Jeremías 30 - Quechua Ayacucho Bible 1987

Runakunapaq Tayta Diospa prometesqanmanta

¹ Tayta Diosmi Jeremiasta rimapayaspan nirqa:

² —Israelpa yupaychasqan ñoqa Tayta Diospa tukuy nisqaykunatayá libropi qellqay:

³ “Hamuchkanmi tiempo Israel castamanta chaynataq Juda castamanta runaykunata preso pusasqa kasqankumanta kutichimunaypaq. Ñoqa Tayta Diosmi nini: Paykunataqa dueñochakunankupaqmi kutichimusaq abuelonkuman qosqay allpaman” nispa.

⁴ Israel castakunaman chaynataq Juda castakunaman Tayta Diospa rimasqankunaqa kaynam.

⁵ Ñoqa Tayta Diosmi nini: “Mancharikuqkunapa qaparisqanmi uyarikuchkan. Mana hawka kaqkunapa mancharikusqanmi uyarikuchkan.

⁶ Tapukamuspa yachamuychik sumaqta: ¿Qariqa wachakunmanchum wawata? ¿Imanasqataq qarikunata qawani wachakuchkaq warmikuna hina wiksanku hapikuqta? ¿Imanasqataq qarikunata qawani wachakuchkaq warmikuna hina uyankupas ayayarusqata?

⁷ ¡Ay ancha mancharikuypaq punchawkunam hamuchkan! ¡Ay mana igualay atina punchawkunam hamuchkan! Jacob casta runakunapaqmi sasachakuy tiempo kanqa. Chaywanpas paykunaqa chaykunamanta librasqam kanqa.

⁸ Llapallan Kamachiq ñoqa Tayta Diosmi nini: Chay punchawkunapim yugomanta kacharichkaq hina librasqaykichik. Yugopa coyundanta tipichkaq hinam librasqaykichik. Huklaw nacionniyoqkunata manaña servinaykichikpaqmi librasqaykichik.

⁹ Yupaychasqaykichik ñoqa Tayta Diostañam serviwankichik. Reynikichikpaq churasqay Davidtam servinkichik.

Runankunata Tayta Dios salvananmant

¹⁰ Ñoqa Tayta Diosmi nini: Serviqniy Jacobpa castankuna, qamkunaqa amayá manchakuychikchu. Israelpa miraynin runakuna, qamkunaqa amayá hukmanyaychikchu. Karu nacionkunamantam libramusqaykichik. Miraynikichiktawan kuskatam libramusqaykichik. Preso risqaykichik nacionmantam libramusqaykichik. Jacob castakunaqa kutikamuspaykichikmi hawkaña kawsakunkichik. Manaña pipapas manchachisqanmi hawkaña kawsakunkichik.

¹¹ Ñoqa Tayta Diosmi nini: Qamkunataqa salvasqaykichikmi ñoqaqa. Cheqerachiptiymi nacionkunapi kankichik qamkunaqa. Ñoqapunim chinkarachisaq chay llapallan nacionkunataqa. Chaywanpas manam chinkachisqaykichikchu qamkunataqa. Faltaykichikmantaqa corregisqaykichikmi qamkunataqa. Manam lluptinkichikchu ñoqapa castigoymantaqa.”

¹² Tayta Diosmi kaynata nin: Manaña hampiy atinam heridaykiqa. Manaña remedioyoqmi onqoynikiqa.

¹³ Manañam pipas nanachikusuqnikiqa kanchu. Heridayki hampiykuqqa manañam pipas kanchu. Sanoyachisunaykipaq remediopas manañam kanchu.

¹⁴ Kuyaqnikikunaqa manañam yuyasunkiñachu. Qanmantaqa manañam tapukunkupasñachu. Mana allinllataña rurasqaykiraykum enemigoyki hina castigarqayki. Huchaykikuna achkallaña kasqanraykum llumpayllataña corregirqayki.

¹⁵ ¿Imanasqataq heridaykirayku qaparinki? Manaña hampiy atinam qampaqa nanayniki. Mana allin rurasqaykiraykum rurarqayki chaynataqa. Achkallaña huchaykikuna kasqanraykum rurarqayki chaynataqa.

¹⁶ Mikuchkaq hina tukusuqniki runakunaqa tukusqam kanqaku. Llapallan contraykipi kaqkunaqa preso pusasqam kanqaku. Saqueasqam kanqaku saqueaqnikikunaqa. Qechusqam kanqaku qechusuqnikikunaqa.

¹⁷ Ñoqa Tayta Diosmi nini: “Sion Moqopi llaqtaqa wischusqañam” niptinkupas, “Manañam pipas nanachikunchu” niptinkupas qamtaqa sanoyachisqaykim. Heridaykikunamantaqa hampisqaykim.

¹⁸ Tayta Diosmi kaynata nin: Jacob casta runakunapa *f**yachanantam favorecesaq. Paykunapa *f**yachanankunamantam llakipayarikusaq. Tuñirusqan sitiopim llaqtapas hatarichisqa kanqa. Palaciopas maymi kasqanpim hatarichisqa kanqa.

¹⁹ Chaypi yachaqkunam agradecekuwaspanku takinqaku. Runakunam anchallaña kusikuymanta qaparinqaku. Paykunata achkayachiptiymi manaña pisinqakuchu. Ancha reqsisqata ruraptiymi manaña humillachinqakuchu.

²⁰ Ñawpaq watakunapi hinam kanqa mirayninkupas. Ñoqapa qayllaypim takyanqa huñunasqa runankunapas. Ñoqapa castigasqaymi kanqa ñakarichiqninkunapas.

²¹ Ñoqa Tayta Diosmi nini: Paykunamantam kanqa pusaqninku. Kikillankumantam kanqa gobiernaqninku. Asuykachiptiymi pay asuykamuwanqa. ¿Pitaq asuykuwanman kikillanmantaqa?

²² Qamkunam runaykuna kankichik. Ñoqañataqmi kasaq Diosnikichik.

²³ Sinchi wayra hinaraqmi Tayta Diospa piñakuyninqa. Muyuq wayra hinaraqmi Tayta Diospa piñakuyninqa. Mana allin ruraqkunapa contranpim kachkan paypa piñakuyninqa.

²⁴ Tayta Diospa sinchi piñakuyninqa manam taninqachu. Imam rurananta ruranankamam mana taninqachu. Imam piensasqanta cumplinakamam. mana taninqachu. Hamuq punchawkunapim kaykunataqa entiendenkichik. Chay tiempopim imam kaqta entiendenkichik.