Jeremías 22 - Quechua Ayacucho Bible 1987

Juda nacion reykunapa contranpi willakuymanta

¹ Tayta Diosmi ñoqa Jeremiasman kaynata niwarqa: Juda nacion reykunapa palacionman rispaykim kaynata willamunki:

² “Juda nacionpi gobiernaq Davidpa castan reylláy, serviqnikikunawan chaynataq Jerusalen llaqtaman yaykuqkunawanyá Tayta Diospa nisqanta uyariychik.

³ Tayta Diosmi kaynata nin: ‘Runakunapaq allin arreglota ruraspayá, allin kaqkunallata ruraychik, ñakariq runakunatayá ñakarichiqninmanta libraychik. Amam ñakarichinkichikchu forasterotaqa, mana piyniyoqtaqa nitaq viudatapas. Kay sitiopiqa amamá inocente runataqa wañuchinkichikchu.

⁴ Kay nisqaykunaman hina cheqapta ruraptikichikqa Rey Davidpa miraynin gobiernaq reykunam carretakunapi chaynataq caballokunapi sillasqa kay palaciopa zaguanninta yaykunqaku. Paykunaqa yaykunqa serviqninkunapiwanmi chaynataq runankunapiwanmi.

⁵ Ñoqa Tayta Diosmi nini: Kay nisqaykunata mana kasukuptikichikqa kay palaciom taqmasqa kanqa, nispa.’ ”

⁶ Juda nacion reypa palacionmantam Tayta Dios kaynata nin: Qamqa Galaad allpa hinam ñoqapaq kanki. Qamqa Libano Orqopa puntan hinam kanki. Ichaqa juraspaymi qamtaqa chunnichisqayki. Mana runayoq llaqtata hinam chunnirachisqayki.

⁷ Tuñichisunaykipaqmi kachamusaq armasqa runakunata. Paykunam kuchunqaku kuyayllapaq cedroykikunata. Paykunaqa ninamanmi wischunqaku chaykunata.

⁸ —Achka nacionkunamanta hamuq runakunam kay llaqtapa hichpanta pasaspa ninakunqaku: “¿Imanasqataq Tayta Diosqa kay hatun llaqtataqa kaynatañaqa rurarun?” nispa.

⁹ Chaymi contestanqaku: “Chaynaqa kachkanku yupaychasqanku Tayta Dioswan contrato rurasqankuta saqerusqankuraykum chaynataq mana reqsisqanku taytacha-mamchakunamanña qonqorakuspa adorasqankuraykum” nispa.

Rey Salumpa contranpi Jeremiaspa rimasqanmanta

¹⁰ Wañukuq Rey Josiasmantaqa amañayá waqaychikchu. Amañayá paymanta llakikuspaqa waqaychikchu. Presochasqa riqmantayá aminaykichikkama waqaspaqa-waqaychik. Manaña haykapipas kutimuqmantayá waqaspaqa-waqaychik. Nacesqan allpaman manaña kutimuqmantayá waqaspaqa-waqaychik.

¹¹ Taytan Josiaspa rantinpi gobiernaruptinmi Juda nacionpa reynin Salum kay sitiomanta preso pusasqa karqa. Salunmantam Tayta Dios kaynata nirqa: —Salumqa manañam kutimunqachu.

¹² Payqa preso pusasqanku llaqtapi wañukuspanmi kay naciontaqa manaña haykapipas rikunqachu —nispa.

Rey Joacimpa contranpi Jeremiaspa rimasqanmanta

¹³ Mana allinta ruraspa palacioyki hatarichiq runa ¡qamqa imaynaraq kanki! Allin arreglota mana ruraspa hatun salakuna hatarichiq runa ¡qamqa imaynaraq kanki! Runamasinwan debalde llamkachikuq runam qamqa kanki. Llamkasqanmanta mana pagapuq runam qamqa kanki.

¹⁴ “Hatun palaciotam hatarichisaq” nisparaqmi ninki. “Altosninpi hatun salayoqtam hatarichisaq” nisparaqmi ninki. Hatun ventanakunatam rurarunki. Cedromanta tablakunawanmi tablearachinki. Chaykunataqa pukawanraqmi pintarachinki.

¹⁵ Cheqap reyqa kawaq ¿cedrosapallaña wasipi *f**yachaspaykichu? ¿Taytaykipa mikunanqa pisirqachu? ¿Taytaykipa tomananqa pisirqachu? Payqa allin arreglotam rurarqa. Payqa allinkunatam rurarqa. Chaymi tukuy imapi allin karqa.

