Jeremías 48 - Quechua Ayacucho Bible 1987

Moab nacionpa contranpi willakuymanta

¹ Israelpa yupaychasqan Llapallan Kamachiq Tayta Diosmi Moab nacionpa contranpi kaynata nirqa: ¡Ay, Nebo llaqtaqa pasaypaq tuñichisqam kanqa! Quiriataim llaqtaqa vencesqam kanqa. Pasaypaq penqayman churasqam kanqa. Amparakunanku wasipas taqmasqam kanqa.

² Moab nacionpi alabanapaq kaqkunam tukurunku. Hesbon llaqtapim chaypa contranpi rimanakurunku. Moab nacion chinkachisqa kananpaqmi rimanakurunku. Madmen llaqta, qampas chunnichisqam kanki. Guerrapi wañunaykipaq amenazasqam kanki.

³ Horonaim llaqtapi runakunam qaparispa nichkanku. “Llaqtaykuqa pasaypaq tuñichisqam kachkan” nispam nichkanku.

⁴ Moab nacionqa tuñichisqañam kachkan. Warmachankunapa qaparisqanmi uyarikuchkan.

⁵ Luhit cuestatam waqastin richkanku. Horonaim llaqtaman uraykuqkunam llakikuymanta waqachkanku.

⁶ Vidaykichikta salvanaykichikpayá ayqeykuychik. Chunniqpi wiñaq sachacha hinayá kaychik.

⁷ Moab castakunaqa rurasqaykichikpim hapipakurqankichik. Moab castakunaqa kapuqnikichikpim hapipakurqankichik. Qamkunaqa pasaypaq vencesqamá kankichik. Quemos sutiyoq taytachaykichiktapas presochasqatam apanqaku. Sacerdotekunatawan kamachikuqkunatapas presochasqatam pusanqaku.

⁸ Sapa llaqtamanmi tuñichiqkuna hamunqaku. Manam mayqan llaqtapas puchunqaku. Qechwankunatapas pasaypaqtam chunnichinqaku. Alto patak pampakunatam purmachinqaku. Ñoqa Tayta Diospa nisqaypi hinam purmachinqaku.

⁹ Moab nacionmanyá rapranta qoychik. Pawakunanpaqyá rapranta qoychik. Chaypi llaqtakunapas purmachisqam kanqa. Mana runayoq kanankamam chunnirunqa.

¹⁰ Ñakasqayá kachun Tayta Diospa kamachisqanta qellapakuywan ruraq runaqa. Ñakasqayá kachun wañuchinanpaq kamachisqa kachkaspan mana wañuchiq runaqa.

¹¹ Moab nacionniyoq runakunaqa qallariyninmantapunim hawkalla kawsakurqaku. Paykunaqa manam haykapipas presochasqaqa rirqakuchu. Urpupi qonchunkama mana kuyuchisqa vino hinam paykunaqa kanku. Chayraykum gustonpas hinalla kachkan. Chayraykum asnayninpas hinalla kachkan.

¹² Chayraykum ñoqa Tayta Dios nini: Hamuq punchawkunapim kachamusaq urpukuna taqtaqkunata. Mana imayoq kanankamam taqtarunqa pasaypaqta. Chay urputaqa pakiparunqam pasaypaqta.

¹³ Moab nacionmi penqarikunqa. Quemos sutiyoq taytachanmantam penqarikunqa. Israel castakuna hinam penqarikunqa. Betel llaqtapi taytachamantam penqakurqaku. Confiakusqanku taytachamantam penqakurqaku.

¹⁴ Moab nacionqa amañayá nichunchu: “Valeroso soldadokunam kaniku” nispaqa. Moab nacionqa amañayá nichunchu: “Guerrapi peleaq tropakunam kaniku” nispaqa.

¹⁵ Moab nacionmi tuñichisqa kanqa. Llaqtankunam atacasqa kanqa. Akllasqa mozonkunam wañuchisqa kanqa. Reywan sutichasqa Tayta Diosmi chaynata nini. Llapallan Kamachiq Tayta Diosmi chaynata nini.

¹⁶ Moab nacionpa sasachakuyninmi hichpamuchkanña. Hatun desgraciapi rikurirunanmi utqamuchkanña.

