Jeremías 36 - Quechua Ayacucho Bible 1987

Librota Baruc leesqanmanta

¹ Josiaspa churin otaq Juda nacionpa reynin Joacim tawa watamanña gobiernachkaptinmi Jeremiasta Tayta Dios nirqa:

² —Israel nacionpa, Juda nacionpa chaynataq llapallan nacionkunapa contranpi rimasqaytayá otaq Josias rey kasqanmantapuni kunan punchawkama willasqaytayá qellqay wankusqa libropi.

³ Juda casta runakunaqa icharaqpas tukuy ima castigokuna kachaykunaypaq piensasqayta uyarispanku sapakama wanakunmanku mana allin kawsasqankumanta hinaptinqa pampachaykuymanmi mana allinkuna rurasqankumantawan huchankumanta —nispa.

⁴ Neriaspa churin Baructa Jeremias qayarachimuspanmi Tayta Diospa tukuy rimapayasqanta willarqa chaymi Barucñataq qellqarqa wankusqa libropi.

⁵ Baructam Jeremias kamachirqa: —Harkasqa kasqayraykum Tayta Diospa templonman mana riyta atinichu.

⁶ Chaynaqa hamuq ayuno punchawpim temploman yaykuspayki qellqachisqay wankusqa librota leemunki chaynapi llapallan runakunapas chaynataq Juda nacion llaqtakunamanta hamuqkunapas Tayta Diospa nisqanta uyarinankupaq.

⁷ Icharaqpas Tayta Diosta ruegakuspanku mana allin kawsasqankumanta wanakunmanku. Tayta Diosqa ancha-anchata piñakuspanmi kay runakunata amenazachkan —nispa.

⁸ Chaymi Neriaspa churin Barucqa Diosmanta willakuq Jeremiaspa tukuy kamachisqanman hina rurarqa hinaspam Tayta Diospa willasqanta templopi leerqa wankusqa libromanta.

⁹ Josiaspa churin otaq Juda nacionpa reynin Joacim pichqa watamanña gobiernachkaptinmi chay watapa isqon kaq killanpi willanakurqaku ayuno punchaw kananpaq chaynapi Jerusalen llaqtayoq runakunapas chaynataq Juda nacion llaqtakunapi llapallan runakunapas Jerusalen llaqtaman hamuspa Tayta Diospa qayllanpi ayunanankupaq.

¹⁰ Hinaptinmi Jeremiaspa qellqachisqanta Baruc leerqa llapallan runakuna uyarinankupaq. Payqa leerqa secretario Safanpa churin Jemariaspa cuartonmantam. Chay cuartoqa karqa hanay law patiopi kaq temploman yaykuna mosoq zaguanpim.

¹¹ Safanpa willkan otaq Gemariaspa churin Micaias wankusqa libropi Tayta Diospa palabrankunata uyariruspanmi

¹² pasarqa reypa palacionpi secretariopa cuartonman. Chaypim llapallan kamachikuqkuna huñunasqa tiyachkarqaku. Paykunam karqa secretario Elisama, Semaiaspa churin Pelaia, Acborpa churin Elnatan, Safanpa churin Gemarias, Hananiaspa churin Sedequias chaynataq wakin kamachikuqkunapas.

¹³ Paykunamanmi Micaias willarqa runakuna uyarinanpaq libropi Barucpa leesqan palabrakunata.

¹⁴ Hinaptinmi llapallan kamachikuqkuna Barucman kacharqaku Netaniaspa churin Jehudita. Netaniasqa karqa Selemiaspa churinmi, Selemiasñataqmi karqa Cusipa churin. Chay Jehudi sutiyoq runawanmá kaynata nichimurqaku: —Runakuna uyarinanpaq leesqayki librota apaspas rinki —nispa. Hinaptinmi wankusqa librota Neriaspa churin aparikuspan chay kamachikuqkunapa kasqanman rirqa.

¹⁵ Paykunam Baructa nirqaku: —Tiyaykuspaykiyá ñoqaykupaq leeykapuwayku —nispa. Chaymi Barucqa paykunapaqpas leepurqa.

¹⁶ Leesqan palabrakunata uyariruspankum mancharisqallaña qawanakurqaku hinaspam Baructa nirqaku: —Cheqaptapunipas llapallan kay palabrakunamantaqa reymanmi willananchikpuni —nispa.

