Jeremías 3 - Quechua Ayacucho Bible 1987

Israel castakunapa karunchakurusqankumanta

¹ Ñoqa Tayta Diosmi kaynata nini: Sichu warminmanta qosan rakikuruptinqa chaynapi warmi hukwanña casarakuruptinqa punta qosanqa manañam casaranmanñachu. Yapamantaqa manañam casaranmanñachu. Yapamanta casaraptinqa penqaychá kanman. Israel nacionpiqa hatun penqaychá kanman. Israel castakuna, chaynataqmi qamkunapas huchallikurqankichik. Achkallaña kuyaqnikikunawanmi huchallikurqankichik. Chaynata rurachkaspachum kutirimuwaytaraq munankichik.

² Mana imayoq moqokunatayá qawariy hinaspayá sumaqta yuyaymanariy. Llapallan moqokunapim puñurqanki. Kuyaqnikikunawanmi puñurqanki. Chunniqpi *f**yachaq Arabe runa hinam tiyaq kanki. Ñan patankunapi tiyaspaykim kuyaqnikikunata suyaq kanki. Chuchumika kaspaykim naciontapas hatun penqaytaña rurarunki. Mana allinkuna rurasqaykikunawanmi naciontapas hatun penqaytaña rurarunki.

³ Chayraykum tarpuy parapas manaña paramurqachu. Chayraykum poqoy parapas manaña karqachu. Chuchumika hinam manaña penqakuyniki kanchu. Uyaykipas manañam pukayarinñachu.

⁴ Qayninpakunallam: “Taytalláy” nispa niwarqanki. “Warma kayniymanta amigolláy” nispam niwarqanki.

⁵ “¿Wiñaypaqchum piñakurunki?” nispam tapuwarqanki. “¿Piñakuynikiqa wiñaypaqchum kanqa?” nispam tapuwarqanki.

Wanakunankupaq Tayta Dios kamachisqanmanta

⁶ Rey Josiaspa gobiernasqan tiempopim Tayta Dios kaynata niwarqa: —¿Rikurqankichu mana kasukuq Israel castakunapa rurasqanta? Alto orqokunaman rispankum rapisapa sachakunapa sikinpi chuchumika warmi hina huchallikurqaku.

⁷ Ñoqam piensarqani: “Tukuy chaykunata rurachkaspankupas kutirikamuwanqakuchiki” nispay. Ichaqa manam kutirikamuwarqakuchu. Chayna rurasqankutaqa rikurqakum ñañanku Juda nacionniyoq runakunapas.

⁸ Traicionaq warmiman hina rakinakuy papelta qospaymi Israel nacionpi kaqkunata wischurqani, chaywanpas rikurqanim Juda nacionpi kaqkunapas traicionaq ñañan hina mana manchakuwaspa chuchumika warmi hina huchapakusqankuta.

⁹ Israel nacionpi kaqkunaqa chay huchallikusqankuta mana kaqpaqpas hapispankum nacionta hatun penqayman churarurqaku. Hukwan-hukwan kakuq warmi hinam rumikunatawan sachakunataña adorarqaku.

¹⁰ Chaywanpas traicionawaqniy Israel nacion ñañan hinam Juda nacionpas mana tukuy sonqonwanchu kutirikamuwarqa aswanqa engañawarqam. Chaynatam nin Tayta Dios.

¹¹ Tayta Diosmi niwarqa: —Traicionawaqniy Juda nacionpi runakunamantaqa mana kasukuq Israel nacionpi runakunaraqmi aswan allinta rurarqaku.

¹² Rispaykiyá norte lawman qawaspa qayakamuy ñoqa Tayta Diospa kayna nisqayta: Israel nacionpi mana kasukuqkuna, ñoqaman kutirikamuwaychik. Manaña piñasqa uyayoqmi qamkunataqa chaskisqaykichik. Kuyapayakuq kasqayraykum manaña wiñaypaqchu piñakusqaykichik. Ñoqa Tayta Diosmá chaynata nikichik.

¹³ Mana allin rurasqaykichiktayá reqsikuychik. Mana kasukusqaykichiktayá reqsikuychik. yupaychasqaykichik ñoqa Tayta Diospa contraypi kasqaykichiktayá reqsikuychik. Forasterokunawan tupakuruq warmi hinam huchallikurqankichik. Kamachisqaykunatapas mana kasukuspaykichikmi chaynataqa rurarqankichik. Ñoqa Tayta Diosmi chaynata nikichik.

