Jeremías 5 - Quechua Ayacucho Bible 1987

Jerusalen llaqtapa huchallikusqanmanta

¹ Tayta Diosmi nin: Jerusalenpa callenkunapiyá puriramuychik. Allinta qawamuspayá maskaramuychik. Tapukamuychikyá plazankunapipas. Icharaqpas tarimuwachik pillatapas. Allin arreglaq runa kaptinqa Jerusalen llaqtatam pampachasaq. Cheqap kaqta maskaq runa kaptinqa Jerusalen llaqtatam pampachasaq.

² Ñoqa kawsaq Diosrayku juraspankuqa engañanankupaqmi juramentanku paykunaqa.

³ Dios Taytalláy, qamqa cheqap ruraq runatam maskanki. Runaykikunatam castigarqanki. Ichaqa manam paykunataqa nanarqachu. Puramintitam azoterqanki. Ichaqa manam corregikuyta munarqakuchu. Rumimantapas aswanraqmi sonqonkuta rumiyarachinku. Allin kawsakuyman kutirikamuytaqa manam munarqakuchu.

⁴ Chaymi piensarqani comun runakulla kasqankupaq. Chaymi piensarqani loco runaña kasqankupaq. Tayta Diospa munasqanman hina kawsaytaqa manam yachankuchu. Diosninkupa leyninkunataqa manam yachankuchu.

⁵ Reqsisqa runakunamanmi risaq. Paykunawan parlaqmi risaq. Paykunaqa Tayta Diospa munasqanman hina kawsaytam yachanku. Paykunaqa Diosninkupa leyninkunatam yachanku. Yugota toro pakipachkaq hinam Diospa contranpi lliw hoqarikururqaku. Coyundanta toro tipachkaq hinam Diospa contranpi lliw hoqarikururqaku.

⁶ Chayraykum montemanta lloqsimuq leon paykunata wañurachinqa. Chunniq qechwamanta hamuq lobo animalmi paykunataqa tukurunqa. Uturungum llaqtankutapas wateqanqa. Chay llaqtakunamanta lloqsimuqkunatam tisaparunqa. Llumpay mana kasukuqmi rikurirurqaku. Achka-achka kutitam Diosmanta rakikururqaku.

⁷ Tayta Diosmi nin: ¿Imaraykutaq pampachaykiman churikikuna qepanchakuwachkaptinqa Chaynataq churikikunapas taytacha-mamachakunarayku jurachkaptinqa? Saksanankukama mikuchichkaptiypas paykunam saqeruwanku. Chuchumika warmipa wasinmanmi tropanpi pasakunku.

⁸ Yegua montaq potro hinaraqmi sapakama weqeqeqenku. Runamasinpa warminta qatispam sapakama weqeqeqenku.

⁹ Tayta Diosmi kaynata nin: Chaykuna rurasqankumantaqa ¿manachum castigasaq? Chayna ruraq naciontaqa ¿manachum vengakusaq?

¹⁰ Uvas huertaman yaykuspayá enemigonku kuchuparuchun. Ichaqa amayá pasaypaqtachu kuchuparuchun. Llullu kallmankunatayá rachupachunku. Paykunaqa manañam uvas huertayñachu kachkanku.

¹¹ Tayta Diosmi nin: Israel nacionpi runakunam traicionaruwan —nispa. Juda nacionpi runakunam traicionaruwan —nispa.

Castigasqa kanankumanta

¹² Paykunaqa Tayta Diosta negaspam nirqaku: Payqa manam imanawasunchu. Manam ima castigopas hamuwasunchu. Guerrapas manam hamuwasunchu. Yarqaypas manam hamuwasunchu.

¹³ Diosmanta willakuqkunapas wayra hinallam kachkanku. Manam Diospa palabrantachu paykunaqa rimachkanku. Rimasqankuman hinayá paykunaqa kachunku.

¹⁴ Llapallan Kamachiq Tayta Diosmi nin: Chayna rimasqankuraykum palabraykuna rimasqayki nina hina kanqa. Paykunañataq yanta hina kaptinkum rimasqayki ruparunqa.

