Jeremías 23 - Quechua Ayacucho Bible 1987

Puchuq presokunapa kutimusqanmanta

¹ Tayta Diosmi nin: —¡Ay imaynaraq kanqa mana allin michiqkuna hina runaykunata cheqerachispa chinkarachiq kamachikuqkunaqa! —nispa.

² Chayraykum Israelpa yupaychasqan Tayta Dios runankuna michiqkunata nin: —Qamkunaqa ovejaykunatam cheqechirqankichik hinaspam mana harkaspa chinkarachirqankichik. Chay mana allinkuna rurasqaykichikmantam castigasqaykichik. Ñoqa Tayta Diosmi chaynata nini.

³ Cheqechisqay nacionkunamantam puchuq ovejaykunata kikiypuni huñumusaq. Mikunanku pastokunaman kutichimuptiymi astawan miranqaku.

⁴ Ñoqa Tayta Diosmi nini: Paykunata cuidananpaq michiqniykunata churaptiymi manaña imatapas manchakunqakuchu nitaq hukmanyanqakuchu, manañam chullapas chinkanqachu. Ñoqa Tayta Diosmi chaynata nini.

⁵ Tayta Diosmi nin: Hamuchkanmi tiempo Rey Davidpa castantapuni hatarichinaypaq. Hamuchkanmi tiempo allinta ikllichichkaq hina paypa castanta hatarichinaypaq. Paymá rey kaspan ancha yachaywan gobiernanqa. Allin arreglotam payqa ruranqa. Allinta ruraspam kay pachapi gobiernanqa.

⁶ Paypa tiemponpim Juda nacion salvasqa kanqa. Paypa tiemponpim Israel nacion seguro *f**yachanqa. Runakunam kaynata sutichanqaku. “Allinyachiwaqninchik Tayta Dios” nispam ninqaku.

⁷ Chayraykum Tayta Dios nin: —Hamuchkanmi tiempo: “Israelpa mirayninkunata Egipto nacionmanta horqomuq Kawsaq Tayta Diosraykum jurani” nispa manaña juranankupaq.

⁸ Juranqakuqa: “Israelpa mirayninkunata norte law Nacionkunamanta chaynataq qarqosqan wakin nacionkunamanta horqomuq Kawsaq Tayta Diosraykum jurani” nispañam. Paykunaqa allpankupiñamá *f**yachankunqaku.

Diosmanta willakuq tukuqkunata denunciasqanmanta

⁹ Diosmanta willakuq tukuqkunatam nini: Sonqoymi pasaypaq hukmanyasqa kachkan. Enteron cuerpoymi katkatatachkan. Machasqa runamanraqmi rikchakuchkani. Vinowan pasaypaq sinkaruqmanmi rikchakuchkani. Tayta Diosraykum chayna kachkani. Chuya palabranraykum chayna kachkani.

¹⁰ Hukwan-hukwan kakuqkunam kay nacionpiqa huntallaña kachkan. Ñakasqa kasqankuraykum allpapas llakisqallaña kachkan. Ñakasqa kasqankuraykum chunniqpi pastokunapas chakisqaña kachkan. Mana allinllatam kawsachkanku Diosmanta willakuq tukuqkunapas. Mana allinta ruranallankupaqmi atiyniyoq kasqankupas.

¹¹ Ñoqamanta willakuqkunam manaña ñoqaman sonqoyoq rikurirunku. Sacerdote runakunapas manaña ñoqaman sonqoyoqmi rikurirunku. Temploypipunim mana allinkuna rurachkaqta tarini. Ñoqa Tayta Diosmi chaynata nini.

¹² Chayraykum paykunapa vidanqa lluchka ñan hinaña kanqa. Tutayayman wichiykunankupaqmi paykunaqa tanqasqa kanqa. Paykunamanmi castigota apamusaq. Paykunamanmi chayachimusaq. Castiganay watapim castigasaq paykunataqa. Ñoqa Tayta Diosmi chaynata nini.

