Jeremías 37 - Quechua Ayacucho Bible 1987

Jeremiasta presochasqankumanta

¹ Joacimpa churin Rey Jeconiaspa rantinpim Josiaspa churin Sedequiasña rey karqa. Paytam Babilonia nacionpa reynin Nabucodonosor churarqa Juda nacionpa reynin kananpaq.

² Ichaqa Sedequiasmi serviqninkunapiwan chaynataq nacionpi wakin runakunapiwan mana kasurqakuchu Jeremiaswan Tayta Diospa willachisqan palabrakunata.

³ Rey Sedequiasmi kacharqa Selemiaspa churin Jucaltawan Maasiaspa churin sacerdote Sofoniasta chaynapi Diosmanta willakuq Jeremiasta kaynata nimunankupaq: —Yupaychasqanchik Tayta Diostayá mañapuwayku —nispa.

⁴ Jeremiastaqa manaraqmi carcelarqakuraqchu chaymi llaqtapi libre purikuq.

⁵ Rey Faraonpa tropankunam Egipto nacionmanta lloqsiramurqaku chaymi Jerusalen llaqtapa muyuriqninpi atacaq Caldea runakuna chayta yacharuspanku llaqtamanta asurikurqaku.

⁶ Chaymi willakuqnin Jeremiasta Tayta Dios nirqa:

⁷ —Israelpa yupaychasqan ñoqa Tayta Diosmi kaynata nini: “Ñoqata tapuwanaykichikpaq kachamusuqnikichik Juda nacionpa reynin Sedequiastam nimunkichik: ‘Yanapasunaykichikpaq Egipto nacionmanta lloqsimuq Rey Faraonpa tropankunaqa nacionninkumanmi kutikunku.

⁸ Chaynaqa Caldea tropakunam kutirimunqaku kay llaqtapa contranpi peleanankupaq, paykunaqa venceruspam kañaykunqaku.’

⁹ Ñoqa Tayta Diosmi nini: ‘Caldea tropakunaqa ripukunqakuñam’ nispaqa amayá kallpanchakuychikchu. Manam ripukunqakuchu.

¹⁰ Caldea law llapallan tropakunataña venceruptikichikpas, herido puchuqkunam karpankumanta hatarimuspanku kay llaqtata kañaykunqaku.”

¹¹ Rey Faraonpa tropankuna Jerusalen llaqtaman hamusqankuta yacharuspankum Caldea tropakuna asurikurqaku.

¹² Chay punchawkunapim Jeremiasñataq Jerusalen llaqtamanta asurikunanpaq lloqsichkarqa Benjamin allpapi herencia allpata partimunanpaq.

¹³ Ichaqa Benjamin sutiyoq zaguanninta Jeremias lloqsichkaptinmi Hananiaspa willkan otaq Selemaspa churin Irias hapiruspan nirqa: —Qamqa Caldea runakunaman hukllawakuytam munanki —nispa.

¹⁴ Chaymi Jeremiasñataq nirqa: —Manam chaynachu, Caldea runakunamanqa manam hukllawakuyta munanichu —nispa. Ichaqa Iriasmi mana kasuspan Jeremiasta presocharurqa hinaspam kamachikuqkunaman pusarqa.

¹⁵ Paykunam Jeremiaspaq piñakuruspanku azotechirqaku. Secretario Jonatanpa wasinta carcelman tikraruspankum chaypi carcelarurqaku.

¹⁶ Jeremiasta wasipa pampan ukupi calabozoman churaruptinkum chaypi unay karqa.

¹⁷ Rey Sedequiasmi Jeremiasta palacionman pusarachimuspan pakasqallapi tapuspan nirqa: —Ichapas Tayta Diosqa imallatapas ñoqapaq nisurqanki —nispa. Chaymi Jeremiasñataq nirqa: —Arí, kachkanmi. Babilonia nacionpi reymanmi entregasqa kanki —nispa.

¹⁸ Jeremiasmi Rey Sedequiasta nirqa: —¿Imapitaq ñoqaqa huchallikurqani qampa contraykipi, serviqnikikunapa contranpi chaynataq kay runakunapa contranpipas chaynapi carcelawanankupaq?

¹⁹ ¿Maypitaq kachkan Diosmanta willakuq tukuqkunaqa? Paykunam nisurqankichik: “Babilonia nacionpa reyninqa manam atacanqachu qamkunataqa nitaq kay naciontapas” nispa.

²⁰ Reynilláy, kunanmi ruegakuyki kay mañakusqayta chaskiykuwanaykipaq. Secretario Jonatanpa wasinmanqa amañayá kutichiwaychu chaypi mana wañurunaypaq —nispa.

²¹ Chaymi Rey Sedequias kamachirqa carcelpa patiollanpiña Jeremiasta hatallinankupaq hinaspa Tanta Rantina Callemanta tantata sapa punchaw apamuspa payman qonankupaq. Chaynatam rurarqaku llaqtapi tanta tukurunankama. Sedequiaspa kamachisqanman hinamá Jeremiasqa carcelpa pationpi *f**yacharqa.