Jeremías 46 - Quechua Ayacucho Bible 1987

Egipto nacionpa contranpi Jeremiaspa rimasqanmanta

¹ Tayta Diosmi paymanta willakuq Jeremiasman willarqa nacionkunapa contranpi.

² Jeremiastamá rimapayarqa Egipto nacionpa contranpi otaq chay nacionniyoq Rey Faraon Necaopa tropankunapa contranpi. Paymi kachkarqa Eufrates Mayupa patanpi kaq Carquemis llaqtapa hichpanpi. Chay sitiopim Babilonia nacionpa reynin Nabucodonosor payta vencerurqa Josiaspa churin Joacim tawa watamanña Judá nacionpi gobiernachkaptin. Egipto tropakunapa contranpimá nirqa:

³ Hatun harkachikuna armata alistaychik peleaq rinaykichikpaq. Taksa harkachikuna armata alistaychik peleaq rinaykichikpaq.

⁴ Soldadokunaqa caballokunata montoraspayá chaykunaman sillakuychik. Cascowan umaykichikta harkachikuspayá filaman churakuychik. Qasqo harkachikunaykichikta churakuspayá lanzaykichiktapas llipipipichiychik.

⁵ Ñoqa Tayta Diosmi nini: Chaywanpas ¿imatataq ñoqaqa qawachkani? Manchakuymanta kutirimuqkunatam qawachkani. Soldadokunam vencerachikuspa cheqerunku. Qepankutapas manaña qawarikuspam ayqekunku. Mancharisqallañam llapallanku kachkanku.

⁶ Utqayllamanña kallpaqkunapas manam lluptiyta atinkuchu. Valeroso soldadokunapas manam ayqeyta atinkuchu. Norte law Eufrates Mayupa hichpanpim mitkarunku. Norte law Eufrates Mayupa hichpampim wichirunku.

⁷ ¿Pitaq wakqa Nilo Mayu hina llimparistin hamuchkan? ¿Pitaq wakqa lloqlla mayu hina Kuyuyllaña-kuyumuchkan?

⁸ Egipto nacionmi Nilo Mayu hina llimparistin hamuchkan. Egipto nacionmi lloqlla mayu hina kuyuyllaña-kuyumuchkan. Egipto nacionmi nichkan: “Mayu hina llimparispaymi kay pachata taparusaq” nispa. “Llaqtakunatam runantinta pasaypaq tuñirachisaq” nispa.

⁹ Silladakunayá kallpachunku. Carretayoqkunayá utqachunku. Valerosokunayá lloqsichunku. Harkachikuna hapiq Cus nacionniyoq soldadokuna, qamkunapas lloqsiychikyá. Flecha manejaq Lud nacionniyoq soldadokuna, qamkunapas lloqsiychikyá.

¹⁰ Llapallan Kamachiq ñoqa Señor Diospa punchawniymi chay punchawqa. Enemigoykunamanta vengakunay punchawmi chay punchawqa. Espadam saksanankama mikuchkaq hina runakunata wañuchinqa. Espadam sinkanankama tomachkaq hina runakunapa yawarninta usuchinqa. Llapallan Kamachiq ñoqa Señor Diosmi paykunataqa wañuchisaq. Eufrates Mayupa patan norte lawpim paykunataqa wañuchisaq.

¹¹ Sipasman rikchakuq Egipto runakuna, Galaad lawtayá riychik. Chaypiyá hampita maskamuychik. Yanqapaqñam apamuwaq achka hampikunataqa. Manañam sanoyachisunkiñachu chay hampikunaqa.

¹² Penqaypi kasqaykitaqa llapallan nacionkunam yacharunkuña. Qapariynikim enteron kay pachamanpas huntarunña. Valeroso runakunam saqmanakurunku hinaspam iskayninku wichirunku.

Egipto runakunata Rey Nabucodonosor vencesqanmanta

¹³ Babilonia nacionpa reynin Nabucodonosor Egipto nacionta atacananpaq pasaruptillanmi paymanta willakuq Jeremiasta Tayta Dios rimapayaspan nirqa:

¹⁴ Egipto nacionpiyá willakuychik. Migdol llaqtapiyá uyarichikuychik. Uyarichikuychiktaqyá Menfis llaqtapipas. Uyarichikuychiktaqyá Tafnes llaqtapipas. “Puestoykichikpi kaspa listolla kaychik” nispayá willakuychik. “Muyuriqnikichikpim runakunata espadawan wañuchichkanku” nispayá willakuychik.