¹⁵ Tayta Diosmi nin: Israel castakuna, contraykichikpim karumantaraq runakunata pusamusaq. Valeroso runakunatam ñoqaqa pusamusaq. Paykunaqa ñawpaq runakunapa castankunam. Paykunaqa rimayninkupas mana yachasqayki runakunam. Paykunaqa rimapayasuptikipas mana entiendesqayki runakunam.

¹⁶ Flechankunam wañuchiqpuni armakuna. Llapallankum valeroso soldadokuna.

¹⁷ Cosechaykikunatam tukurunqaku. Mikunaykikunatam mikurunqaku. Churikikunatam wañurachinqaku. Ovejaykikunatawan vacaykikunatam mikunqaku. Uvas plantaykikunatawan higos sachaykikunatam kuchuparunqaku. Guerrawanmi murallakunata tuñichinqaku. Confiakusqayki murallasqa llaqtaykikunatam tuñichinqaku.

¹⁸ Tayta Diosmi nin: —Chaywanpas chay punchawkunapiqa manaraqmi pasaypaqtachu tukurusqaykichik.

¹⁹ Sichu pipas tapusunkiman: “¿Imanasqataq yupaychasqanchik Tayta Diosqa tukuy kaykunataqa rurawarqanchik?” nispa, hinaptinqa qanmi ninki kaynata: “Tayta Diosta qepanchakuspaykichikmi nacionnikichikpipas taytacha-mamachakunata adorarqankichik chaymi mana reqsisqaykichik runakunataña servinkichik huklaw nacionkunapi.”

Juda nacionta anyasqanmanta

²⁰ Jacob castamanyá willamuychik. Juda nacionpiyá uyarichimuychik.

²¹ Yaw mana yachayniyoq runakuna, yaw mana entiendeq runakuna, qamkunaqa qawakuchkaspapas manam rikukunkichikchu. Qamkunaqa uyarichkaspapas manam kasukunkichikchu.

²² Ñoqa Tayta Diosmi nini: ¿Manachum ñoqata respetawankichik? Qayllaypiqa ¿manachum katkatatankichik? Lamar qochapa patantam churarqani linderonpaq, chaynapi wiñaypaq decretoman hina mana pasananpaq. Olankuna hoqarikuspapas manam pasayta atinmanchu. Mancharikuypaqta qaparispapas manam pasayta atinmanchu.

²³ Qamkunaqa rumi sonqo mana kasukuqmi kankichik. Ñoqamanta rakikuruspaykichikmi pasakurqankichik.

²⁴ Qamkunaqa manam yuyaymanarqankichikchu: “Yupaychasqanchik Tayta Diostayá respetasunchik” nispallapas. “Tarpuypipas poqoypipas parachimuqtayá respetasunchik” nispallapas. “Cosecha tiempo qowaqninchiktayá respetasunchik” nispallapas.

²⁵ Mana allinkuna rurasqaykichikmi chaykunamanta karuncharusunkichik. Huchaykichikkunam chay allin kaqkunamanta chinkarachisunkichik.

²⁶ Runaykunawanmi kachkan mana allin ruraq runakuna. Runaykunawanmi kachkan hapirunanpaq wateqaqkuna. Paykunawanmi kachkan toqllata churaspa runamasin hapiruqkuna.

²⁷ Imaynam jaulakunata urpitukunawan huntachinku, chaynam wasinkutapas qechusqankuwan huntachinku. Chayraykum apuyaruspanku ancha atiyniyoq rikurirunku.

²⁸ Wirayaruspankum lluchkay-lluchkay uyayoq kachkanku. Manaña yupay atinam kachkan mana allinkuna rurasqanku. Mana piyniyoqkunatapas manam paykunaqa valechinkuchu. Wakchakunapa asuntontapas manam paykunaqa defiendenkuchu.

²⁹ Ñoqa Tayta Diosmi kaynata nini: Chaykuna rurasqankumantaqa ¿manachum castigasaq? Chayna ruraq naciontaqa ¿manachum vengakusaq?

³⁰ Mancharikuypaq kaqkunam kay nacionpi kachkan. Hukmanyanapaq kaqkunam kay nacionpi kachkan.

³¹ Ñoqamanta willakuqkunam llullallata rimanku. Sacerdotekunam munasqankuman hinalla gobiernanku. Runaykuna, qamkunapas chaytataqmi munankichik. Tukupay tiempo chayamuptinqa ¿imatataq rurankichik?