Jeremías 4 - Quechua Ayacucho Bible 1987

Wanakunankupaq anyasqa kasqankumanta

¹ Tayta Diosmi nin: Israelpa mirayninkuna, kutirikamuyta munaspaqa ñoqamanmi kutirikamunaykichik. Ñoqamanta ama rakikuspayá millakuypaq taytacha-mamachaykichikta wischuychik.

² Cheqapta rimaspam sutiyrayku jurankichik. Allin arreglota ruraspam sutiyrayku jurankichik. Allinkunata ruraspam sutiyrayku jurankichik. Ñoqa kawsaq Tayta Diosraykum jurankichik. Chaynapim nacionkuna ñoqarayku bendecisqa kanqaku. Chaynapim nacionkuna ñoqarayku alabakunqaku.

³ Juda nacionpi runakunamanmi Tayta Dios kaynata nin, Jerusalen llaqtapi runakunamanmi Tayta Dios kaynata nin: Barbechaychikyá mana tarpusqaykichik chakrakunatapas. Amañayá tarpuychikchu kichkakunapa kasqanpipas.

⁴ Juda nacionpi runakuna, yupaychasqaykichik ñoqa Tayta Diospaqyá señalakuychik. Jerusalen llaqtapi runakuna, yupaychasqaykichik ñoqa Tayta Diospaqyá señalakuychik. Chaynatayá sonqoykichiktapas señalakuychik. Yanqañataq mana allinkuna rurasqaykichikmanta nina hina piñakuyniy ratarirunman. Yanqañataq mana allinkuna rurasqaykichikmanta mana pipapas amachay atinan rikurirunman.

Juda nacion atacasqa kananmanta

⁵ Willakamuychik Juda nacionpi kaqkunaman. Willakamuychik Jerusalen llaqtapi kaqkunaman. Cornetata tocaspa enteron nacionpi nimuychik. “Huñunakusunchik” nispayá qayakamuychik. “Murallasqa llaqtakunamanyá ayqekusunchik.”

⁶ ¡Sion Moqopi llaqta lawman hoqariychik banderata! ¡Ama sayaspa maskaychik amparakunaykichik sitiota! Norte lawmantam apamuchkani castigota. Chaylawmantam apamuchkani hatun desgraciata.

⁷ Leon lloqsimuchkaq hinam lloqsiramunña. Nacionkuna purmachiqmi campamentomanta puririmuchkanña. Nacionnikichikta chinkachinanpaqmi maymi kasqanmanta lloqsiramunña. *f**Yachanaykichik llaqtakunam karunqa purmachisqaña. Yachanaykichik llaqtakunam karunqa mana runayoqña.

⁸ Chaynaqa luto pachawanyá pachakuychik. Chaynaqa qaparkachaspayá waqaychik. Imaynam ruparichkaq nina mana taninchu, chaynam Tayta Diospa piñakuyninpas contranchikpi mana taninchu.

⁹ Tayta Diosmi nin: Chay punchawpiqa reywan jefekunam manaña valorniyoq rikurinqaku. Sacerdotekunam mancharisqallaña kanqaku. Ñoqamanta willakuqkunam hukmanyarunqaku.

¹⁰ Chaymi ñoqa nirqani: ¡Ay, Señor Dioslláy! Anchallatañam engañarunki kay runakunata. Anchallatañam engañarunki Jerusalenpi runakunata. “Hawkallam kankichik” nirqankim paykunata aswanqa kunkankupi cuchillo hinaraqmi guerra hayparun paykunata.

¹¹ Chay tiempopim kay runakunata nisaq, Jerusalen llaqtapi runakunatam nisaq: “Chunniqpi orqokunamantam rupaq wayra pukumuchkan. Runaykunapa kasqanmanmi chay wayra pukumuchkan. Ichaqa manam trigo wayrachinapaq hina wayrachu. Ichaqa manam trigo limpianapaq hina wayrachu.

¹² Chay wayramantapas aswan nisyu wayrataraqmi pukuchimusaq. Kunanmi paykunapa contranpi sentenciaykunata rimarisaq.”

Juda nacionpa contranpi enemigo hamusqanmanta

¹³ Qawariychik, enemigoykichikmi puyu hinaraq hamuchkan. Sinchi wayra hinaraqmi guerrapaq carretankupas hamuchkan. Ankatapas llalliriqraqmi caballonkupas hamuchkan. ¡Imaynaraq kasunchik! ¡Wañuymi hayparamuwanchik!

¹⁴ Jerusalen llaqtapi runakuna, sonqoykichikmanta limpiaychik mana allinkunata. ¿Haykapikamataq yuyaymanankichik chay mana allinkunata?

