Jeremías 29 - Quechua Ayacucho Bible 1987

Preso riqkunaman Jeremiaspa cartasqanmanta

^1-2 Babilonia nacionpa reynin Nabucodonosormi Jerusalen llaqtamanta Babilonia lawman presota pusachirqa reinata, palaciopi servikuqkunata, Juda nacionpi kamachikuqkunata, Jerusalen llaqtapi wakin runakunata, tukuy imapi llamkaq maestrokunata chaynataq herrerokunatapas. Chaypa qepallantam Jerusalen llaqtamanta Tayta Diosmanta willakuq Jeremias cartarqa ancianokunamanta puchuqkunaman, sacerdotekunaman, Diosmanta willakuqkunaman chaynataq wakin runakunamanpas.

³ Chay cartatam apachirqa Safanpa churin Elasawan hinaspa Hilciaspa churin Gemariaswan. Paykunatam Juda nacionpa reynin Sedequias Babilonia nacionpa reynin Nabucodonorman kacharqa. Chay cartapim kaynata nirqa:

⁴ Israelpa yupaychasqan Llapallan Kamachiq Tayta Diosmi Jerusalen llaqtamanta Babilonia lawman llapallan preso pusachisqankunata nin kaynata:

⁵ —Wasichakuspaykichikyá chaypi *f**yachaychik. Huertakunapipas plantaspaykichikyá rurunta mikuychik.

⁶ Casarakuspaykichikyá churi-wawayoq kaychik. Chay *f**yachasqaykichik llaqtapiqa miraychikyá ama asllayanaykichikpaq.

⁷ Pusachisqay llaqtapa allinnintayá munaychik, chaypaqyá ñoqata mañakuwaychik chaynapi llaqta hawkalla kaptin qamkunapas hawkalla kanaykichikpaq.

⁸ Israelpa yupaychasqan Llapallan Kamachiq ñoqa Tayta Diosmi kaynata nini: “Ama engañachikuychikchu qamkuna ukupi kaq ñoqamanta willakuq tukuqkunawan nitaq musyaqkunawanpas. Amataqyá kasuychikchu qamkuna mañaptikichik mosqosqankutapas.”

⁹ Ñoqa Tayta Diosmi nini: Ñoqapa sutiypi qamkunaman willasusqaykichikqa llullam. Paykunataqa manam kachamurqanichu nispa.

¹⁰ Tayta Diosmi kaynata nin: —Babilonia nacionpaq qanchis chunka wata cumplikuruptinmi favorecesqaykichik hinaspa kay sitioman kutimunaykichikpaq rimasqayta cumplisaq.

¹¹ Ñoqa Tayta Diosmi nini: Favornikichikpi imam ruray piensasqaytaqa sumaqtam yachani. Manaña ñakarispa hawka kanaykichikpaqmi piensachkani chaynapi hamuq punchawkunapi confianzawan kanaykichikpaq.

¹² Qayakuspa mañakuwaptikichikqa uyarisqaykichikmi.

¹³ Maskawaspaykichikqa tariwankichikmi tukuy sonqoykichikwan maskawasqaykichikrayku.

¹⁴ Ñoqa Tayta Diosmi nini: Qamkunaqa tariwankichikmi, llapallan nacionkunaman chaynataq llapallan sitiokunaman cheqechisqaymantam huñumusqaykichik. Kay sitiomantam presochasqata pusachirqaykichik, chaynaqa kay sitiomanmi kutichimusqaykichik —nispa.

¹⁵ Qamkunam nichkankichik: —Kay Babilonia lawpim Tayta Dios qoykuwanku paymanta willakuqkunata nispa.

¹⁶ Tayta Diosmi kaynata nin: —Rey Davidpa rantinpi gobiernaq reymantawan kay Jerusalen llaqtapi puchuqkunamantam otaq preso mana pusasqa castaykichikmantam

¹⁷ llapallan Kamachiq ñoqa Tayta Dios kaynata nini: Paykunapa contranpim kachamusaq guerrata, yarqayta hinaspa peste onqoyta. Mikunapaqpas mana valeq ismusqa higosta hinañam paykunataqa rurarusaq.

¹⁸ Guerrawan, yarqaywan hinaspa peste onqoywanmi paykunataqa ñakarichisaq. Kay pachapi llapallan gobiernokunapas mancharikuspa katkatatananpaqraqmi paykunataqa rurasaq. Cheqechisqay llapallan nacionkunapi kaspankum ñakasqa, pasaypaq burlakusqa chaynataq insultasqa kanqaku.