¹⁷ Chaymi Baructa tapurqaku: —Willaykuwaykuyá, Jeremiaspa kay rimasqan palabrakunataqa ¿imaynanpitaq qellqarqanki? —nispa.

¹⁸ Chaymi Barucñataq paykunata nirqa: —Llapallan kay palabrakunataqa Jeremiasmi willawarqa hinaptinmi ñoqañataq tintawan qellqarqani kay libropi —nispa.

¹⁹ Chaymi kamachikuqkunañataq nirqaku: —Rispaykiyá pakakamuy Jeremiaspiwan mana pipapas yachasqanta —nispa.

Librota Rey Joacim kañasqanmanta

²⁰ Secretario Elisamapa despachonpi librota saqeykuspankum yaykurqaku reypa kasqan palacionpa pationman hinaspam reyman willarqaku tukuy chay palabrakunata.

²¹ Chaymi Jehudi sutiyoq runata rey kacharqa Elisamapa despachonmanta librota apamunanpaq. Chayarachimuspanmi leerqa reywan chaypi kaq kamachikuqkuna uyarinanpaq.

²² Isqon kaq killa kasqanraykum reyqa qasa tiempopaq rurachisqan cuartopi tiyachkarqa qonichikuna sansa ñawpaqninpi.

²³ Libropi kaqta kimsa rayata otaq tawa rayata Jehudi leeruptinmi reyñataq secretariopa navajanwan kuchuparurqa hinaspam qonichikusqan sansaman wischuykurqa, chaynata ruraspanmi wankusqa librotaqa qonichikusqan sansapi tukunankama ruparachirqa.

²⁴ Chay llapallan palabrakunata uyarispankuqa manam reypas nitaq serviqninkunapas mancharikurqakuchu nitaqmi huchankuta reqsikuspaqa pachankutapas llikipakurqakuchu.

²⁵ Wankusqa librota rey mana kañananpaqmi ruegarqa Elnatanwan Delaia hinaspa Gemarias. Chaywanpas reyqa manam kasurqachu paykunata.

²⁶ Reyqa kamachirqataqmi kikinpa churin Jerameelta, Azrielpa churin Seriasta chaynataq Abdeelpa churin Selemiastapas chaynapi secretario Baructawan Diosmanta willakuq Jeremiasta presochamunankupaq, ichaqa Tayta Diosmi paykunata pakarurqa.

Mosoqmanta Jeremias qellqachisqanmanta

²⁷ Jeremiaspa willasqanman hina Barucpa qellqasqan wankusqa librota rey kañaruptinmi Jeremiasta Tayta Dios rimapayaspan nirqa:

²⁸ Juda nacion Rey Joacimpa kañarusqan punta kaq libropi tukuy qellqachisqaykitayá mosoq libropiña huktawan qellqachiy.

²⁹ Ñoqa Tayta Diospa nisqaytam Juda nacionpa reynin Joacinman kaynata ninki: “Qanmi kañarqanki chay librota. Jeremiastapas qaqcharqankim chay libropi qellqachisqanmanta. Paymi nirqa: ‘Cheqaptapunim Babilonia nacionpa reynin hamuspan kay nacionta tukunqa manaña runayoq nitaq animalniyoq kanankama’ nispa.

³⁰ Chayraykum ñoqa Tayta Dios niki: Yaw Juda nacionpa reynin Joacim, miraynikimantaqa manam pipas kanqachu Rey Davidpa rantinpi gobiernaq. Ayaykipas punchawpim wischurayanqa chiripi.

³¹ Mana allinkuna rurasqaykichikraykum castigasqayki, castigasaqtaqmi qamtapas, miraynikitapas chaynataq serviqnikikunatapas. Rimasqay castigokunatam kachamusaq paykunapa contranpi, Jerusalen llaqtayoqkunapa contranpi chaynataq Juda nacion runakunapa contranpipas. Chay nisqaykunataqa manamá kasukurqankichikchu” nispa.

³² Neriaspa churin secretario Barucman wankusqa mosoq librota Jeremias qoykuptinmi Baruc qellqarqa Joacimpa kañasqan wankusqa libropi kaqta hinalla. Chaymantapas chay palabrakunaman rikchakuq achka palabrakunataraqmi Jeremiasqa qellqachirqa.