Jeremías 31 - Quechua Ayacucho Bible 1987

Israelpa mirayninkuna allpankuman kutinankumanta

¹ Tayta Diosmi kaynata nin: —Chay tiempopim Israel casta llapallan runakunapa Diosnin kasaq. Paykunañataqmi runaykuna kanqa —nispa.

² Tayta Diosmi nin: Guerrapi wañunankumanta lluptiq runakunatam chunniqpi favorecerqani. Samanankupaq sitiota maskaq Israel casta runakunatam favorecerqani.

³ Unaymantaraqmi Tayta Diosqa rikuriwarqanchik. Hinaspam payqa kaynata niwarqanchik: Wiñaypaq kuyakuywanmi qayarqayki. Chayna kuyasqayman hinallam kuyapayachkayki.

⁴ Sipasman rikchakuq Israel casta runakuna, qamkunataqa kaqllamantam hatarichisqaykichik. Tinyaykichiktapas mosoqmantam allichankichik. Kusikuymanta tusuqmi lloqsinkichik.

⁵ Samaria moqokunapim uvas huertakunata mosoqmanta hatarichinki. Uvas huertapi plantaqkunam plantanqa. Chaypa rurunkunatam paykunaqa provechanqa.

⁶ Hamuchkanmi punchawkuna cuidaqkuna qaparinankupaq, Efrain orqokunapi cuidaqkuna qaparinankupaq, “Hakuchik Sion Moqopi llaqtaman” nispa ninankupaq. “Yupaychasqanchik Tayta Diosman risunchik” ninankupaq.

⁷ Tayta Diosmi kaynata nin: Jacobpa castankunaraykuyá kusikuywan takiychik. Nacionkunamanta puntapi kaqmantayá qapariychik. Qapariyllawanña alabaspayá kaynata niychik: “¡Tayta Diosmi runankunata salvaykun!” nispayá niychik. “¡Israel castamanta puchuqkunatam salvaykun!” nispayá niychik.

⁸ Norte lawpi nacionmantam kutichimusaq. Kay pachapa cantonmantaraqmi huñumusaq. Ñawsakunawan wistukunam paykunawan hamunqa. Wiksayoq warmikunawan wachakuqkunam hamunqa. Paykunaqa achkallaña huñunasqam kutimunqa.

⁹ Paykunata pusamuptiymi waqastin hamunqaku. Paykunata pusamuptiymi ruegakustin hamunqaku. Yakuyoq wayqonkunatam purichimusaq. Mana mitkanankupaqmi pampallanta purichimusaq. Ñoqaqa kani Israel casta runakunapa taytanmi. Ñoqaqa kani piwiy Efrain castapa taytanmi.

¹⁰ Nacionkuna, Tayta Diospa palabrantayá uyariychik. Lamar qochapa waklawninpi kaqkunamanyá willaychik: “Israel castata cheqechiq Tayta Diosmi huñumunqa. Ovejakunata michiq hinam paykunataqa waqaychanqa.”

¹¹ Tayta Diosmi Jacobpa castanta librarqa. Paykunamantapas atiyniyoq nacionmantam salvarqa.

¹² Sion Moqomanmi takistin hamunqaku. Tayta Dios bendeciykuptinmi kusikunqaku. Kusikunqakuqa trigonkupas, vinonkupas, aceitenkupas kaptinmi. Kusikunqakuqa ovejankupas chaynataq vacankupas miraptinmi. Yakuyoq huerta hinam kanqa paykunaqa. Manaña hukmanyaqmi kanqa paykunaqa.

¹³ Doncellakunam kusikuymanta tusunqaku. Mozokunapiwan machukunam kusikunqaku. Waqasqankumantam kusikunankupaqña consuelasaq. Waqasqankumantapas astawanraqmi kusichisaq.

¹⁴ Ñoqa Tayta Diosmi nini: Sacerdotekunamanmi allinnin mikuykunata qosaq. Runaykunatam allinkuna qosqaywan saksachisaq.

¹⁵ Ñoqa Tayta Diosmi nini: Rama llaqtapim huk kaqninpa qapariynin uyarikuchkan. Puraminti llakikuywan waqasqanmi uyarikuchkan. Raquelmi wawankunamanta waqachkan. Consuelasqa kaytapas manaña munaspanmi waqachkan. Wawankuna manaña kasqanraykum waqachkan.

¹⁶ Chaywanpas Tayta Diosmi nin: Raquel, amañayá mastaqa waqaychu. Weqekitaqa amañayá usuchiychu. Ñoqa Tayta Diosmi nini: Pagasqam kanki rurasqaykikunamantaqa Kutimunqakum enemigopa allpanmantaqa.

¹⁷ Ñoqa Tayta Diosmi nini: Allin punchawkunam qamkunapaq kanqa. Wawaykikunam allpankuman kutimunqa.

¹⁸ Efrain castapa kayna quejakusqantam uyarini: “Manaraq mansasqa torota hinam corregiwarqanki. Chaymi ñoqaqa corregisqa karqani. Qampuni kutirichillawaptikim kutirimusqayki. Qamqa Diosniy kasqaykiraykum kutirimusqayki.

¹⁹ Ñoqaqariki rakikurqanim qanmanta ichaqa wanakullanim chay rurasqaymanta. Huchaykunatam reqsikullani. Qasqoytam takakullani. Mozo kayniypim huchallikurqani. Penqakuspaymi kunan humillakuni.”