¹⁷ Moab nacionpa vecinonkunapas chay nacionmantayá waqaychik. Ancha reqsisqa kasqan yachaqkunapas chay nacionmantayá waqaychik. “¡Pakisqa vara hinam atiyniki rikurirun!” nispayá niychik. “¡Pakisqa tawna hinam sumaq kayniki rikurirun!” nispayá niychik.

¹⁸ Sumaq Dibon llaqtapi *f**yachaqkuna, ancha reqsisqa kaynikimantayá uraykamuy. Chaki pampapiña tiyanaykipaqyá uraykamuy. Moab nacionta chunnichiqmi hamurunqaña. Amparakunayki torrekunatam tuñirachinqaña.

¹⁹ Aroer llaqtapi *f**yachaqkuna, ñanpa patanpi sayaykuspayá qawariychik. Lluptikuq qarikunatayá tapuychik. Ayqekuq warmikunatayá tapuychik. ¿Imataq sucedekun? nispayá tapuychik.

²⁰ Moab nacionqa penqaypim kachkan. Moab nacionqa mancharisqam kachkan. Paymanta llakikuspayá qaparkachaychik. Paymanta llakikuspayá willakuychik. Arnon Mayupa patanpi kaqkunamanyá nimuychik. “Moab nacionqa tuñichisqañam” nispayá nimuychik.

²¹ —Alto patak pampakunapi llaqtakunapa contranpi sentenciasqanmi cumplikurqa, chay llaqtakunam karqa: Holon, Jahaza, Mefaat,

²² Dibon, Nebo, Bet-diblataim,

²³ Quiriataim, Bet-gamul, Bet-meon,

²⁴ Queriot hinaspa Bosra. Cumplikurqataqmi Moab nacionpa hichpanpi kaq hinaspa karu lawpi kaq llaqtakunapa contranpipas.

²⁵ Tayta Diosmi nin: Toropa waqran kuchusqa hinam Moab nacionpa kallpanqa tukurunña. Runapa makin pakikuruq hinam Moab nacionpa atiyninqa tukurunña.

²⁶ Tayta Diospa contranpi hatunchakusqanraykuyá Moab nacionta machachiychik. Vomitasqanpi qochpanankamayá Moab nacionta machachiychik. Paymantaqa llapallanku burlakunankukamayá Moab nacionta machachiychik.

²⁷ Moab nacion ¿manachum qampas Israel castamanta burlakurqanki? ¿Manachum hapirachikuq suwakunamanta hina burlakurqanki? Sapa kuti rimaspaykiqa ¿manachum paykunata despreciarqanki?

²⁸ Moab nacionpi *f**yachaqkunaqa llaqtakunamantayá lloqsiychik. Moab nacionpi yachaqkunaqa qaqakunapiñayá yachaychik. Qaqa patanpi qesachakuq paloma hinañayá *f**yachaychik.

²⁹ Moab nacion orgullosa kasqantaqa uyarirqanchikmi. Pay tukuspa hatunchakuq kasqantaqa uyarirqanchikmi. Runa tukuspa yachaq tukuq kasqantaqa uyarirqanchikmi.

³⁰ Ñoqa Tayta Diosmi kaynata nini: Yanqapaq rabiakusqantaqa reqsinim. Mana valeq alabakusqantaqa reqsinim.

³¹ Chayraykum qaparkachasaq Moab nacionmanta. Chayraykum qaparisaq lliw Moab nacionmanta. “¡Ay, ay!” ninqakum Kir-hares yachaqkunamanta.

³² Sibma lawpi uvas huertalláy, qanmantaqa waqasaq Jazer llaqtaymantapas astawanraqmi. Kallmaykikunapas chayarun qochapa patankamaraqmi. Jazer llaqta qochapa patankamaraqmi chayarun. Purmachiqkunam frutaykitawan uvasnikita tukurun.

³³ Moab nacion huertakunapi kusikuymanta qapariytam tukusaq. Uvas saruna pozopipas vinotam chinkarachisaq. Takiwan uvas saruqkunapas manañam kanqachu. Kusikuymanta qapariypas manañam kanqachu.

