Jeremías 25 - Quechua Ayacucho Bible 1987

Norte lawmanta hamuq enemigomanta

¹ Josiaspa churin Rey Joacim Juda nacionpi tawa watamanña gobiernachkaptinmi chaynataq Babilonia nacionpa reynin Nabucodonosorpas yaqa huk wataña gobiernachkaptinmi Jeremiasman Tayta Dios rimapayarqa Juda nacionpi llapallan runakunapa contranpi.

² Hinaptinmi Diosmanta willakuq Jeremiasñataq Juda nacionpi llapallan runakunamanwan Jerusalen llaqtapi *f**yachaqkunaman willarqa kaynata:

³ —Amonpa churin Josias chunka kimsayoq watamanña Juda nacionpi gobiernasqanmantam pasarun iskay chunka kimsayoq wataña. Chay tiempomantam kunankama Tayta Dios rimapayawarqa chaymi qamkunamanpas mana samaykuspay willapayarqaykichik ichaqa manam kasuwarqankichikchu.

⁴ Tayta Diosqa serviqnin willakuqkunatam mana tanispa kachamusurqankichik ichaqa manam kasurqankichikchu nitaqmi uyariytapas munarqankichikchu.

⁵ Paykunam nisurqankichik: “Mana allin kawsasqaykichikmantawan mana allin rurasqaykichikmantayá wanakuychik chaynapi abueloykichikmanpas chaynataq qamkunamanpas wiñaypaq qosusqaykichik allpapi *f**yachanaykichikpaq.

⁶ Mana reqsisqaykichik dioskunataqa amayá qatiychikchu hinaspapas amataqyá adoraychikchu qonqoranpa pampaman kumuykuspaqa. Qamkunapa rurasqaykichik taytacha-mamachakunata adoraspaqa amayá Tayta Diostaqa piñachiychikchu chaynapi ama castigasunaykichikpaq.”

⁷ Tayta Diosmi nin: “Qamkunaqa manam kasuwarqankichikchu aswanqa taytacha-mamacha rurasqaykichikwanmi piñachiwarqankichik chaynapi kikillaykichik castigasqa kanaykichikpaq” nispa.

⁸ —Chayraykum Llapallan Kamachiq Tayta Dios nin: “Ñoqa Tayta Diosmi nini: Willapayasqay palabraykunata mana kasukusqaykichikraykum

⁹ Babilonia nacionpi serviqniy Rey Nabucodonosortawan norte lawpi llapallan runakunata qayamusaq. Paykunawanmi atacachisaq kay nacionta, llapallan runankunata chaynataq muyuriqninpi nacionkunatapas. Pasaypaqtam paykunataqa tukurusaq. Paykunataqa tuñirachispaymi wiñaypaq purmarachisaq chaynapi runakunapas admirakusparaq burlakunankupaq.

¹⁰ Tanirachisaqmi kusikuymanta qaparisqankutapas, asikuyninkutapas chaynataq casarakuqkunapa fiestantapas. Manañam uyarinqakuchu marayninkupa kutaynintapas. Manañam kanqachu mecheropa achkiyninpas.

¹¹ Kay enteron nacionqa admirakuypaqmi chunninqa. Chay nisqay nacionkunaqa Babilonia nacionpa reynintam qanchis chunka wata servinqaku.

¹² Ñoqa Tayta Diosmi nini: Qanchis chunka wata pasaruptinñataqmi Babilonia nacionpa reynintawan Caldea nacionniyoq runakunata castigasaq, mana allinkuna rurasqankumantam wiñaypaq purmachisaq.

¹³ Ñoqaqa Caldea nacionpa contranpi llapallan rimasqaykunatam cumplisaq, cumplisaqtaqmi kay libropi qellqasqanman hina llapallan nacionkunapa contranpi Jeremiaspa willakusqantapas.

¹⁴ Paykunamantapas aswan hatun nacionkunam chaynataq munayniyoq reykunam venceruspa paykunawan servichikunqa. Tukuy mana allinkuna rurasqankuman hinam paykunamanpas pagasaq” nispa.

Nacionkuna castigasqa kananmanta

¹⁵ Israelpa yupaychasqan Tayta Diosmi kaynata niwarqa: —Vinowan huntasqa hina piñakuyniy vasota chaskiwaspaykiyá kachasqay llapallan nacionkunaman upyachimuy.

¹⁶ Chay vasomanta upyaspankum tamsaykachanqaku chaynataq locoyanqaku contrankupi guerrata hatarichiptiy —nispa.

¹⁷ Chay qowasqanta Tayta Diosmanta chaskiykuspaymi paypa kachawasqan llapallan nacionkunaman willakurqani.

¹⁸ Upyachichkaq hinamá willakurqani Jerusalen llaqtapi kaqkunaman, Juda nacion llaqtakunapi runakunaman chaynataq chaypi reykunamanwan chaypi kamachikuqkunamanpas chaynapi kunan hina chunnichisqa, purmachisqa, burlakusqa chaynataq ñakasqa kanankupaq.

