Jeremías 24 - Quechua Ayacucho Bible 1987

Higosniyoq canastakunawan rikchanachiymanta

¹ Babilonia nacionpa reynin Nabucodonosormi Babilonia llaqtaman presota pusarachirqa Joacimpa churinta otaq Juda nacionpa reynin Jeconiasta, Juda nacionpi llapallan kamachikuqkunata chaynataq Jerusalen llaqtapi tukuy rikchaq oficioyoq maestrokunatapas. Chaypa qepallantam Tayta Dios qawachiwarqa templopa punkunpi churasqa higos huntayoq iskay canastakunata.

² Huknin canastapim kasqa punta poqoruq allin higoskuna, huknin canastapiñataqmi kasqa mikunapaqpas mana valeq higoskuna.

³ Hinaptinmi Tayta Dios niwarqa: —Yaw Jeremias ¿imatataq qawachkanki? —nispa. Chaymi nirqani: —Ñoqaqa qawachkani higostam. Wakin higosqa ancha sumaqllañam. Wakinñataqmi mikunapaqpas mana valeq higoskuna —nispa.

⁴ Hinaptinmi Tayta Diosñataq niykuwarqa:

⁵ —Israelpa yupaychasqan ñoqa Tayta Diosmi nini: Kay allin higoskunata hinam waqaychasaq Juda nacionmanta Caldea lawman preso pusachisqay runakunata.

⁶ Paykunataqa amparaspaymi kay allpaman kutichimusaq. Wasita hina hatarichispaymi manaña tuñichisaqchu. Sachata hina plantaruspaymi sapinmantaqa manaña horqosaqchu.

⁷ Tayta Dios kasqayta reqsiwanankupaqmi yuyayta qosaq. Paykunaqa runaykunaña kaptinmi ñoqañataq paykunapa Diosnin kasaq. Chaynaqa kanqa tukuy sonqonkuwan kutirikamuwasqankuraykum.

⁸ —Ichaqa mikunapaqpas manaña valeq higosta hinam rurasaq Juda nacionpa reynin Sedequiasta, yanapaqnin kamachikuqkunata, Jerusalen llaqtapi *f**yachaqkunata, kay nacionpi puchuqkunata chaynataq Egipto nacionman rispa chaypi *f**yachaqkunatapas.

⁹ Paykunataqa desgraciamanmi churasaq kay pachapi llapallan nacionkunapas mancharikunankama. Qarqoruptiymi paykunaqa ejemplopaq kanqa humillachisqa, despreciasqa chaynataq ñakasqa.

¹⁰ Paykunatam castigasaq guerrawan, yarqaywan chaynataq peste onqoywan abuelonkuman qosqay allpapi chinkanankukama.