¹⁵ Apis sutiyoq toro taytachaykiqa ¿imanasqataq lluptikurun? Ñoqa Tayta Diosmi tuñirachirqani paytaqa. Chay toro kaqlla taytachaykiqa ¿imanasqataq mana hinallapichu sayarun? Ñoqa Tayta Diosmi tuñirachirqani paytaqa.

¹⁶ Soldadoykikunam saqmanakurunku. Wichiykuspankum ninakunku: “Hatarispayá pasakusunchik. Llaqtanchikmayá kutirikusunchik. Nacesqanchik nacionmanyá kutirikusunchik. Wañuchiq guerramantayá lluptikusunchik.”

¹⁷ Chaypiyá kaynata sutichaychik: “Egipto nacion Rey Faraonqa alabancerollam” nispa. “Payqa vencenanpaq kachkaspa tiempo pasarachiqmi” nispa.

¹⁸ Llapallan Kamachiq Tayta Dios sutiyoqmi nini, sutiyrayku juraq reymi nini: Moqokunapa chawpinpi Tabor Moqo hinaraqmi enemigoykiqa qawapasllaña hamunqa. Lamar qochapa hichpanpi Carmelo orqokuna hinaraqmi enemigoykiqa qawapasllaña hamunqa.

¹⁹ Egipto nacionniyoq runakuna, qepikichiktayá alistakuychik. Preso rinaykichikpaqyá alistakuychik. Menfis llaqtam chunnichisqa kanqa. Mana runayoq kananpaqmi kañasqa kanqa.

²⁰ Kuyayllapaq vaquilla hinam Egipto nacionqa. Ichaqa norte lawmanta hamuq tankayllum kachurunqa.

²¹ Pagasqa soldadokunapas wirayachisqa torokuna hinam kachkanku. Enemigonkuta qepanchakuruspam lluptikunqaku. Manaña aguantayta atispankum lluptikunqaku. Desgraciapi kananku punchawmi chayaramun. Castigasqa kananku tiempom chayaramun.

²² Lluptichkaq culebra hinaraqmi silbakustin lluptinqaku. Enemigo tropakunaqa sacha kuchuqkuna hinaraqmi hichpamunqaku.

²³ Ñoqa Tayta Diosmi nini: Manaña yaykuy atina montepi sachakunatam kuchunqaku. Manaña yupay atinam kachkanku. Aqarway uru hinañam kachkanku.

²⁴ Sipasman rikchakuq Egipto nacionniyoq runakunam penqaypi rikurinqaku. Norte law runakunamanmi entregasqa kanqaku.

²⁵ Israelpa yupaychasqan Llapallan Kamachiq Tayta Diosmi nin: —Tebas llaqtapi Amon sutiyoq taytachankutam castigasaq. Castigasaqtaqmi reyninku Faraontapas, Egipto nacionniyoq runakunatapas, taytacha-mamachankutapas, wakin reyninkutapas chaynataq Faraonpi hapipakuqkunatapas.

²⁶ Ñoqa Tayta Diosmi nini: Ñoqam qoykusaq wañuchiy munaqnin enemigonkunaman otaq Babilonia nacionpa reynin Nabucodonosormanwan serviqninkunaman. Chaywanpas Egipto nacionpiqa ñawpaq tiempokunapi hinam runakuna kaqllamanta *f**yachanqaku.

Runankunata Tayta Dios salvananmanta

²⁷ Serviqniy Jacobpa castankuna, qamkunaqa amayá manchakuychikchu. Israelpa mirayninkuna, qamkunaqa amayá hukmanyaychikchu. Karu nacionkunamantam libramusqaykichik. Miraynikichiktawan kuskatam libramusqaykichik. Preso risqaykichik nacionmantam libramusqaykichik. Hinaptinmi kaqllamanta hawkalla *f**yachakunkichik. Manaña pipapas manchachisqanmi hawkallaña kankichik.

²⁸ Ñoqa Tayta Diosmi nini: Serviqniy Jacobpa castankuna, qamkunawan kasqayraykuyá ama manchakuychikchu. Cheqerachiptiy chayasqaykichik nacionkunatam pasaypaqta chinkarachisaq. Qamkunataqa manam chinkachisqaykichikchu. Faltakusqaykichikman hinam castigasqaykichik. Castiganaymantaqa manam lluptiwaqchikchu.