¹³ Samaria llaqtapim rikurqani ñoqamanta willakuq tukuqkunata. Samaria llaqtapim rikurqani mana tupaqninpi rimaqkunata. Paykunaqa Baal taytachapa sutinpim willakurqaku. Paykunaqa Israel runaykunatam pantarachirqaku.

¹⁴ Jerusalen llaqtapim rikurqani ñoqamanta willakuq tukuqkunata. Jerusalen llaqtapim rikurqani millakuypaq kaqkuna rurasqankuta. Chaypim hukwan-hukwan kakuchkanku. Runamasinku engañayllapim purichkanku. Mana allin runakunatam kallpanchachkanku. Huchankumanta mana wanakunankupaqmi kallpanchachkanku. Paykunaqa llapallanpas rikchakapuwan Sodoma llaqtapi kaqkunamanraqmi. Chaypi *f**yachaqkunaqa rikchakapuwan Gomorra llaqtayoq runakunamanraqmi.

¹⁵ Llapallan Kamachiq ñoqa Tayta Diosmi nini: Ñoqamanta willakuq tukuqkunamanmi ajenjota mikuchisaq. Ñoqamanta willakuq tukukuqkunamanmi qatqe yakuta tomachisaq. Jerusalenpi willakuq tukuqkunamantam millakuypaq kaqkuna lloqsirun. Millakuypaq kaqkunam enteron nacionpi mirarun.

¹⁶ Llapallan Kamachiq Tayta Diosmi nin: Israel castakuna, amayá kasuychikchu willakuq tukuqkunataqa. Amayá kasuychikchu qamkunaman willasusqaykichiktaqa. Llullallatam paykunaqa willasuchkankichik. Piensasqallankutam paykunaqa rimapayasuchkankichik. Mana nisqaykunatam paykunaqa rimapayasuchkankichik.

¹⁷ Qepanchakuwaqniy runakunamanmi nichkanku: “Hawkallam kankichik” nispa. Rumi sonqo runakunamanmi nichkanku: “Desgraciaqa manam chayamusunkichikchu” nispa.

Jeremiaspa rimarisqankunamanta

¹⁸ Paykunamantaqa ¿mayqannintaq Tayta Diospa tanteasqanpi sayarqa? Paykunamantaqa ¿mayqannintaq payta rikuspa palabranta uyarirqa? Paykunamantaqa ¿mayqannintaq palabranta atiendespa kasukurqa?

¹⁹ Sinchi wayra hinaraqmi Tayta Diospa piñakuyninqa lloqsinqa. Muyuq wayra hinaraqmi mana allin ruraqkunapa hawanpi rikurirunqa.

²⁰ Tayta Diospa piñakuyninqa manam taninqachu imam rurananta ruranankama. Tayta Diospa piñakuyninqa manam taninqachu imam piensasqanta cumplinankama. Hamuq punchawkunapim kaykunata entiendenkichik. Chay tiempopim imam kaqta entiendenkichik.

Willakuq tukuqkunapa contranpi willakuymanta

²¹ Chay willakuqkunataqa manam kacharqanichu ichaqa chayllam kallparqaku. Chay willakuqkunataqa manam rimapayarqanichu ichaqa ñoqamantaraqmi willakurqaku.

²² Ñoqapa tanteasqaypi sayaspankuqa runaykunamanchá willanmanku karqa. Mana allin kawsasqankumanta wanakunankupaqchá willanmanku karqa. Mana allin rurasqankumanta wanakunankupaqchá willanmanku karqa.

²³ Ñoqa Tayta Diosmi nini: Ñoqaqa hichpaykichikpi kaq Diosmi kani. Ñoqaqa manam karupi kaq Dioschu kani.

²⁴ Ñoqa Tayta Diosmi nini: Pakakuna sitiopi pipas pakakuptinqa ¿manachum rikuchkani ñoqaqa? ¿Manachum hanaq pachata huntariq kani? ¿Manachum kay pachata huntariq kani? Ñoqa Tayta Diosmi nini chaynata.

²⁵ —“Mosqorunim, mosqorunim” nispa sutiypiraq willakuq tukuqkunapa willakusqantam uyarirqani.

