Jeremías 33 - Quechua Ayacucho Bible 1987

Hamuq tiempokunapaq allin willakuymanta

¹ Carcelpa pationpi Jeremias preso kachkaptinraqmi yapamanta Tayta Dios payta rimapayaspan nirqa:

² —Kay pachata unanchaspa tukuy imakunatapas churaq hinaspa takyachiq Tayta Dios sutiyoqmi kaynata niki:

³ Mañakuwaptikiqa contestasqaykim. Yachachisqaykim mana reqsisqayki hatun kaqkunatawan sasa entiendena kaqkunata.

^4-5 Kay llaqtapi tuñichinanku wasikunamantawan Juda nacion reykunapa wasinmantam Israelpa yupaychasqan ñoqa Tayta Dios nini: Caldea runakunam kay llaqtata atacanankupaq murallapa qepanpi allpata montorunqaku, guerrapi peleanankupaq lloqsimuqkunapa ayankunawanmi chay wasikunata huntarachinqaku. Ancha piñakuyniywanmi paykunataqa wañurachisaq. Kay llaqtataqa manañam favoreceniñachu mana allinkunata rurasqankurayku.

⁶ Chaywanpas kay llaqtapi runakunataqa hampispaymi sanoyaykachisaq, paykunataqa mana imankupas faltaqtam hawkallata chaynataq segurota kawsachisaq.

⁷ Preso pusachisqaymanta Juda casta runakunatawan Israel casta runakunata kutichimuptiymi ñawpaq tiempokunapi hinaraq kanqaku, wasita hatarichichkaq hinam paykunataqa kaqllamanta hatarichisaq.

⁸ Ñoqapa contraypi huchallikusqankutam chuyanchasaq. Mana kasuwaspanku tukuy huchallikusqankumantam pampachasaq.

⁹ Tukuy allinkuna rurasqaymanta uyariq kay pachapi llapa nacionkunapaqmi kay Jerusalen llaqta kanqa kusichiqniy, alabaqniy hinaspa yupaychaqniy. Kay llaqtapaq tukuy allinkuna rurasqaymantam chay nacionkuna mancharikuspa katkatatanqa.

^10-11 —Qamkunam ninkichik: “Kay llaqtaqa manaña runayoqmi hinaspa manaña animalniyoqmi chunnichkan. Juda nacionpi llaqtakunam Jerusalen llaqtapi callekunapiwan mana runayoq, mana piyniyoq hinaspa mana animalniyoq purmachisqa kachkan” nispa. Ñoqa Tayta Diosmi nini: Chaywanpas kay sitiopim uyarinqaku runakunapa kusikuymanta qapariyninkuta, asikuyninkuta chaynataq casarakuqkunapa fiesta rurasqankutapas. Uyarikunqataqmi runakunapa kayna nisqankupas: “¡Allin kasqanraykuyá Llapallan Kamachiq Tayta Diosman graciasta qoychik! ¡Wiñaypaq kuyapayakuq kasqanraykuyá Tayta Diosman graciasta qoychik!” Graciasta qowanankupaqmi ofrendankutapas temploman apamunqaku. Huklaw nacionkunaman preso pusachisqaymanta kutichimuptiymi ñawpaq tiempokunapi hinaña kanqaku. Ñoqa Tayta Diosmi chaynata nini.

¹² —Llapallan Kamachiq ñoqa Tayta Diosmi nini: Mana runayoq hinaspa mana animalniyoq kay chunniq sitiopim chaynataq llapallan llaqtakunapim kaqllamanta pastokuna kanqa hinaptinmi michiqkunapas animalninkuta chaypi samachinqaku.

¹³ Ñoqa Tayta Diosmi nini: Ovejakunam kaqllamanta yupasqa kanqa orqo law llaqtakunapipas, waqta law llaqtakunapipas, Neguev law llaqtakunapipas, Benjamin allpapipas, Jerusalen llaqtapa muyuriqninkunapipas chaynataq Juda nacion llaqtakunapipas.

¹⁴ —Ñoqa Tayta Diosmi nini: Hamuchkanmi punchawkuna Israel casta runakunatawan Juda casta runakunata favorecespa prometesqaykunata cumplinaypaq.

¹⁵ Chay punchawkunapimá Rey Davidpa castantapuni hatarichisaq. Chay punchawkunapimá allinta ikllichichkaq hina paypa castanta hatarichisaq. Allin arreglotam payqa ruranqa. Allinta ruraspam kay pachapi gobiernanqa.

¹⁶ Paypa tiemponpim Juda nacion salvasqa kanqa. Paypa tiemponpim Jerusalen llaqta seguro *f**yachanqa. Runakunam kaynata sutichanqaku: “Allinyachiwaqninchik Tayta Dios” nispam sutichanqaku.

¹⁷ —Ñoqa Tayta Diosmi nini: Davidpa mirayninmanta Israel casta runakunapi gobiernaqqa manam faltanqachu.

¹⁸ Manataqmi faltanqachu Leviy castamanta sacerdotekunapas chaynapi lliw kañana animalkunata, kawsaykunamanta ofrendakunata chaynataq wakin wañuchisqa animalkunatapas ñoqapa qayllaypi sapa punchaw ofrecewanankupaq, nispa.

¹⁹ Tayta Diosmi Jeremiasta rimapayaspan nirqa:

²⁰ —Ñoqa Tayta Diosmi kaynata nini: Punchawwan chaynataq tutawan contrato rurasqayman hina tiempollanpi sucedenantaqa manam pakiwaqchu.

²¹ Manataqmi pakinqachu serviqniy Davidwan contrato rurasqaypas. Davidpa mirayninmanta gobiernaq reyqa kanqapunim. Serviqniy sacerdotekunawan otaq Leviy castakunawan contrato rurasqaypas cumplikunqapunim.

²² Serviqniy Davidpa mirayninkunatawan Leviy castakunatam mirachisaq. Cielokunapi mana yupay atina lucerokunatapas hinaraqmi chaynataq lamar qochapi manaña tupuy atina aqotapas hinaraqmi paykunataqa mirarachisaq, nispa.

²³ Tayta Diosmi Jeremiasta rimapayaspan nirqa:

²⁴ —¿Manachum uyarirqanki huklaw nacionpi kaqkunapa rimasqanta? Paykunam nichkanku: “Tayta Diosqa akllasqan iskaynin castakunatam cheqnipakurun” nispa. Chayraykumá runaykunataqa despreciaspanku nacion kasqanpaqpas manaña qawarinkuchu.

²⁵ Ñoqa Tayta Diosmi kaynata nini: Punchawwan chaynataq tutawanmi contratota rurarqani, cielokunapipas kay pachapipas decretoykunatam churarqani.

²⁶ Chaynaqa Jacobpa mirayninkunataqa chaynataq serviqniy Davidpa mirayninkunataqa manam haykapipas qepanchakusaqchu. Paykunamanta kaqkunam gobiernanqa Abrahampa, Isaacpa chaynataq Jacobpa mirayninkunata. Huklaw nacionkunaman preso pusachisqay runakunata kutichimuspaymi paykunamanta llakipayarikusaq.