Jeremías 26 - Quechua Ayacucho Bible 1987

Jeremiasta wañuchinankupaq hapirusqankumanta

¹ Josiaspa churin Rey Joacim Juda nacionpi gobiernayta qallarichkaptinmi Jermiasman Tayta Dios rimapayaspan

² kaynata nirqa: —Temploypa pationpi sayaykuspayá tukuy kamachisqaykunata willakamuy temploypi adorawanankupaq hamuqkunaman otaq Juda nacion llaqtakunamanta hamuqkunaman. Chulla palabrallatapas ama qonqaspayá willakamuy.

³ Icharaqpas uyarikuspanku mana allin kawsasqankumanta sapakama wanakunmanku, chayna kaptinqa mana allinkuna rurasqankumantaqa manañach ñoqapas castigaymanchu.

⁴ Ñoqa Tayta Diospa nisqaytayá paykunaman nimuy: “Qamkunaman yachachisqaykunata mana kasukuspa kawsaptikichikqa

⁵ chaynataq mana tanispa qamkunaman kachamusqay willakuq serviqniykunapa nisqantapas mana uyariptikichikqa

⁶ Silo llaqtapi hinam kay templotapas purmarachisaq. Kay Jerusalen llaqtapas llapallan nacionkunapa ejemplonpaqmi ñakasqa llaqtaña kanqa.”

⁷ Templopim ñoqa Jeremiaspa kay nisqaykunata uyarirqaku sacerdotekuna, Diosmanta willakuqkuna chaynataq llapallan runakunapas.

⁸ Tayta Diospa llapallan kamachiwasqankunata rimayta tukuruptiymi sacerdotekuna, Diosmanta willakuqkuna hinaspa llapallan runakuna hapiruwaspa niwarqa: —Wañunkipunim.

⁹ ¿Imanasqataq Tayta Diosmanta rimaspaykiqa ninki: “Silo llaqtapi hinam kay templopas purmachisqa kanqa, kay Jerusalen llaqtapas mana runayoqñam purmanqa” nispaykiqa? Llapallan runakunam templopi huñunakurqaku ñoqapa muyuriqniypi.

¹⁰ Juda nacionpi kamachikuqkunañataqmi chaykuna pasakusqanta uyariruspanku reypa palacionmanta rirqaku temploman hinaspam “Mosoq Zaguan” sutiyoq punkupi tiyaykurqaku juzgawanankupaq.

¹¹ Chaymi sacerdotekunawan Diosmanta willakuqkuna chay kamachikuqkunaman chaynataq llapallan runakunaman nirqaku: —Kay runaqa uyarisqaykichikpi hinapas kay llaqtapa contranpi rimasqanraykum wañunanpaq sentenciasqa kanan —nispa.

¹² Hinaptinmi ñoqa Jeremiasñataq kamachikuqkunamanwan llapallan runakunaman nirqani: —Tayta Diosmi kachamuwarqa kay templopa contranpi chaynataq kay llaqtapa contranpipas llapa uyarisqaykichik palabrakunata willakunaypaq.

¹³ Mana allin kawsasqaykichiktawan mana allinkuna rurasqaykichikta kunan allichaspa Tayta Diospa nisqantaña kasukuptikichikqa paypas contraykichikpi rimasqankunatam manaña ruranqachu.

¹⁴ Ñoqaqa qamkunapa makikichikpim kachkani. Tanteasqaykichikta hinayá ñoqawan ruraychik.

¹⁵ Chaywanpas kaytayá yachaychik: wañuchiwaspaykichikqa inocente runatam wañuchinkichik hinaptinqa, kay llaqtapi runakunawan kuskam huchayoq kankichik. Cheqaptapunipas ñoqataqa Tayta Diosmi qamkunaman kachamuwarqa llapa uyarisqaykichikkunata rimanaypaq —nispa.

¹⁶ Hinaptinmi kamachikuqkunapiwan runakuna, sacerdotekunamanwan Diosmanta willakuqkunaman nirqaku: —Yupaychasqanchik Tayta Diospa sutinpim payqa rimapayawanchik, chaynaqa manam wañunanpaq sentenciasqaqa kanmanchu —nispa.

¹⁷ Wakin ancianokunapas hatarispankum huñunasqa runakunaman nirqaku:

¹⁸ —Juda nacionpa reynin Ezequiaspa tiemponpim Moreset llaqtayoq Miqueas kay Juda nacionpi kaq llapallan runakunaman Diosmanta willakuspan nirqa: “Llapallan Kamachiq Tayta Diosmi nin: ‘Sion Moqopi llaqtam yapusqa kanqa. Chakra hinaraqmi yapusqa kanqa. Jerusalen llaqtam purmachisqa kanqa. Templopa kasqan moqom monteyarunqa.’

¹⁹ Juda nacionpa reynin Ezequiaswan Juda nacionpi runakunaqa ¿wañuchirqakuchum Miqueastaqa? Manam, aswanqa kikin reypas Tayta Diosta manchakuspam payta mañakurqa paykunamanta llakipayarikunanpaq chaymi Tayta Diospas manaña castigarqañachu rimasqan castigokunawan. Ñoqanchikqa hatun castigotam contranchikpi apaykamuchkanchik.

²⁰ Quiriat-jearim llaqtayoq Semaiaspa churin Uriaspas Jeremiaspa nisqanta hinallam kay llaqtapa chaynataq kay nacionpa contranpi Tayta Diospa sutinpi rimarqa.

²¹ Hinaptinmi Rey Joacimñataq llapa tropakunapa jefenkunapiwan hinaspa llapa kamachikuqkunapiwan Uriaspa nisqanta uyariruspanku wañurachiyta munarqaku. Ichaqa Uriasmi mancharikuspan Egipto nacionman lluptirurqa.

²² Chaywanpas Rey Joacinmi kacharqa Acborpa churin Elnatanta chaynataq wakin runakunatapas Egipto nacionman.

²³ Paykunam Egipto nacionmanta Uriasta pusaramurqaku Rey Joacinman. Chaymi rey kamachiptin espadawan wañurachispanku wakchakunapa ayan pampakunan uchkuman cuerponta wischuykamurqaku.

²⁴ Safanpa churin Ahicam sutiyoq runam Jeremiasta favorecerqa, chayraykum Jeremiastaqa manaña runakunaman qoykurqakuchu wañurachinankupaq.