²⁶ ¿Haykapikamataq chay llulla willakuqkunaqa engaño sonqoyoqlla kanqaku? Paykunaqa sonqonkumanta horqoykuspallam willakunku.

²⁷ Mosqosqankuta willanakuspankum munachkanku runaykuna qonqaruwananta. Chaynam abuelonkupas Baal sutiyoq taytachata adoraspa qonqaruwarqaku.

²⁸ Ñoqa Tayta Diosmi nini: Pipas mosqoruspaqa chay mosqorusqantayá willakuchun. Pipas rimasqayta uyarispaqa imam kaqtayá willakuchun. Trigotawan pajataqa manam chapunachu.

²⁹ Ñoqa Tayta Diosmi nini: Rimasqayqa nina hinam. Rimasqayqa qaqa rumipas ñutuq martillo hinam.

³⁰ Ñoqa Tayta Diosmi nini: Chayraykum ñoqaqa chay willakuqkunapa contranpi kachkani, paykunaqa ñoqapa nisqaykunatam suwakuypaq-suwakuchkanku willakuqmasinkumanta.

³¹ Ñoqa Tayta Diosmi nini: Ñoqaqa chay willakuqkunapa contranpim kachkani, paykunaqa yanqalla rimaspam ninku: “Kaynatam Tayta Dios nin” nispa.

³² Ñoqa Tayta Diosmi nini: Yanqakunata mosqoruspa runaykunata pantarachiq willakuqkunapa contranpim kachkani. Paykunaqa runaykunatam pantachin llulla willasqankuwan chaynataq rimaylla-rimasqankuwan. Ñoqa Tayta Diosmi nini: Paykunataqa manam kachamurqanichu nitaqmi kamachimurqanichu. Paykunaqa manam yanapayta atinchu runaykunataqa.

Tayta Diospa rimasqankunata imaynam willakunankumanta

³³ Yaw Jeremias, sichu kay runakunapas otaq ñoqamanta willakuq tukuqpas otaq sacerdotepas tapusunkiman: “¿Imatataq Tayta Diosqa willasurqanki?” nispa hinaptinqa paykunatam ninki: “Tayta Diospa nisqanman hinaqa paypaqsi kankichik llasaq qepi hina chaysi wischurusunkichik” nispa.

³⁴ Sichu ñoqamanta willakuq tukuqpas otaq sacerdotepas otaq hukkaqnin runapas ninman: “Tayta Diospa willakusqanmi kayqa” nispa hinaptinqa chay runatam ayllunkunatawan castigasaq.

³⁵ Runamasikichikwanqa hinaspa aylluykichikwanqa: “¿Imanispataq Tayta Diosqa contestarqa otaq imatataq payqa nirqa?” nispam ninakunkichik.

³⁶ Amañam ninkichikchu: “¿Imatataq Tayta Diosqa willakurqa?” nispaqa. Sapakamapa willakusqanqariki kikinpa rimasqallanmi. Qamkunaqa yupaychasqanchik Llapallan Kamachiq Tayta Diospa nisqantam otaq sapallan kawsaq Diospa nisqantam tikrarunkichik.

³⁷ Yaw Jeremias, ñoqamanta willakuq tukuqkunatayá tapuy kaynata: “¿Imanispataq Tayta Diosqa contestarqa otaq imatataq payqa nirqa” nispa.

³⁸ Sichu: “Tayta Diospa willakusqanmi kayqa” nispa nisuptikiqa ñoqa Tayta Diospa nisqaytam kaynata ninki: “Amañam rimankichikchu chaynataqa nichkaptiypas hinallaraq rimasqaykichikraykum

³⁹ qamkunataqa qepita hina hoqariruspa wischurusqaykichik, wischurusaqtaqmi qamkunamanwan abueloykichikkunaman qosqay llaqtatapas.

⁴⁰ Qamkunataqa wiñaypaqmi penqayman churasqaykichik, mana qonqaypas atinapaqmi humillachisqaykichik.”