Jeremías 32 - Quechua Ayacucho Bible 1987

Jeremiaspa chakra rantisqanmanta

¹ Juda nacionpi Rey Sedequias chunka watamanña gobiernachkaptinmi chaynataq Rey Nabucodonosorpas chunka soqtayoq watamanña gobiernachkaptinmi Jeremiasta Tayta Dios rimapayarqa.

² Chay tiempopim Babilonia nacion Rey Nabucodonosorpa tropankuna Jerusalen llaqtata muyururqaku. Diosmanta willakuq Jeremiasñataqmi carcelpa pationpi preso kachkarqa. Chay carcelqa karqa Juda nacion reypa wasinpim.

³ Juda nacionpa reynin Sedequiasmi Jeremiasta presocharachirqa kaynata nispa: —¿Imanasqataq Diosmanta willakuq tukuspayki ninki: “¡Ñoqa Tayta Diosmi nisqayman hina Babilonia nacionpa reyninman kay llaqtata qoykusaq vencerunanpaq.

⁴ Juda nacionpa reynin Sedequiaspas Caldea runakunamantaqa manam lluptinqachu. Babilonia nacionpa reyninwanmi qawanakuspa uyapura parlanqa.

⁵ Paymi Rey Sedequiasta Babilonia llaqtaman pusachinqa paymanta yuyarispay favorecenaykama. Ñoqa Tayta Diosmi nini: Caldea runakunawan peleaspapas manapunim vencenkichikchu” nispa.

⁶ Chaymi Jeremiasñataq nirqa: —Tayta Diosmá kaynata niwarqa:

⁷ “Tioyki Salumpa churin Hanameel hamuspanmi nisunki: ‘Anatot llaqtapi chakraytayá rantiruway, qamqariki aylluy kasqaykiraykum reclamanaykipaq derechoyoq kachkanki’ nispa.”

⁸ Tayta Diospa niwasqanman hinamá carcelpa patioman primoy Hanameel hamuruspan niwarqa: —Benjamin allpapi kaq Anatot llaqtapi herencia chakraytayá rantiruway. Qamqariki aylluy kasqaykiraykum chay herencia allpata reclamanaykipaq derechoyoq kachkanki —nispa. Chay asuntoqa Tayta Diospa kamachisqanman hina kasqanta cuentata qokuruspaymi

⁹ Anatot llaqtapi kaq chakranta rantirurqani yaqa iskay pachak gramo qollqewan.

¹⁰ Rantikuwasqan contrato escrituratam sellarachispay testigokunawan firmachirqani hinaspam qollqeta pesaspay qorqani.

¹¹ Leyman hina chaynataq costumbreman hina rantikuwasqan wichqasqa escrituratawan kicharayaq copiata chaskiykuspaymi

¹² qoykurqani Neriaspa churin Barucman, chaytaqa qoykurqani primoy Hanameelpa qayllanpim, escritura firmaq testigokunapa qayllanpim chaynataq carcelpa pationpi tiyaq Juda casta runakunapa qayllanpim. Neriasqa karqa Maasiaspa churinmi.

¹³ Paykunapa qayllanpim Baructa kamachirqani kaynata:

¹⁴ —Israelpa yupaychasqan Llapallan Kamachiq Tayta Diosmi kaynata nisunki: “Wichqasqa escrituratayá kicharayachkaq copiantawan apaspayki allpa mankapi churaramuy unay watakuna durananpaq.

¹⁵ Israelpa yupaychasqan Llapallan Kamachiq Tayta Diosmi nin: Kay nacionpiqa yapatawanmi rantinqaku wasikunata, chakrakunata chaynataq uvas huertakunatapas, nispa.”

Tayta Diosta Jeremiaspa mañakusqanmanta

¹⁶ Neriaspa churin Barucman escriturata qoykuspaymi Tayta Diosta mañakurqani:

¹⁷ —Señor Diosnilláy, qamqa hatu-hatun atiynikiwanmi cielokunatawan kay pachata unancharqanki. Qampaqqa manam kanchu imapas mana ruray atinaykipaq hinaqa.

¹⁸ Qamqa waranqantin runakunatam llakipayanki ichaqa tayta-mamanpa huchanmantapas qepa wiñaqkunatam castiganki. Ancha hatun hinaspa ancha atiyniyoq Diosnilláy, qampa sutikiqa Llapallan Kamachiq Tayta Diosmi.

¹⁹ Tanteasqaykikunaqa ancha hatunmi, rurasqaykikunapas ancha hatunmi, rurasqaykikunapas ancha atiyniyoqmi. Qamqa qawachkankim runakunapa kawsasqantaqa chaynapi kawsasqankuman hina chaynataq imam rurasqankuman hina paganaykipaq.

²⁰ Egipto nacionpim señalkunatawan milagrokunata rurarqanki Israel casta runakuna ukupi chaynataq wakin runakuna ukupipas chaynapi kunan punchawpi hina ancha reqsisqa kanaykipaq.

²¹ Qamqa sinchi atiynikiwanmi hatun castigowan, señalkunawan chaynataq milagrokunawan llapallanpa qawasqanta Israel casta runaykikunata Egipto nacionmanta horqomurqanki.

²² Juramentaspa abueloykuman qonayki kay tukuy imapa wiñanan allpatam paykunaman qorqanki.

²³ Chaymi kay allpaman yaykumuspanku dueñochakurqaku ichaqa nisqaykitawan yachachikuynikitam mana kasukurqakuchu nitaqmi kawsarqakupas kamachisqaykiman hinachu, chayraykum qampas tukuy kay castigokunata kachaykamunki.

