harkachikuna armaykichiktayá hapiychik. Media nacionpa reyninkunatam Tayta Dios sonqochamuchkan. Babilonia llaqtata tuñichinankupaqmi Tayta Dios tanteamuchkan.

¹² Babilonia llaqtapa murallanta atacanaykichikpaqyá banderata hoqariychik. Llaqta cuidaqkunaman yapaspayá waqaychaqkunata churaychik. Yaykunanpaqyá wateqaq soldadokunata alistaychik. Tanteaspa rimasqantam Tayta Diosqa rurarun. Babilonia llaqtayoqkunapa contranpim chaynata rurarun.

¹³ Hatun mayupa patanpi *f**yachaqmi qamqa kanki. Ancha qori-qollqeyoqmi qamqa kanki. Puchukanayki tiempom chayaramunña. Engañaspa apuyaynikim tukurunña.

¹⁴ Llapallan Kamachiq ñoqa Tayta Diosmi juraspay nini: Enemigoykikunawanmi aqarway urukunawan hinaraq inturachisqayki. Paykunawanmi qampa contraykipi qayaykachachisqayki.

Tayta Diosta alabanapaq taki

¹⁵ Tayta Diosmi kay pachata rurarqa atiyninwan. Tukuy kay pachapi kaqtam takyachirqa *f**yachayninwan. Cielokunatapas mastarirqam ancha entiendeyninwan.

¹⁶ Rimariptinmi cielopi yakukuna sinchillataña qaparimun. Kay pachapa patankunamantam puyukunata hatarichimun. Paymi paramunanpaqpas llipyachimun. Waqaychasqanmantam wayrakunatapas horqomun.

¹⁷ Llapallan runakunam asno hinaña rikurirunku. Llapallan runakunam mana *f**yachayniyoqña rikurirunku. Taytacha-mamacha ruraqkunam penqarikunku. Metal chulluchisqanmantam penqarikunku. Fundisqa taytachakunaqa engañollam rikurirun. Mana espirituyoq kaspam engañolla rikurirun.

¹⁸ Mana imapaq valeqmi chay taytachakunaqa. Asikuypaq hinam chay taytachakunaqa. Pasaypaq chinkachisqam kanqaku. Castigo punchawpim chinkanqaku.

¹⁹ Manam chaynachu Jacobpa Diosninqa. Tukuy imapas unanchaqmi payqa. Runankunapaqmi Israel aylluta akllakurqa. Llapallan Kamachiq Tayta Dioswan sutichasqam payqa.

Nacionkunata Babilonia nacionwan Tayta Dios castigananmanta

²⁰ Tayta Diosmi Babilonia nacionta nin kaynata: Maqanay arma hinam qamqa kanki. Guerrapi peleanay arma hinam qamqa kanki. Qanwanmi nacionkunata maqapani. Qanwantaqmi gobiernaqkunatapas maqapani.

²¹ Chaynataq caballokunatawan sillakuqnintapas chaynataq carretakunatawan manejaqninkunatapas.

²² Qanwanmi warmikunatawan qarikunata maqapani. Qawanmi machukunatawan warmakunata maqapani. Qanwanmi mozokunatawan doncellakunata maqapani.

²³ Maqapanitaqmi michiqkunatawan ovejankunatapas. Maqapanitaqmi yapuqkunatawan bueyesninkunatapas. Maqapanitaqmi gobiernaqkunatawan kamachiqkunatapas.

Babilonia llaqta castigasqa kananmanta

²⁴ Ñoqa Tayta Diosmi nini: Babilonia llaqtamanmi pagasaq Sion Moqopi mana allinkuna rurasqanmanta. Caldea nacionmanmi pagasaq Sion Moqopi mana allinkuna rurasqanmanta. Qayllaykichikpim pagasaq mana allinkuna rurasqanmanta.