¹⁴ Tayta Diosmi nisunkichik: —Mana kasukuq churiykuna, kutirikamuwaychik. Warmipa qosan hinam qamkunapaq kani. Sion Moqopi llaqtaman kutichinaypaqmi qamkunamanta sapa llaqtamanta akllasaq huk runata, sapa castamantam akllasaq iskay runata.

¹⁵ Agradoypaq gobiernaq runakunatam qosqaykichik michisunaykichikpaq. Paykunam yachaywan chaynataq yuyaywan gobiernasunkichik.

¹⁶ Kaqllamanta kay allpapi miraruspa achka churiyoqña kaptikichikqa, manañam rimanqakuñachu Tayta Diospa contrato baulninmantaqa. Pasaypaq qonqaruspankumá manaña watukunqakuñachu nitaqmi huk baultapas ruranqakuñachu, Ñoqa Tayta Diosmi chaynata nini.

¹⁷ Chay tiempopim Jerusalen llaqtata sutichanqaku “Tayta Diospa Gobiernanan Llaqta” nispa. Chaymanmi llapallan nacionkuna huñunakamunqaku ñoqa Tayta Diosta adorawanankupaq. Paykunaqa kawsanqakupas manam rumi sonqo kayninkuman hinañachu.

¹⁸ —Chay punchawpiqa Juda nacion runakunam Israel nacion runakunawan hukllawanakunqaku hinaspam kuskanku norte lawmanta kutimunqaku abueloykichikkunaman qosqay herencia allpaman.

Israelpa mirayninkuna taytacha-mamacha adorasqankumanta

¹⁹ Ñoqam nirqaykichik: “Churiykunapaqmi chaskiyta munarqaykichik” nispa. “Kuyayllapaq herencia allpa qoytam munarqaykichik” nispa. Tukuy allpamantapas aswan allinnintam qoyta munarqaykichik. Ñoqam piensarqani “Taytalláy” niwanaykichikta. Ñoqam piensarqani mana haykapipas rakikuwanaykichikta.

²⁰ Aswanqa qosan traicionaq warmi hinam traicionawarqankichik. Yaw Israelpa mirayninkuna, ñoqa Tayta Diosmi chaynata nikichik.

²¹ Qala orqokunapa puntankunapi waqasqankutam uyarini. Israel runakunapa waqaspa mañakuwasqantam uyarini. Allinta kawsachkaspankum pantarurqaku. Yupaychasqanku Tayta Diostam qonqaruwarqaku.

²² Mana kasukuq churikuna, ñoqaman kutirikamuychik. Mana kasukuynikichikkunatam ñoqa pampachasqaykichik. Yupaychasqayku Tayta Diosmi qamqa kanki. Qanmanmi hamullaniku Diosniyku kaptiki.

Israelpa mirayninkuna huchanku reqsikusqankumanta

²³ Cheqaptapunipas alto moqokunapi bulla rurasqaykuqa yanqapaqmi. Cheqaptapunipas orqopa puntankunapi bulla rurasqaykuqa yanqapaqmi. Cheqaptapunipas qam yupaychasqayku Diosllapim salvaciontaqa tariniku. Cheqaptapunipas Israelpa mirayninkunaqa qam Tayta Diosllapim salvaciontaqa tariniku.

²⁴ Penqakuypaq taytachakunata adorasqaykuraykum pierderuniku taytaykupa armasqanta. Warma kasqaykumanta rurasqaykuraykum pierderuniku taytaykupa armasqanta. Pierderunikum ovejankutapas vacankutapas. Pierderunikum churi-wawankutapas.

²⁵ Camaman ustuchkaq hinayá penqakuymanta pakakusunchik. Frazadawan tapakuchkaq hinayá penqakuymanta pakakusunchik. Yupaychasqanchik Tayta Diospa contranpim huchallikurqanchik. Warma kasqanchikmanta kunankamam tayta-mamanchikkunapiwan huchallikurqanchik. Yupaychasqanchik Tayta Diospa nisqanta mana kasukuspam huchallikurqanchik.