²⁴ —Caldea law runakunam yaykumunankupaq llaqtapa qepanman allpata huntarachinku. Llaqtataqa chay peleaq runakunawanmi vencerachinki guerrawan, yarqaywan chaynataq peste onqoywan. Qawasqaykipi hinapas qampa nisqaykiman hinam tukuy ima pasakuchkan.

²⁵ Señor Diosnilláy, Caldea runakunamanña kay llaqtataqa qoykuchkaspaykipas niwarqankiraqmi chay chakrata testigokunapa qayllanpi rantinaypaq.

²⁶ Tayta Diosmi nirqa Jeremiasta:

²⁷ —Llapallan runakunapa yupaychanan Tayta Diosmi ñoqaqa kani. Ñoqapaqqa manam kanchu imapas mana ruray atinaypaq hinaqa.

²⁸ Chaynaqa ñoqa Tayta Diosmi niki: Kunanmi kay llaqtata qoykusaq Caldea runakunamanwan Babilonia nacionpa reynin Nabucodonosorman. Paykunapa vencesqanñam kanqa.

²⁹ Kay llaqtapa contranpi Caldea runakuna yaykuramuspankum llaqtata kañaykunqaku. Kañaykunqakumá Baal sutiyoq taytachaman inciensota kañananku hinaspa wakin taytacha-mamachakunamanpas vino hichananku altosniyoq wasikunatapas. Chay wasikunataqa rurarqa ñoqata piñachiwanankupaqmi.

³⁰ Ñoqa Tayta Diosmi nini: Israelpa mirayninmi Judapa mirayninpiwan warma kayninkumantapuni qayllaypi mana allinkunata rurarqaku. Israelpa mirayninqa taytacha-mamachakunata ruraspankum piñachiwayllapi rirqaku.

³¹ Kay llaqtaqa hatarichisqa kasqanmantapunim rabiachiwaspan piñachiqniy llaqta karqa. Chayraykum qayllaymanta qarqosaq.

³² Rabiachiwananpaqmi tukuy mana allinkunata rurarqaku Israelpa mirayninpiwan Judapa mirayninkuna otaq paykunapa reyninkuna, kamachiqninkuna, sacerdotenkuna, ñoqamanta willaqninkuna chaynataq Juda nacionniyoqkunawan Jerusalen llaqtapi yachaqkunapas.

³³ Paykunaqa qepanchakuruwaspankum manaña qawariwanñachu. Mana tanispa yachachichkaptiypas manam kasuwarqakuchu nitaqmi corregikuytapas munarqakuchu.

³⁴ Ñoqapaq sapaqchasqa templomanpas millakuypaq taytacha-mamachakunataraqmi churarunku. Manaña asuykunaypaq hinamá chaynataqa rurarunku.

³⁵ Ben-hinom sutiyoq wayqopipas Baal sutiyoq taytachapaqmi capillakunata moqokunapi hatarichirqaku chaynapi churi-wawankuta Moloc sutiyoq taytachaman kañanankupaq. Chaynata ruraspankum Juda nacionpi runakunata huchallichirqaku. Chay millakuypaq rurasqankutaqa manam kamachirqanichu nitaqmi piensayllapas-piensarqanichu.

Hamuq tiempokunapaq Tayta Dios prometesqanmanta

³⁶ —Israelpa yupaychasqan ñoqa Tayta Diosmi nini: Kay llaqtamantam nichkanki: “Kay llaqtapi runakuna guerrawan, yarqaywan chaynataq peste onqoywan ñakariptinmi Babilonia nacionpa reynin vencerunqa” nispa.

³⁷ Chaywanpas rabiaspay chaynataq anchata piñakuspay llapallan nacionkunaman preso pusachisqaymantam huñumusaq, kay sitioman kutichimuptiymi hawkaña *f**yachanqaku.

³⁸ Paykunaqa runaykunaña kaptinmi ñoqañataq Diosninku kasaq.

³⁹ Paykunataqa tukuy tiempopi respetawaspa kawsaqtañam rurasaq, chaynataqa rurasaq allinninkupaqmi chaynataq qepa wiñay churi-wawankupa allinninkupaqmi.

⁴⁰ Paykunawanqa wiñaypaq contratotañam rurasaq chaynapi mana qepaman kutispay paykunata favorecenaypaq. Respetawanankupaq ñoqaman sonqotaña ruraptiymi manaña rakikuwanqakuchu.

⁴¹ Paykunata favorecespaymi paykunamanta kusikusaq. Cheqaptapunipas tukuy sonqoywan munaspaymi plantachkaq hina kay allpapi kawsachisaq.

⁴² —Ñoqa Tayta Diosmi nini: Kay runakunamanmi tukuy kay hatu-hatun castigota kachamurqani, chaynatapunim kunan rimarisqayman hina paykunataqa tukuypi favorecesaq.

⁴³ “Kay nacionqa Caldea runakunaman qosqa kaspanmi manaña runayoq hinaspa manaña animalniyoq chunninqa” nispa nichkaspapas qamkunaqa kay allpapim kaqllamanta chakrakunata rantinkichik.

⁴⁴ Ñoqa Tayta Diosmi nini: Chakrakunata qollqewan rantispaykichikmi escrituratapas sellachispa testigokunawan firmachinkichik. Chaynatam rurankichik Benjamin allpapi, Jerusalen llaqtapa muyuriqninkunapi, Juda nacion llaqtakunapi otaq moqokunapi kaq llaqtakunapi, waqtakunapi kaq llaqtakunapi chaynataq Neguev law llaqtakunapipas. Chaynaqa kanqa huklaw nacionkunaman preso pusachisqaymanta paykunata kutichimuptiymi.