¹⁹ Upyachichkaq hinamá willakurqani Egipto nacionpa reynin Faraonmanpas, serviqninkunamanpas yanapaqnin kamachikuqkunamanpas, llapallan runankunamanpas,

²⁰ Egipto nacionpi forasterokunamanpas, Uz nacionpi reykunamanpas chaynataq Filistea nacionpa llapallan reyninkunamanpas, chay reykunaqa: Ascalon llaqtapa reyninmi, Gaza llaqtapa reyninmi, Ecron llaqtapa reyninmi chaynataq Asdod llaqtapi puchuqkunapa reyninmi.

²¹ Willakurqanitaqmi Edom nacionpi runakunamanpas, Moab nacion runakunamanpas chaynataq Amonpa mirayninkunamanpas,

²² Tiro llaqtapa reyninkunamanpas, Sidon llaqtapa reyninkunamanpas chaynataq Mediterraneo Lamar Qochapa patan nacionkunapa reyninkunamanpas.

²³ Willakurqanitaqmi Dedan castakunamanpas, Tema castakunamanpas, Buz castakunamanpas chaynataq sentidon law chukchanku rutukuq runakunamanpas.

²⁴ Willakurqanitaqmi Arabia lawpi llapallan reykunamanpas chaynataq chunniqpi *f**yachaq tukuy rikchaq runakunapa reyninkunamanpas.

²⁵ Willakurqanitaqmi Zimri lawpi llapallan reykunamanpas, Elam nacionpa llapallan reyninkunamanpas chaynataq Media nacionpa llapallan reyninkunamanpas.

²⁶ Willakurqanitaqmi norte lawpi reykunamanpas otaq reymasinkunapa hichpanpi otaq karupi kaq reykunamanpas. Upyachichkaq hinamá willakurqani kay pachapi llapallan gobiernokunaman. Paykunapa qepantañataqmi Babilonia nacionpa reynin upyanqa.

²⁷ Israelpa yupaychasqan Llapallan Kamachiq Tayta Diosmi paykunaman ninaypaq kaynata niwarqa: —Chay vasomantayá upyaychik machanaykichikkama, vomitanaykichikkama chaynataq urmaspa manaña hatarinaykichikkama. Contraykichikpim guerrata hararichimusaq.

²⁸ Upyanankupaq vasota mana chaskisuptikiqa Llapallan Kamachiq ñoqa Tayta Diospa nisqaytam kaynata ninki: “Upyankichikpunim.

²⁹ Llapallan Kamachiq Tayta Diosmi nini: Ñoqapaq sapaqchasqa llaqtata castigayta qallarichkaptiyqa ¿qamkunañataqchu mana castigasqa kawaqchik? Castigasqapunim qamkunapas kankichik. Kay pachapi llapallan *f**yachaq runakunapa contranpim guerrata hatarichimuchkani —nispa.

³⁰ —Jeremias, paykunapa contranpimá tukuy nisqaykunata willaspayki kaynata ninki: “Alto-altomantam Tayta Diosqa qaparimun. *f**Yachanan chuya sitiomantam Tayta Diosqa qayakamun. Runakunapa contranpim qaparimuchkan. Uvas saruqkunapa takintam takimuchkan. Kay pachapi yachaqkunapa contranpim takimuchkan.”

³¹ Tayta Diosmi kaynata nin: Kay pachapa cantonkamaraqmi uyarikunqa. Nacionkunatam juicioman qayasaq ñoqaqa. Llapallan runakunamantam cuentata mañasaq. Mana allin ruraqkunatam wañuchisaq. Guerrapim paykunataqa wañuchisaq.

³² Llapallan Kamachiq Tayta Diosmi nin: Castigokunaqa nacion-nacionmi qatinakamunqa. Kay pachapa cantonmantam hatarimunqa. Sichi wayra hinaraqmi hatarimunqa.

³³ Kay pachapa cantonmanta huknin cantonkamam wischurayanqaku. Tayta Diospa wañuchisqan runakunam wischurayanqaku. Paykunamantaqa manam pipas aya takita takinqachu. Paykunapa ayantaqa manam pipas huñunqachu. Paykunapa ayantaqa manam pipas pampanqachu. Paykunaqa wanu hinam pampapi wischurayanqaku.

³⁴ Michiqkuna, qamkunaqa qapariychikyá. Michiqkuna, qamkunaqa waqaychikyá. Runay pusaqkuna, allpapiyá kuchpaykachakuychik. Nakasqa kanaykichikpaq punchawmi chayamuchkanña. Kuyayllapaq vaso hina pakisqa kanaykichikmi chayamuchkanña.

³⁵ Lluptiytaqa manam michiqkunaqa atinqachu. Runaykunata pusaqkunaqa manam ayqeyta atinqachu.

³⁶ Michiqkunam waqayllawanña qaparkachachkanku. Runaykunata pusaqkunam qaparkachachkanku pastokunata Tayta Dios chinkarachisqanrayku.

³⁷ Tayta Diosmi piñakurun anchata. Chinkarachinmi kuyayllapaq pastokunata.

³⁸ Machayninmanta lloqsimuq leon hinaraqmi lloqsiramun. Paykunapa nacionnintam purmarachin. Manchakuypaq guerratam hatarirachimun. Ninata hinam piñakuyninta ratarirachin.