²⁵ Ñoqa Tayta Diosmi nini: Nacionkuna tuñichiq orqo, qampa contraykipim ñoqaqa kachkani. Kay pachapi kaqkuna tuñichiq orqo, qampa contraykipim ñoqaqa kachkani. Atiyniytam qanman qawachisqayki. Alto qaqamanta hinam kumpamusqayki. Rupasqa orqota hinañam rurarusqayki.

²⁶ Ñoqa Tayta Diosmi nini: Wasipa esquinanpaqpas manañam rumikitaqa hoqarinqakuñachu. Wasipa cimientonpipas manañam rumikitaqa churanqakuñachu. Wiñaypaq urmaruspam manaña kanki chaypiñachu.

²⁷ Babilonia nacionpa contranpiyá hoqariychik banderata. Nacionkuna alistakunanpaqyá tocaychik cornetata. Chay nacionpa contranpiyá hatarichiychik tropakunata. Ararat nacionmantayá tropakunata hatarichimuychik. Mini nacionmantayá tropakunata hatarichimuychik. Askenaz nacionmantayá tropakunata hatarichimuychik. Chay tropakunapa kamachiqnintayá nombraychik. Purmachiq aqarway urukunatapas hinaraqyá caballopi silladakunatapas hatarichimuychik.

²⁸ Nacionkunatayá alistaychik payta atacanankupaq. Media nacionpi reykunatayá alistaychik atacanankupaq. Alistaychiktaqyá gobiernaqkunatawan llapa prefectokunatapas. Alistaychiktaqyá munaychakusqanku llapallan nacionkunatapas.

²⁹ Babilonia llaqtapaq tanteasqanta Tayta Dios rurasqanraykum allpapas kuyuriruspa katkatatarun. Mana runayoq hinaspa tuñichisqa kananpaqmi Tayta Diosqa tantearun.

³⁰ Babilonia llaqtapa valeroso soldadonkunaqa manam peleankuñachu. Pakakunanku sitiokunapi qeparuspam manaña lloqsinkuñachu. Paykunaqa kallpanku tukuruptinmi warmikuna hinaña kachkan. Llaqtankupi wasinkupas kañasqañam kachkan. Zaguanninkupa cerrojonkunapas pakipasqañam kachkan.

³¹ Willakuqkunam qatinasninpi kachkanku. Babilonia nacionpa reyninman willaqmi kallpachkanku. Enteron llaqtan vencerachikusqanmanta willaqmi kallpachkanku.

³² Mayupa vadonkunam dueñochakusqaña. Soqosllaña sitiokunam kañasqaña. Guerrapi peleaqkunam mancharikurunña.

³³ Israelpa yupaychasqan ñoqa Tayta Diosmi nini, Llapallan Kamachiq ñoqa Tayta Diosmi nini: Sumaq Babilonia llaqtaqa trillana tiempopi era hinam rikurirunqa. Chayaramunñam Babilonia llaqtapa cosechasqa hina kananqa.

^34-35 Sion Moqo llaqtapi *f**yachaqmi nin: Babiloniapa reynin Nabucodonosormi kachuparuwaspan ñuturuwarqa. Vacio mankata hinam mana imayoqta payqa saqeruwarqa. Culebra hinam millpuruwaspan wiksanta huntarachirqa. Gustasqan kapuqniykunata saksaruspanmi wischuruwarqa. Jerusalen llaqtapi *f**yachaqmi nin: Ñakarichiwasqanmantayá Babilonia llaqtaqa ñakarichun. Runaykunata wañuchisqanpi hinayá Caldea nacionpi *f**yachaqkunapas wañuchun.

Israelpa castankunaman prometesqanmanta

³⁶ Chayraykum Tayta Dios nin: Ñoqam asuntoykimanta defiendesqayki. Enemigoykikunata vengakuspaymi defiendesqayki. Babilonia nacionniyoqkunapa lamar qochantam chakirachisaq. Babilonia nacionniyoqkunapa pukyunkunatam chakirachisaq.