¹⁹ Ñoqa Tayta Diosmi nini: Ñoqamanta willakuq serviqniykunawan mana tanispa willachisqaykunata mana kasukusqaykichikraykum paykunapas chayna kanqaku.

²⁰ Jerusalen llaqtamanta Babilonia lawman llapallan pusachisqaykuna, qamkunaqa ñoqa Tayta Diospa nisqaytayá uyariychik.

²¹ Colaiaspa churin Acabmantawan Maasiaspa churin Sedequiasmantam otaq ñoqa Tayta Diospa sutiypi rimaspanku llullakuna willasuqnikichikmantam Israelpa yupaychasqan Llapallan Kamachiq Tayta Dios kaynata nini: Babilonia nacionpa reynin Nabucodonosorman paykunata qoykuptiymi qayllaykichikpi wañuchinqa.

²² Hinaptinmi Juda nacionmanta preso pusasqa kaqkuna otaq Babilonia lawpi *f**yachaqkuna, pitapas ñakaspanku kaynata ninqaku: “Babilonia nacionpa reyninmi Sedequiastawan Acabta ninapi kankarqa, chaynatayá qamtapas Tayta Dios rurasunki” nispa.

²³ Chaynatam paykunawan rurasaq Israel casta runakuna ukupi loco hina rurasqankurayku. Paykunaqa runamasinkupa warminwanmi huchallikurqaku hinaspapas ñoqapa sutiypiraqmi llullakunata willakurqaku, ñoqapa mana kamachisqaykunatam rimarqaku. Ñoqa Tayta Diosmi nini: Chaykunataqa yachanipunim hinaspam testigo kani, nispa.

Semaiasman Jeremiaspa willasqanmanta

²⁴ Tayta Diosmi Jeremiasta kamachirqa Nehelam llaqtayoq Semaiasman kaynata ninanpaq:

²⁵ —Israelpa Yupaychasqan Llapallan Kamachiq ñoqa Tayta Diosmi nini: “Qanmi sutikipi cartata apachirqanki Jerusalen llaqtapi llapallan runakunaman, Maasiaspa churin sacerdote Sofoniasman chaynataq llapallan sacerdotekunamanpas. Chay cartapim Sofoniasta nirqanki:

²⁶ ‘Sacerdote Joiadapa rantinpi sacerdote kanaykipaqmi Tayta Dios churasurqanki chaynapi paypa templonpi jefe kanaykipaq. Chaynaqa huk kaqnin loco runa Diosmanta willakuq tukuptinqa cepo nisqanku hapichinapim chakinkunata hapichinayki, matankanmantapas fierro collarwantaqmi hapichinayki.

²⁷ Hinaptinqa ¿imanasqataq manaqa qaqcharqankichu Diosmanta willakuq tukuq Anatot llaqtayoq Jeremiastaqa?

²⁸ Paymi Babilonia lawpi kaqkunaman cartamuwasqaku kaynata: Unay watakunam kamunkichik chay lawman preso riqkunaqa chaynaqa wasichakuspayá chaypi *f**yachaychik hinaspayá huertakunapipas plantaspaykichik rurunta mikuychik’ nispa.”

²⁹ Chayna niq cartatamá sacerdote Sofonias leepurqa Diosmanta willakuq Jeremiaspaq.

³⁰ Hinaptinmi Jeremiasta Tayta Dios nirqa:

³¹ Jerusalen llaqtamanta llapallan preso riqkunatayá ñoqa Tayta Diospa nisqayta kaynata nichimuy: “Nehelam llaqtayoq Semaias sutiyoq runam mana kachamuchkaptiy llullakunata willasuspaykichik yanqakunapi confiachisurqankichik.

³² Chayraykum ñoqa Tayta Dios nini: Nehelam llaqtayoq Semaias sutiyoq runatam mirayninkunatawan castigasaq. Mirayninkunamantaqa manam pipas kanqachu runaykuna ukupi *f**yachaq. Semaiasqa manataqmi rikunqachu kay runaykunata favoreceptiyqa. Ñoqa Tayta Diosta mana kasuwanankupaq runaykunaman rimasqanraykum chaynaqa kanqa. Ñoqa Tayta Diosmi chaynata nini.”