¹⁵ Dan llaqtamantam noticiata willakamuchkan. Efrain orqokunamantam desgracia uyarikamuchkan:

¹⁶ Nacionkunamanyá willamuychik. Jerusalenpi kaqkunamanyá nimuychik: “Llaqtapa muyuriqninmanta atacaqkunam karu nacionmantaraq hamuchkanku. Juda nacion llaqtakunapa contranpi qaparispam hamuchkanku.

¹⁷ Chakrakuna cuidaqkuna hinaraqmi Jerusalenpa muyuriqninpi churakurunqaku. Chaynam kanqaku mana kasuwasqankurayku. Ñoqa Tayta Diosmi chaynata nini.

¹⁸ “Mana allin kawsasqaykimantam kaykunaqa sucederusunki. Mana allin rurasqaykimantam kaykunaqa sucederusunki. Mana allinkuna rurasqaykipa pagonmi kayqa. Sonqoykita pasaypaq llakichiqmi kayqa.”

Llaqtamasinkunarayku Jeremiaspa waqasqanmanta

¹⁹ ¡Ay, sonqollaymi tukukuruchkanña! ¡Ay, sonqollaymi tukukuruchkanña! Puramintita pampanyaspanmi tukukuruchkanña. Cornetapa waqasqanta uyarispaymi manaña upallalla kayta atinichu. Peleaqkunapa qaparisqanta uyarispaymi manaña upallalla kayta atinichu.

²⁰ Chaylla-chaylla desgracia pasakusqanmantam noticiakuna chayamuchkan. Enteron nacion purmachisqa kasqanmantam noticiakuna chayamuchkan. Qonqaymantam karpaykunapas purmachisqaña. Huk ratollapim toldoykunapas purmachisqaña.

²¹ ¿Haykapikamaraq guerrapaq banderata qawasaq? ¿Haykapikamaraq cornetapa waqasqanta uyarisaq?

²² Tayta Diosmi nin: Mana yachayniyoq runakunam runaykunaqa. Mana reqsiway munaq runakunam paykunaqa. Sonso churikunam paykunaqa. Mana ancha entiendeq runakunam paykunaqa. Paykunaqa mana allinkuna ruranankupaqmi yachaysapallaña kachkanku. Allinkuna ruranankupaqmi ichaqa mana imapas yachaq kachkanku.

Hamuq punchawkunapi castigokunamanta

²³ Kay pachata qawariptiymi manaña formayoq kachkasqa. Kay pachata qawariptiymi manaña imayoq kachkasqa. Cielokunata qawariptiymi manaña achkiyniyoq kachkasqa.

²⁴ Orqokunata qawariptiymi katkatatachkasqaku. Qawariptiymi llapallan moqokunapas kuyuchkasqaku.

²⁵ Qawariptiymi runakunaqa manaña kasqañachu. Alton pawaq animalkunapas lluptikuspankum manaña kasqañachu.

²⁶ Qawariptiymi tukuy imapa wiñanan allpapas chunnichkasqaña. Qawariptiymi chaypi kaq llapallan llaqtakunapas tuñirusqaña. Chaykunaqa pasachkasqa Tayta Diospa qayllanpim. Chaykunaqa pasachkasqa ancha piñakusqa Diospa qayllanpim.

²⁷ Tayta Diosmi nin: Enteron kay naciontam purmachisaq. Ichaqa manam pasaypaqtachu chinkachisaq.

²⁸ Chaykuna sucedekuptinmi kay pacha lutokunqa. Chaykuna sucedekuptinmi cielokuna tutayarunqa. Rimasqaymantaqa manam cambiasaqchu. Ruranaypaq kasqaymantaqa manam qepaman kutisaqchu.

²⁹ Silladakunapa qapariyninwanmi llaqta runakuna lluptikunku. Flechaqkunapa qapariyninwanmi llaqta runakuna lluptikunku. Montekunamanñam yaykurunku. Qaqakunamanñam seqarunku. Llapallan llaqtakunatam saqerunku. Manaña runayoqtam saqerunku.

³⁰ Yaw llaqta, tuñichisqañam kachkanki. ¿Imapaqñataq guindo pachawanpas pachakunki? ¿Imapaqñataq ñawikikunatapas yanawan pintakunki? Chaykunawan allichakuynikiqa yanqapaqñam. Kuyaqnikikunaqa qepanchakurusunkiñam. Maskasuchkankiqa wañuchisunallaykipaqñam.

³¹ Wachakuq warmi nanaywan qapariqta hinam uyarini. Chayllaraq wachakuq warmipa qapariyninta hinam uyarini. Sion Moqopi llaqtam qaparichkan. Samatyaspam makinkunata hoqarichkan: “¡Ay, imallapiraq rikukuni!” nispa. “¡Runa wañuchiqkunaraykum hukmanyasqa kachkani!” nispa.