³⁷ Babilonia llaqtaqa tuñiruspam montorayanqa. Babilonia llaqtaqa atoqkunapa *f**yachananñam kanqa. Runapa manaña *f**yachanan chunniq sitiom kanqa. Qawaqninkunapas admirakusparaqmi burlakunqa.

³⁸ Leonkuna hinam kuskanku qaparinqaku. Malta leonkuna hinam qaparkachanqaku.

³⁹ Ñoqa Tayta Diosmi kaynata nini: Rupaypi yakunayachikuptinkum tomachisaq. Venceqkuna hina kusikunankupaqmi sinkarachisaq. Manaña rikchanankupaqmi wiñaypaq puñurachisaq.

⁴⁰ Nakanapaq malta carnerokunata pusachimuchkaq hinam paykunataqa pusachimusaq. Poqosqa carnerokunatawan chivatokunata pusachimuchkaq hinam paykunataqa pusachimusaq.

Babilonia llaqta vencesqa kananmanta

⁴¹ Sesacwan sutichasqa Babilonia llaqtaqa ¿imaynanpitaq vencesqa rikurirun? Llapallan nacionpa alabasqan Babilonia llaqtaqa ¿imaynanpitaq dueñochakusqa rikurirun? Wakin nacionkuna Babilonia llaqtata qawaspam llumpayllataña mancharikurun.

⁴² Lamar qocha lloqsiramuspanmi pamparun. Achkallaña olankunam Babilonia nacionta pamparun.

⁴³ Chay nacionpi llaqtakunapas pasaypaq chunnichisqam rikurirun. Chaykunaqa chaki allpa manaña imapa kananmi rikurirun. Chay llaqtakunapiqa manañam pipas *f**yachanqañachu. Manañam pipas samariyllapas-samarinqachu.

⁴⁴ Bel taytachatam Babilonia llaqtapi castigasaq. Imapas millpusqankunatam ñoqaqa aqturachisaq. Chay taytachamanqa manañam rinqakuñachu nacionkunaqa. Babilonia llaqtapa murallankunapas tuñisqañam kanqa.

⁴⁵ Runaykuna, lloqsiychik chay llaqtamanta. Sapakamayá libraychik vidaykichikta. Ñoqa Tayta Diospa piñakuyniymantayá librakuychik. Rupariq nina hina piñakuyniymantayá librakuychik.

⁴⁶ Nacionpi rimaykuna kaptinqa amayá hukmanyaychikchu. Nacionpi rimaykuna kaptinqa amayá manchakuychikchu. Sapa watam hukta-hukta rimanqaku. Kay nacionpi ñakariy kananmantam rimanqaku. Gobiernaqkunapura peleanankumantam rimanqaku.

⁴⁷ Chaynaqa hamuchkanmi punchawkuna Babilonia llaqtapi taytachakunata castiganaypaq. Chaynaqa hamuchkani punchawkuna enteron nacionpuni penqaypi rikurinanpaq chaynataq llapallan ayankunapas llaqtapi wischurayananpaq.

⁴⁸ Ñoqa Tayta Diosmi kaynata nini: Cielokunapi kaqkunam kusikuywan qaparinqa Babilonia llaqta vencesqa kaptin. Kay pachapi kaqkunapas tukuy imantinmi kusikunqa chay llaqta vencesqa kaptin. Chaykunamá kusikuywan qaparinqa norte lawmanta tuñichiqkuna hamuptin.

⁴⁹ Babilonia runakunam enteron kay pachapi runakunata wañuchirqaku. Babilonia llaqtam vencesqa kanqa Israel casta runakunata wañuchisqanrayku.

Babiloniapi kaq Israel castakunapaq willakuymanta

⁵⁰ Guerramanta lluptiqkunaqa ama sayaykuspayá ripuychik. Karupiña kaspaykichikpas Tayta Diosmantayá yuyariychik. Karupiña kaspaykichikpas Jerusalen llaqtamantayá yuyaymanaychik.

