Jeremías 42 - Quechua Ayacucho Bible 1987

Diosta mañakunanpaq Jeremiasta ruegasqankumanta

¹ Careapa churin Johananmi tropankunapa llapa capitanninkunapiwan, Osaiaspa churin Jezaniaspiwan chaynataq hatunpas-taksapas llapallan runakunapiwan asuykurqaku

² Diosmanta willakuq Jeremiasman hinaspam nirqaku: —Ruegakuykikum llapallan kaypi puchuqkunapaq yupaychasqanchik Tayta Diosta mañakunaykipaq. Rikuwasqaykikupi hinam achkamanta ñoqallaykuña puchuruniku.

³ Yupaychasqanchik Tayta Diosyá niykuwachunku maylawninta rinaykutapas chaynataq imam ruranaykutapas —nispa.

⁴ Hinaptinmi Diosmanta willakuq Jeremiasñataq nirqa: —Allinchiki. Mañawasqaykichikta hinam yupaychasqanchik Tayta Diosta mañakusaq. Imam niwasqanta hinallam mana pakaspay willasqaykichik —nispa.

⁵ Chaymi paykunañataq nirqaku: —Yupaychasqanchik Tayta Diosyá kachun contraykupi cheqap confianza testigoqa tukuy imapas qanwan nichiwasqankuta mana ruraptiykuqa.

⁶ Gustoykupaq otaq mana gustoykupaq kaptinpas yupaychasqanchik Tayta Diospa qamnintakama niwasqankutam kasukusaqku chaynapi allin kanaykupaq —nispa.

Tayta Diospa contestasqanmanta

⁷ Chunka punchaw pasaruptinmi Jeremiasta Tayta Dios rimapayarqa.

⁸ Chaymi Jeremias qayachirqa Careapa churin Johananta, tropankunapa capitanninkunata chaynataq hatunpas-taksapas llapallan runakunata.

⁹ Hinaspam paykunata nirqa: —Mañakuwasqaykichikman hina ruegakuptiymi Israelpa yupaychasqan Tayta Dios kaynata nin:

¹⁰ “Kay allpamanta mana lloqsiptikichikqa wasita hina hatarichispaymi mana tuñichisqaykichikchu, plantata hina plantaspaymi mana pilasqaykichikchu. Contraykichikpi castigokuna kachamusqaymantam pesakuruni.

¹¹ Ñoqa Tayta Diosmi nini: Manchakusqaykichik Babilonia nacionpa reynintaqa amañayá manchakuychikchu. Qamkunawanmi kachkani salvanaypaq chaynataq paymanta libranaypaqpas.

¹² Qamkunamantam llakipayarikusaq chaynataqmi Nabucodonosorpas llakipayasunkichiktaq hinaspam allpaykichikman kutichimusunkichik, nispa.”

¹³ —Ichaqa yupaychasqanchik Tayta Diospa nisqanta mana kasukuspañataq kay allpapi mana *f**yachanaykichikrayku niwaqchik:

¹⁴ “Manapunim kay allpapiqa kaymankuchu aswanqa Egipto nacionmanmi risaqku *f**yachanaykupaq. Chaypiqa manañam guerrata rikusaqkuchu, manañam guerrapaq cornetapa waqasqantapas uyarisaqkuchu nitaq yarqaymantapas ñakarisaqkuñachu” nispa.

¹⁵ Juda nacionpi puchuqkuna chaynata nispaykichikqa Israelpa yupaychasqan Llapallan Kamachiq Tayta Diospa kayna nisqantayá uyariychik: “Sichu atipakunkichik Egipto nacionman rispa chaypi *f**yachanaykichikpaq hinaptinqa

¹⁶ manchakusqaykichik guerram chay Egipto nacionpi hayparamusunkichik, manchakusqaykichik yarqaypas chaymanmi qatiparamusunkichik hinaptinmi chaypi wañunkichik.

¹⁷ Egipto nacionpi *f**yachamunaykichikpaq atipakuqkunaqa chaypim guerrawan, yarqaywan chaynataq peste onqoywan wañunkichik. Manam pipas puchunkichikchu nitaqmi mayqannikichikpas castigo kachamusqaymantaqa lluptinkichikchu.”

¹⁸ —Israelpa yupaychasqan Llapallan Kamachiq Tayta Diosmi nin: “Jerusalen llaqtapi *f**yachaqkunapaqmi piñakuspay rabiakurqani, chaynatam qamkunapaqpas piñakusaq Egipto nacionman yaykuptikichikqa. Qamkunam kankichik ñakasqa, runakunapa admirakunan, insultanan hinaspa humillachinan, manañam kutimunkichikchu kay sitiomanqa” nispa.

¹⁹ Juda nacionpi puchuqkuna, Tayta Diosmi nisunkichik Egipto nacionmanqa ama rinaykichikpaq. Chaynaqa kunanyá yachaychik imam kaqllata qamkunaman willakusqayta.

²⁰ Qamkunaqa kikillaykichikmi engañakuchkankichik. Kikillaykichikmi kamachiwarqankichik: “Yupaychasqanchik Tayta Diostayá mañakuy ñoqaykupaq hinaspayá willawayku imam nisqanta ruranaykupaq” nispa.

²¹ Yupaychasqanchik Tayta Diospa kunamuwasqantam qamkunaman willarqaykichik ichaqa manam kasukurqankichikchu.

²² Chaynaqa cheqaptapunim kunan nikichik: *f**Yachanaykichikpaq munasqaykichik sitiopim wañumunkichik guerrawan, yarqaywan hinaspa peste onqoywan, nispa.