Jeremías 47 - Quechua Ayacucho Bible 1987

Filistea runakunapa contranpi willakuymanta

¹ Gaza llaqtata manaraq Faraon venceruchkaptinmi Filistea runakunapa contranpi paymanta willakuq Jeremiasman Tayta Dios kaynata nirqa:

² Norte lawmantam lloqlla hinaraq runakuna hamuchkan. Llimparichkaq hatun mayu hinam tropakuna hamuchkan. Llapallan runakunam qayakunqaku. Nacionkunapi *f**yachaqkunam qaparinqaku.

³ Caballokunapa kallpasqanta uyarispankum, carretakunapa qaparisqanta uyarispankum, ruedankunapa bulla rurasqanta uyarispankum taytakunapas churinkuta manaña yanapankuchu. Manañam paykunaqa ima ruraytapas atinkuchu.

⁴ Filistea runakunata chinkachinankupaq tiempom chayaramun. Tiro llaqta yanapaq puchuqkunata chinkachinanku tiempom chayaramun. Sidon llaqtata yanapaq puchuqkunata chinkachinanku tiempom chayaramun. Filistea runakunatam Tayta Dios chinkachinqa. Creta islapi puchuqkunatam Tayta Dios chinkachinqa.

⁵ Gaza llaqtayoqkunam llakikuymanta uma chukchankuta rutukurunku. Ascalon llaqtayoqkunam llakikuymanta mana rimaqña rikurirunku. Lamar qochapa patanpi puchuqkunaqa ¿haykapikamataq kuchupakunkichikqa?

⁶ “¡Ay Tayta Diospa kachamusqan espada! ¿haykapikamataq mana samankichu?” nispam ninkichik. “Yaw espada, vainaykiman kutiykuy” nispam ninkichik. “Taniruspayá hawkaña kakuy” nispam ninkichik.

⁷ ¿Imaynataqsi espadaqa samanman Tayta Dios kamachichkaptinqa? ¿Imaynataqsi espadaqa samanman “Ascalon llaqtata atacay” nispa kamachichkaptinqa, “Lamar qochapa patanpi llaqtakunata atacay” nispa kamachichkaptinqa?