¹⁶ Payqa wakchakunapa asuntontam defienderqa. Ñakariqkunapa asuntontam defienderqa. Chayraykum tukuy imapi allin karqa. ¿Manachum payqa sumaqta reqsiwarqa? Ñoqa Tayta Diosmi chaynata nini.

¹⁷ Qanmi ichaqa engañowan ganayllapi piensachkanki. Inocente runakuna wañuchiyllapim piensachkanki. Ñakarichiyllapi engañayllapim piensachkanki.

¹⁸ Chayraykum Josiaspa churinmanta otaq Juda nacionpa reynin Joacinmanta Tayta Dios kaynata nin: Wañuptinqa manam pipas waqanqachu. Paymantaqa manam pipas ninqachu: “¡Ay wawqelláy, ay panilláy!” nispaqa. Paymantaqa manam pipas waqanqachu: “¡Ay Señorlláy, ay reynilláy!” nispaqa.

¹⁹ Wañuruq asnota hinam paytaqa pampanqaku. Hawamanmi paytaqa qachachyanqaku. Jerusalen llaqtamantam wischurunqaku.

Jerusalen llaqtapa contranpi willakuymanta

²⁰ Jerusalen llaqtapi *f**yachaqkuna, Libano Orqoman seqaspayá qayakamuychik. Basan lawman rispayá uyarichikamuychik. Abarim Orqokunaman seqaspayá qaparimuychik. Kuyasuqnikikuna vencerachikusqanmantayá qaparimuychik.

²¹ Hawka kachkaptikichikraqmi rimapayarqaykichik ichaqa mana kasukuqmi karqankichik. Warma kasqaykichikmantaraqmi chaynaqa karqankichik. Nisqaykunata mana kasukuqmi karqankichik.

²² Kamachiqnikikunam cheqechisqa kanqa. Llapallankum wayrawan hina cheqechisqa kanqa. Kuyaqnikikunatam pusanqaku presochasqata. Penqarikunkim mana allinkuna rurasqaykimanta. Humillakunkim mana allinkuna rurasqaykimanta.

²³ Qamqa *f**yachachkanki cedrowan tableasqa palaciopim. Qamqa *f**yachachkanki “Libano” sutiyoq palaciopim. Ichaqa ¡imaynataraq qaparkachanki nanay hapisuptiki, wachakuq warmipa nanaynin hina hapisuptiki!

Rey Jeconiaspa contranpi willakuymanta

²⁴ Joacimpa churinmanmi otaq Juda nacionpa reynin Jeconiasmanmi Tayta Dios kaynata nin: —Vidayraykum jurani, *f**alleq makiypi sellonay anillo kaptikipas chaymantam horqoruykiman

²⁵ wañuchiy munasuqnikiman qoykunaypaq. Anchallataña manchakusqayki Babilonia nacionpa reynin Nabucodonosormanmi chaynataq Caldea runakunamanmi qamtaqa qoykusqayki.

²⁶ Mamaykitawan qamtam qarqosqaykichik mana nacesqaykichik nacionman hinaptinmi chaypi wañunkichik.

²⁷ Chaynaqa tukuy sonqoykichikwan kay allpaman kutimuyta munaspapas manam kutimunkichikchu —nispa.

Jeremiaspa rimarisqankuna

²⁸ ¿Wischupakusqa allpa manka hinachu Jeconiasqa? ¿Pakipasqa allpa-manka hinachu Jeconiasqa? ¿Manaña pipapas munasqan paki manka hinachu payqa? ¿Imanasqataq paytaqa qarqonqaku? ¿Imanasqataq churinkunatapas qarqonqaku? ¿Imanasqataq qarqonqaku paykunataqa mana reqsisqanku nacionmanqa?

²⁹ Kay pachapi runakuna, uyariychik. Tayta Diospa nisqantayá uyariychik.

³⁰ Tayta Diosmi nin kaynata: Kay runamantayá libropi qellqaychik. Mana churiyoq hina kasqanmantayá qellqaychik. Manam allinchu lloqsinqa tukuy rurasqanpipas. Hina chaynallam kanqa miraynin runakunapas. Davidpa gobiernasqanpiqa manam castankunaqa tiyanqachu. Juda nacionpi gobiernananpaqqa manañam castankunaqa tiyanqachu.