²⁰ Ñoqa Tayta Diosmi nini: Kuyayllapaq churiy hinam Efrain castaqa. Kuyasqay warmay hinam Efrain castaqa. Qaqcharuspaypas manam qonqanichu paytaqa. Sonqoypas anchatam waqan paymantaqa. Anchallatañam llakikuni paymantaqa.

²¹ Sipasman rikchakuq Israel casta runakuna, ñanpiyá señalkunata churaychik chaylla ñanta tarinaykichikpaq. Sumaqtayá ñanta qawariychik chayninta purinaykichikpaq. Llaqtaykichikmanyá kutirimuychik chaykunapi *f**yachanaykichikpaq.

²² Mana kasukuq sipasman rikchakuq runakuna ¿haykapikamataq kankichik kaypi-chaypi puriqkuna? Ñoqa Tayta Diosmi rurasaq mana haykapipas rikusqaykichikta. Kay pachapim rurasaq mana haykapipas rikusqaykichikta: Warmiñam nanachikunqa qarimanta.

Israel castakuna hamuq tiempopi favorecesqa kanankumanta

²³ Israelpa yupaychasqan Llapallan Kamachiq Tayta Diosmi nin: —Preso pusachisqay runakunata kutichimuptiymi kay Juda allpankupi chaynataq llaqtankupi *f**yachaspanku kaqllamanta ninqaku: “Yaw allinkuna rurananku sitio, Tayta Diospaq sapaqchasqa moqo, qamtaqa Tayta Diosmi bendecesunki” nispa.

²⁴ Chaypim *f**yachanqaku Juda nacionniyoq runakuna, llaqtakunapi *f**yachaqkuna, chakrayoqkuna chaynataq ganado qatiqkunapas.

²⁵ Pisipasqakunaman tomaykachispaymi yarqasqakunatapas saksaykachisaqtaq —nispa.

²⁶ Chaymantam rikchariruspay qawaykacharikurqani. Miskillatañam ñoqaqa puñurusqani.

²⁷ Tayta Diosmi nin: —Hamuchkanmi punchawkuna Israel casta runakunatapas chaynataq Juda casta runakunatapas animalnintinta mirachinaypaq.

²⁸ Imaynam chaylla karqani paykunata tuñichinaypaq, plantata pilachkaq hina horqonaypaq, taqmanaypaq chaynataq tukunaypaq, chaynallataqmi chaylla kasaq paykunata hatarichispay plantata hina takyachinaypaqpas. Ñoqa Tayta Diosmi chaynata nini.

²⁹ —Chay punchawkunapiqa manañam yapamanta ninqakuchu: “Tayta-mamakuna puchqo uvasta mikurusqanraykum churi-wawankupa kirun sallirun” nispa.

³⁰ Pipas puchqo uvasta mikuruptinqa kirunmi sallirunqa. Sapakamam wañunqa mana allin rurasqanmantaqa.

³¹ Tayta Diosmi nin: —Hamuchkanmi punchawkuna Israel castakunawan chaynataq Juda castakunawan mosoq contratota ruranaypaq.

³² Ichaqa manam abuelonkuwan contrato rurasqayta hinachu rurasaq, paykunatam Egipto nacionmanta makinmanta aysamuchkaq hina horqomurqani. Qosanku hina kachkaptiypas manamá chay contratotaqa cumplirqakuchu.

³³ Chay punchawkuna pasaruptinmi Israel castakunawan contrato ruranayqa ñoqa Tayta Diospa nisqayman hina kayna kanqa: yachachikuyniytam sonqonkupi churasaq, qellqasaqtaqmi yuyayninkupipas. Paykunapaqmi Diosninku kasaq, paykunañataqmi runaykunaña kanqa.

³⁴ Ñoqa Tayta Diosmi nini: Ñoqata reqsiwanankupaqqa amistadpurapas nitaq ayllupurapas manañam yachachinakunqañachu. Llapallankuñam warmakunapas chaynataq yuyayniyoqkunapas reqsiwanqaku. Mana allin rurasqankuta pampachaspaymi huchankutaqa manaña yuyarisaqchu —nispa.

³⁵ Punchawpi achkinanpaq inti churaqmi, killatapas lucerokunatapas tutapi achkinanpaq churaqmi, lamar qochata kuyuchispan olankunapas qaparichiqmi otaq llapallan kamachiq Tayta Dios sutiyoqmi

³⁶ kaynata nin: Huk kaqnin punchawpi decretoykuna chinkarunman hinaptinqa Israel runakunapas manañam nacionniychu kanman.

³⁷ Ñoqa Tayta Diosmá nini: Sichu cielokunata tupuruptinkuqa, kay pachatapas cimientonkama aspiruptinkuqa Israelpa mirayninkunatapas qepanchakuruymanmi. Tukuy rurasqankumantaqa qepanchakuruymanmi. Ñoqa Tayta Diosmi chaynata nini.

³⁸ Tayta Diosmi nin: —Hamuchkanmi punchawkuna Hananeelpa torrenmanta esquina zaguankama mosoqmanta ñoqa Tayta Diospaq llaqtata hatarichinankupaq.

³⁹ Tupusqanku waskam derecholla pasanqa Gareb moqokama hinaspam muyurimunqa Goa lawman.

⁴⁰ Chaymantam pasanqa ayakuna wischunanku otaq uchpa wischunanku wayqonta Cedron Wayqokama. Chaymantañataqmi pasanqa Caballokunapa Zaguanninkama. Chay zaguanqa kachkan intipa qespimunan lawpim. Tukuy chaykunaqa ñoqa Tayta Diospaq sapaqchasqam kanqa. Chaypi tarikuq llaqtataqa manañam haykapipas tuñichinqakuchu nitaq purmachinqakuchu.