³⁴ Hesbon llaqtapi *f**yachaqkunam qaparichkan. Eleale llaqtakamam waqasqankuqa uyarikuchkan. Jahaza llaqtakamam qapariyninkuqa uyarikurun. Zoar llaqtamanta Horonaim llaqtakamam uyarikurun. Eglat-selisiya lawkamam chay qaparisqankuqa chayarun. Nimrim Wayqokunapi pukyukunaqa lliwmi chakirun.

³⁵ Tayta Diosmi nin: Ñoqam chinkarachisaq Moab castakunata. Ñoqam chinkarachisaq moqokunapi capillakunata chaynataq moqokunapi animal kañaqkunatapas, taytacha-mamachakunaman incienso kañaqkunatapas.

³⁶ Chayraykum qena hinaraq sonqoy waqachkan Moab runakunamanta. Chayraykum qena hinaraq sonqoy waqachkan Kir-hares llaqtayoqkunamanta. Waqachkanimá tukuy ima huñusqanku chinkarusqanmanta.

³⁷ Lliw runapa chukchantam paqlarunku. Lliw runapa barbantam ruturunku. Llapallankum makinkuta ikipakurunku. Llapallankum luto pachawan churakurunku.

³⁸ Ñoqa Tayta Diosmi nini: Moab runakunatam ñutuypaq-ñutupachkani. Mana valeq allpa mankata hinam ñutupachkani. Chayraykum Moab nacionpa llapallan altosninkunapi waqayllaña uyarikuchkan. Chayraykum Moab nacionpa llapallan plazankunapi waqayllaña uyarikuchkan.

³⁹ Moab nacionmantayá qaparkachaychik. Taqmaparusqa kasqanmantayá qaparkachaychik. Penqakuymantam pasaypaqña qepanchakurun. Muyuriqnin nacionkunapa ancha burlakunanñam rikurirun. Muyuriqnin nacionkunapa mancharikunanñam rikurirun.

⁴⁰ Tayta Diosmi nin kaynata: Moab nacionpa contranpim enemigonkuna hamunqaku. Raprankunatapas mastarispa pawaykuchkaq anka hinaraqmi atacanqaku.

⁴¹ Llaqtakunapas enemigopa dueñochakusqanmi kanqa. Amparakuna sitiokunapas vencesqam kanqa. Chay punchawpiqa Moab nacionniyoq valerosokunapa sonqonmi hukmanyarunqa. Wachakuywan ñakariq warmi hinaraqmi paykunaqa rikurirunqa.

⁴² Manaña nacion kananpaqmi Moabqa pasaypaq chinkachisqa kanqa. Ñoqa Tayta Diospa contraypi hatunchakusqanraykum chinkachisqa kanqa.

⁴³ Ñoqa Tayta Diosmi kaynata nini: Moab runakunaqa monte animalkuna hapiqkunapa mancharichisqan hinam kanqaku. Pozomanpas otaq toqllamanpas wichiykuchkaq animalkuna hinam kanqaku.

⁴⁴ Ñoqa Tayta Diosmi kaynata nini: Manchakuymanta lluptiqkunam pozoman wichiykunqaku. Pozomanta lluptiqkunam toqllaman wichiykunqaku. Moab runakunata castiganay tiempota chayachimuptiymi chayna kanqaku.

⁴⁵ Wakin runaqa mana kallpayoqñam lluptirunku. Hesbon llaqtapi amparakunankupaqmi lluptirunku. Ichaqa Hesbon llaqtamantam nina lloqsirun. Sehonpa llaqtanmantam lenguachkaq nina lloqsirun. Moab naciontam kuchun-kuchun ruparun. Chaqwa ruraqkunapa enteron nacionnintam ruparun.

⁴⁶ ¡Imaynaraq kanki, Moab nacion, Quemos sutiyoq taytacha adoraq nacion! Qari churikikunatam presochasqata pusarqaku. Warmi churikikunatam presochasqata pusarqaku.

⁴⁷ Chaywanpas tukupay tiempokunapim kaqllamanta allinyachisaq. Moab casta runakunatam kaqllamanta allinyachisaq. Ñoqa Tayta Diosmi chaynata nini. Kaykamam Moab nacionpaq sentencia.