Jeremías 43 - Quechua Ayacucho Bible 1987

Jeremiasta Egipto nacionman pusasqankumanta

¹ Yupaychasqanku Tayta Diospa tukuy ima kunasqanta llapallan runakunaman Jeremias willayta tukuruptinmi,

² Osaiaspa churin Azarias, Careapa churin Johanan wakin hatun tukuq runakunapiwan Jeremiasta nirqaku: —Chay niwasqaykikuqa llullam. Yupaychasqanchik Tayta Diosqa manam kunamusurqankichu: “Ama Egipto nacionmanqa riychikchu chaypi *f**yachamunaykichikpaq” nispaqa.

³ Qamtaqa Neriaspa churin Barucmi contraykupi umacharusunki Caldea runakunaman entregasqa kanaykupaq chaynapi wañurachiwanankupaq otaq Babilonia lawman presota pusawanankupaq —nispa.

⁴ Juda nacionpi *f**yachanankupaq Tayta Diospa kamachisqantaqa manamá kasurqachu Careapa churin Johananpas nitaq tropankunapa capitanninkunapas nitaq llapallan runakunapas.

⁵ Aswanraqmi Careapa churin Johananqa tropankunapa llapallan captanninkunapiwan huñururqaku huklaw nacionkunaman cheqechisqa kaspanku Juda allpapi *f**yachanankupaq kutimuq runakunatapas.

⁶ Huñururqakumá qarikunata, warmikunata, warmachakunata chaynataq reypa warmi churinkunatapas. Reyta cuidaq soldadokunapa jefen Nabuzaradanmi saqerqa Safanpa willkanta otaq Ahicanpa churin Gedaliasta llapallan chay runakunata gobiernananpaq. Huñururqakutaqmi Diosmanta willakuq Jeremiastapas chaynataq Neriaspa churin Baructapas.

⁷ Tayta Diospa nisqanta mana kasukuspankumá rirqaku Egipto nacionman hinaspam Tafnes llaqtaman chayarurqaku.

⁸ Tafnes llaqtapi *f**yachachkaptinkuñam Jeremiasta Tayta Dios nirqa:

⁹ —Judá nacionniyoq runakunapa qayllanpim hatun rumikunata apamuspayki, chaytam Rey Faraonpa wasinman yaykuna ladrillasqa patiopi mituwan pamparunki

¹⁰ hinaspam paykunata ninki: “Israelpa yupaychasqan Llapallan Kamachiq Tayta Diosmi nin: ‘Babilonia nacionpi serviqniy Rey Nabucodonosorta pusamuptiymi kay pampachisqay rumi hawanpi tiyananta churanqa hinaspataqmi toldontapas sayachinqa.

¹¹ Hamuspan kay Egipto nacionta castigaptinmi peste onqoypaq kaqkuna peste onqoywan wañunqa. Preso rinanpaq kaqkunam preso rinqaku, guerrapi wañunanpaq kaqkunam guerrapi wañunqaku.

¹² Kay Egipto nacionpi taytacha-mamachakunapa capillankunatam Nabucodonosorwan kañaykachisaq. Wakin taytacha-mamachankuta kañaykachispaymi, wakintañataq presota hina apachisaq. Pachanpi usakunata oveja michiq limpiachkaq hinam Nabucodonosorqa Egipto nacionta limpiaspan hawka pasakunqa.

¹³ Bet-semes llaqtapi intita adoranankupaq templopi sayachisqanku pilarkunatapas ñutuparunqam, kañaykunqataqmi Egipto nacionpi taytacha-mamachakunapa templonkunatapas’ nispa.”