⁵¹ Qamkunam ninkichik: “Tratawasqankuta uyarispaykum hatun penqaypi kachkaniku” nispa. “Tayta Diospa templonpi santuariokunaman forasterokuna yaykusqanmantam penqakuyllawanña kachkaniku” nispa.

⁵² Chaynaqa hamuchkanmi punchawkuna Babilonia llaqtapa taytacha-mamachankunata castiganaypaq. Chaynaqa hamuchkanmi punchawkuna enteron nacionpi heridokuna ‘ay, ay’ ninanpaq.

⁵³ Babilonia llaqtaqa cielokamaña hatarichisqa kaptinpas, amparakunan sitiokunata alto-altota ruraptinpas ñoqam tuñichiqkunata kachamusaq chaykamapas. Chaynatam ñoqa Tayta Dios nini.

Babilonia llaqtata tuñichisqankumanta

⁵⁴ Babilonia llaqtamantam qapariyllaña uyarikamuchkan. Caldea nacion tuñirusqanmantam qapariyllaña uyarikamuchkan.

⁵⁵ Tayta Diosmi Babilonia llaqtata tuñichichkan. Ancha qapariyninkutam upallachichkan. Enemigonkunam achka yakupa olankuna hinaraq qaparimuchkan. Enemigonkunam lamar qocha choqakamuchkaq hinaraq qaparimuchkan.

⁵⁶ Babilonia tuñichiqkunam hamurunku. Paypa tropankunatam presocharunku. Paykunapa flechanantam pakiparunku. Rurasqankuman hina pagaqmi Tayta Diosqa. Chayraykum paykunaman chaynata paganqa.

⁵⁷ Llapallan Kamachiq sutiyoqmi kaynata nini, ñoqa Rey Tayta Diosmi kaynata nini: Babilonia llaqtapi kamachikuqkunatawan *f**yachaysapakunatam sinkachisaq. Gobiernaqkunatapas, prefectokunatapas, valeroso soldadokunatawanmi sinkachisaq. Wiñaypaqmi manaña rikchanankukama paykunata puñuchisaq.

⁵⁸ Llapallan Kamachiq Ñoqa Tayta Diosmi nini: Babilonia llaqtapa rakta-rakta murallankunatam pasaypaqta pampayachinqaku. Babilonia llaqtapa hatun zaguan punkunkunatam kañaykunqaku. Yanqapaqmi llamkaqkunapas hatarichirqaku. Nina tukurunanpaqmi yanqapaq pisiparqaku.

Babilonia llaqtapi kaqkunaman Jeremiaspa willachimusqanmanta

⁵⁹ Juda nacionpa reynin Sedequias tawa watamanña gobiernachkaptinmi payta Babilonia llaqtaman pusarqaku Seraiastawan kuskata. Seraiasqa karqa Neriaspa churinmi otaq Maasiaspa willkanmi. Seraiasqa karqa tropakunapa imankunamantapas nanachikuqmi. Kay Seraiastam Diosmanta willakuq Jeremias kunarqa.

⁶⁰ Babilonia llaqtapa contranpi castigokuna hamunanmantam Jeremias qellqarqa libropi, chay llaqtapa contranpi qellqaruspanñam

⁶¹ Seraiasta nirqa: —Babilonia llaqtaman chayaspaykim kay libropi tukuy qellqasqa kaqta leenki

⁶² hinaspam ninki: “Dios Taytalláy, kay llaqtata chinkachinaykipaqmi rimarqanki chaynapi manaña runayoq, manaña animalniyoq wiñaypaq chunninanpaq” nispa.

⁶³ Kay libro leeyta tukuruspaykiñataqmi kay libroman rumita watarunki hinaspam Eufrates Mayupa chawpinman wischuykunki.

⁶⁴ Chaymantañataqmi ninki: “¡Kaynatam Babilonia llaqtaqa chinkarunqa! Tayta Diospa castigo kachamusqanwan tuñiruspanmi manaña mastaqa hatarinqañachu” nispa. Kaypim tukun Jeremiaspa rimasqankuna.