Jeremías 39 - Quechua Ayacucho Bible 1987

Jerusalen llaqtata vencesqankumanta

¹ Jerusalen llaqtatam kayna formapi vencerurqaku: Juda nacionpi Rey Sedequias isqon watamanña gobiernachkaptinmi chay watapa chunka kaq killanpi Babilonia nacionpa reynin Nabucodonosor llapa tropankunawan hamururqa Jerusalen llaqtapa contranpi hinaspam muyururqaku atacanankupaq.

² Chunka hukniyoq watamanña Rey Sedequias gobiernachkaptinmi chay watapa tawa kaq killanpa isqon kaq punchawninpi llaqtapa murallanta toqoramurqaku

³ hinaspam yaykuramurqaku Babilonia nacionpa reyninta yanapaq kamachikuqkuna. Chay kamachikuqkunam karqa: Nergal-sarezer, Samgar-nebo, Sarsequim, reypa palacionpi serviqkunapa jefen huknin Nergal-sarezer hinaspa wakin hatun kamachikuqkuna. Paykunamá chay uchkunta yaykuramuspanku chawpi kaq punkupi churakururqaku.

⁴ Juda nacionpa reynin Sedequiasmi lliw soldadonkunapiwan enemigonkuta rikururqaku hinaspam iskay murallapa chawpinpi kaq llaqtapa zaguanninta lloqsiruspanku reypa huertanpa chawpinta tutallan lluptirurqaku. Chaymantam pasarqaku Jordan Qechwaman riq ñanninta.

⁵ Ichaqa Caldea tropakuna qatipaspankum Jerico llaqtapa hichpan pampapi hayparurqaku. Presocharuspankum Hamat lawpi kaq Ribla sutiyoq llaqtaman otaq Rey Nabucodonosorpa kasqanman pusarqaku. Chaypim Sedequiasta juzgaspan sentenciarqa.

⁶ Chay Ribla llaqtapim Rey Sedequiaspa churinkunatawan Juda nacionpi llapallan kamachikuqkunata Sedequiaspa qayllanpi wañuchirqa.

⁷ Sedequiastapas ñawinkunata horqorachispanmi bronce cadenakunawan watarachirqa Babilonia llaqtaman pusanankupaq.

⁸ Caldea tropakunaqa kañaykurqakum reypa palaciontapas chaynataq runankunapa wasinkunatapas, taqmarurqakutaqmi Jerusalen llaqtapa muyuriqninpi murallakunatapas.

⁹ Babilonia nacionpa reyninta cuidaq soldadokunapa jefen Nabuzaradan sutiyoq runañataqmi llaqtapi puchuq runakunatawan kikinkumanta entregakuq runakunata presochasqata pusarqa Babilonia lawman.

¹⁰ Juda lawpiqa saqerurqa wakcha mana imayoq runakunallatañam hinaspam paykunaman qoykarirqa uvas huertakunatawan chakrakunata.

Jeremias libreña kasqanmanta

¹¹ Jeremiasmantam Babilonia nacionpa reynin Nabucodonosor cuidaqnin soldadokunapa jefen Nabuzaradanta kamachirqa:

¹² —Jeremiasta carcelmanta horqoramuspaykiqa nanachikuspaykim ama imanankipaschu. Paypa nisusqaykiman hinam ruranki —nispa.

¹³ Chaynapimá reyta cuidaq soldadokunapa jefen Nabuzadaranqa palaciopi serviqkunapa jefen Nabusazbanpiwan, hatun kamachikuq Nergal-sarezerpiwan hinaspa Babilonia nacionpa reyninta yanapaq wakin kamachikuqkunapiwan.

¹⁴ Kacharqaku carcelpa pationmanta Jeremiasta pusamunankupaq, Jeremiastaqa wasinmanña pusanankupaqmi qoykurqaku Safanpa willkanman otaq Ahicampa churin Gedaliasman chaynapi runakunawan kuska *f**yachananpaq.

Ebed-melecman Tayta Diospa prometesqanmanta

¹⁵ Carcelpa pationpi Jeremias preso kachkaptinraqmi Tayta Dios payta nirqa:

¹⁶ —Israelpa yupaychasqan Llapallan Kamachiq ñoqa Tayta Diospa nisqaytayá Cus nacionniyoq Ebed-melecman kaynata nimuy: “Kay llaqtapa mana allinninpaq rimarisqaykunatam mana favorecespay cumplisaqpuni. Chay punchawkunapi qawachkaptikim chaykuna sucedekunqa.

¹⁷ Ñoqa Tayta Diosmi niki: Chay punchawkunapiqa ñoqam librasqayki chay manchakusqayki runakunamanta.

¹⁸ Ñoqam ninitaq: Guerrapi wañunaykimantam lluptichisqayki. Ñoqapi confiakusqaykiraykum kawsayllapas-kawsankiraq” nispa.