Jeremías 45 - Quechua Ayacucho Bible 1987

Barucpa favorninpi Jeremiaspa rimasqanmanta

¹ Josiaspa churin Rey Joacim tawa watamanña Juda nacionpi gobiernachkaptinmi Diosmanta willakuq Jeremiaspa yachachisqanta Baruc qellqachkaptin payta Jeremias nirqa:

² —Yaw Baruc, Israelpa yupaychasqan Tayta Diosmi kaynata nisunki:

³ “Qanmi nichkanki: ‘¡Ay imañataq kay ñoqapa suerteyqa! Nanayniymanmi llakikuytaraq Tayta Dios yapaykuwan. Mana pipapas consuelasqan waqaytam amiruniña’ nispa.”

⁴ Tayta Diosmi nisunki kaynata: “Hatarichisqayta tuñirachispaymi plantasqaytapas qorata pilachkaq hina horqorusaq. Chaynatamá tukurusaq kay enteron naciontapas.

⁵ ¿Kikikipaqchum maskachkanki admirakuypaq kaqkunata? Chaykunataqa amañayá maskaychu. Llapallan runakunamanmi desgraciakunata kachamusaq. Qanmi ichaqa maymanña rispaykipas kawsayllapas-kawsankiraq.”