Jeremías 35 - Quechua Ayacucho Bible 1987

Recabpa mirayninkuna kasukusqankumanta

¹ Josiaspa churin Juda nacionpi Rey Joacim gobiernachkaptinmi Jeremiasta Tayta Dios rimapayaspa nirqa:

² —Recabpa mirayninkunaman rispaykiyá paykunawan parlamuy. Templopa huk kaqnin cuartonman pusaykuspaykim paykunaman vinota convidanki —nispa.

³ Chaymi rirqani Jaazaniasta, ayllunkunata, llapallan churinkunata chaynataq Recabpa llapallan castankunata pusamuq. Chay Jaazanias sutiyoq runaqa karqa sapaq Jeremiaspa churinmi. Chay Jeremiasñataqmi karqa Habasiniaspa churin.

⁴ Paykunata temploman pusaykuspaymi yaykuchirqani Hananpa churinkunapa cuartonman, chay Hanan sutiyoq runaqa karqa Igdaliaspa churinmi. Igdaliasñataqmi karqa Tayta Diospa runan. Chay cuartoqa karqa templopi kamachikuqkunapa cuartonpa waqtanpim chaynataq Salumpa churin Maasiaspa cuartonpa altonpim, chay Maasiasqa karqa templopa punkunwan cuentallikuqmi.

⁵ Recabpa mirayninkunapa qayllanpi tachokunaman chaynataq vasokunaman vinota talliykuspaymi nirqani: —Vinotayá tomaykuychik —nispa.

⁶ Ichaqa paykunam niwarqa: —Manam tomaymankuchu. Recabpa churin abueloyku Jonadabmi kamachiwarqaku: “Vinotaqa wiñaypaqmi ama tomankichikchu qamkunapas nitaq miraynikichikpas.

⁷ Amam wasitaqa hatarichinkichikchu, amam tarpunkichikchu, amataqmi uvas huertaykichikpas kanqachu. Kawsanaykichikkamam karpallapi *f**yachankichik chaynapi forastero hina kay *f**yachasqaykichik allpapi unay watakuna kawsanaykichikpaq” nispa.

⁸ Recabpa churin abueloyku Jonadabpa tukuy imapas kamachisqankunata kasukuspaykum vinotaqa mana tomanikuchu ñoqaykupas, warmiykupas chaynataq churiykupas.

⁹ Manataqmi yachanaykupaq wasitapas hatarichinikuchu, manam kapuwankuchu uvas huertaykupas nitaq chakraykupas nitaq tarpukuyniykupas.

¹⁰ Karpakunallapi *f**yachaspaykumá abueloyku Jonadabpa tukuy kamachiwasqankuta kasukuspa rurarqaniku.

¹¹ Ichaqa Babilonia nacionpa reynin Nabucodonor kay nacionpa contranpi hamuruptinmi ninakurqaniku: “Caldea casta tropakunamanta chaynataq Siria casta tropakunamanta lluptikunanchikpaqyá Jerusalen llaqtaman yaykusunchik” nispa. Chayraykum kay Jerusalen llaqtapi *f**yachachkaniku.

¹² Hinaptinmi Jeremiasta Tayta Dios nirqa:

¹³ —Israelpa yupaychasqan Llapallan Kamachiq ñoqa Tayta Diosmi kamachiki. Juda nacionpi runakunamanwan Jerusalen llaqtapi *f**yachaqkunamanyá ñoqa Tayta Diospa nisqayta kaynata nimuy: “Qamkunaqa nisqaykunata mana kasukuspam mana corregikuyta munankichikchu.

¹⁴ Recabpa churin Jonadabmi mirayninkunaman kamachirqa vinota ama tomanankupaq. Chayraykum abuelonkupa kamachisqanta kasukuspanku cumplirqaku kunan punchawkama vinota mana tomaspanku. Ñoqapas mana samaykuspaymi kamachirqaykichik ichaqa manam kasuwarqankichikchu.

¹⁵ Ñoqamanta willakuq serviqniykunawanmi mana samaykuspa nichirqaykichik kaynata: ‘Mana allin vidaykichikta dejaspayá rurasqaykichikkunata allichaychik. Taytacha-mamachakunata adoranaykichikpaqqa amañayá maskaychikchu chaynapi abueloykichikkunamanpas chaynataq qamkunamanpas qosqay allpapi *f**yachanaykichikpaq’ nispa. Ichaqa manam atiendewarqankichikchu nitaqmi kasuwarqankichikchu.

¹⁶ Recabpa churin Jonadabpa mirayninkunam abuelonkupa kamachisqanta cumplirqaku. Runaykunam ichaqa mana kasuwarqakuchu.

¹⁷ Chayraykum Israelpa yupaychasqan Llapallan Kamachiq Ñoqa Tayta Dios kaynata nini: Juda nacionpi kaqkunatawan Jerusalen llaqtapi llapallan *f**yachaqkunata castiganaypaqmi rimasqaykunata kachaykamusaq. Paykunaqa rimapayaptiypas manam kasuwarqakuchu, qayaptiypas manataqmi contestawarqakuchu, nispa.”

¹⁸ Jeremiasqa Recabpa castankunatam nirqataq: —Israelpa yupaychasqan Llapallan Kamachiq Tayta Diosmi nin: “Abueloykichik Jonadabpa kamachisqanta kasukuspa tukuy imapas kamachisusqaykichikta rurasqaykichikraykum

¹⁹ Israelpa yupaychasqan Llapallan Kamachiq ñoqa Tayta Dios nini: Recabpa churin Jonadabpa mirayninkunamantaqa manam haykapipas faltanqachu ñoqata serviwaqniykuna” nispa.