Jeremías 34 - Quechua Ayacucho Bible 1987

Rey Sedequiasta Jeremias qaqchasqanmanta

¹ Babilonia nacionpa reynin Nabucodonosormi llapa tropankunawan chaynataq munaychakusqan nacionkunamanta kaq llapallan runakunapiwan peleachkarqa Jerusalen llaqtapa contranpi, peleachkarqataqmi llapallan llaqtachankunapa contranpipas. Chay tiempopim Jeremiasta Tayta Dios nirqa:

² —Israelpa yupaychasqan ñoqa Tayta Diospa nisqaytayá Juda nacionpa reynin Sedequiasman kaynata nimuy: “Ñoqa Tayta Diosmi Babilonia nacionpa reyninman kay llaqtata qoykusaq kañaykunanpaq.

³ Qamqa manapunim paymantaqa lluptinkichu aswanqa hapirachikuspam payman qosqa kanki. Paywan qawanakuspam uyapura rimanki hinaspañam Babilonia lawman rinki.

⁴ Juda nacionpa reynin yaw Sedequias, chaywanpas ñoqa Tayta Diospa nisqaytayá uyariy: Manam qamqa guerrapichu wañunki.

⁵ Hawkallam wañukunki. Imaynam abueloyki reykunata pampaspa inciensota kañapuqku chaynam qampaqpas inciensota kañanqaku. Qanmanta llakikuywan waqaspankum ninqaku: ‘Ay Reynillayku’ nispa. Ñoqa Tayta Diosmi chaynata nini.”

⁶ Tukuy chay palabrakunata Juda nacionpa reynin Sedequiasman Diosmanta willakuq Jeremias Jerusalen llaqtapi willachkaptinmi

⁷ Babilonia nacion reypa tropankunañataq Jerusalen llaqtapa hinaspa Juda lawpi puchuq llaqtakunapa contranpi peleachkarqa. Paykunaqa peleachkarqa Laquis llaqtapa chaynataq Azeca llaqtapa contranpim. Juda nacionpi murallasqa llaqtakunamantam chay iskaynin llaqtakunallaña puchururqa.

Sirvientenkuta mana kachariy munasqankumanta

⁸ Rey Sedequiasmi sirvientenkuta kacharinankupaq contratota rurarqa Jerusalen llaqtapi llapallan runakunawan. Chay contrato rurasqankupa qepallantam Tayta Dios rimapayarqa Jeremiasman.

⁹ Chay contratoman hinam judiomasin sirvienteyoq otaq sirvientayoq runakunaqa paykunata kacharinanku karqa chaynapi judiomasinkuwanqa amaña pipas servichikunanpaq.

¹⁰ Chay contratoman hinam llapallan kamachikuqkunapas chaynataq wakin runakunapas sapakama sirvientenkuta chaynataq sirvientankuta kacharirqaku hinaspam manaña servichikurqakuchu.

¹¹ Ichaqa chay kachaykusqankupa qepallantam pesakurqaku hinaspam servichikunankupaq kaqllamanta kutichumurqaku.

¹² Chayraykum Jeremiasta Tayta Dios nirqa:

¹³ —Israelpa yupaychasqan ñoqa Tayta Diosmi nini: “Sirviente kachkaptinku Egipto nacionmanta abueloykichikkunata horqoramuspaymi paykunawan contratota rurarqani. Paykunatam kamachirqani:

¹⁴ ‘Sapa qanchis watam castaykichikmanta kaq sirvientekichikta kacharinkichik. Servisunaykichikpaq kikinkumanta rantikususpaykichikqa soqta watallatam cumplinqaku’ nispay. Chaywanpas abueloykichikkunaqa manam kasuwarqakuchu nitaqmi atiendewarqakupaschu.

¹⁵ Qamkunam ichaqa ñoqaman kutirikamuspa agradoypaq hina allinta rurarqankichik, qamkunaqa castamasikichik sirvientekunatam kachaykurqankichik. Chaynata ruranaykichikpaqmi ñoqapaq sapaqchasqa temploypi hinaspa ñoqapa qayllaypi contratota rurarqankichik.

¹⁶ Ichaqa prometewasqaykichikmanta pesakuruspaykichikñataqmi sirvientekichikkunata libretaña kachaykuchkaspapas kaqllamanta kutirachimunkichik servisunaykichikpaq.

¹⁷ Chayraykum ñoqa Tayta Dios nini: Qamkunaqa mana kasuwaspaykichikmi mana kacharirqankichikchu ayllukichiktawan llaqtamasikichikta. Chaynaqa ñoqapas qamkunapa contraykichikpim kachaykamusaq guerrata, peste onqoyta chaynataq yarqaytapas chaynapi kay pachapi nacionkunapas mancharikuspa katkatatanankupaq.

^18-19 —Juda nacionpi chaynataq Jerusalen llaqtapi kamachikuqkunam palaciopi serviqkunapiwan chaynataq llaqtapi llapallan runakunapiwan ñoqapa qayllaypi contratota rurarqaku. Malta torotapas nakaruspankum iskayman partirurqaku hinaspam chawpinta pasarurqaku ichaqa chay contrato rurasqankutaqa manam cumplirqakuchu.

²⁰ Chayraykum wañurachiy munaq enemigonkuman qoykusaq. Paykunapa ayantaqa alton pawaq animalkunawan purun animalkunañam mikunqa.

²¹ Juda nacionpa reynin Sedequiastapas chaynataq yanapaqnin kamachikuqkunatapas qoykusaq paykunata wañurachiy munaq enemigonkunamanñam otaq Babilonia nacion reypa tropankunamanñam. Chay tropakunaqa kutikunkuñam qamkunamanta.

²² Ñoqa Tayta Diosmi nini: Ichaqa paykunata kamachiptiymi kutirimuspanku kay llaqtata atacanqaku. Dueñochakuruspankum kañaykunqaku. Juda nacionpi llaqtakunatapas purmarachisaqmi manaña runayoq kanankama.”