Jeremías 21 - Quechua Ayacucho Bible 1987

Jerusalen llaqta tuñichisqa kananmanta

¹ Rey Sedequiasmi kacharqa Malquiaspa churin Pasurtawan Maasiaspa churin sacerdote Sofoniasta chaynapi Jeremiasta kaynata nimunankupaq:

² —Ama hina kaspaykiyá Tayta Diosta mañakuy ñoqanchikpaq. Babilonia nacionpa reynin Nabucodonosormi atacawachkanchik, ichapas Tayta Diosqa ñawpaq tiempopi hina admirakuypaq kaqkunata ruraspan Nabucodonosorta asurirachinman —nispa.

^3-4 Chaymi Jeremiasñataq Israelpa yupaychasqan Tayta Diospa nisqanta Rey Sedequiasman nimunankupaq kaynata nirqa: —Babilonia nacionpa reyninpa contranpi peleasqaykichik armakunatam kikikichikpa contraykichikpi kutiriykachisaq. Murallaykichikpa hawa lawninmanta atacamuq Caldea runakunatañataqmi kay llaqtapa chawpinpi huñusaq.

⁵ Kikiypunim qamkunapa contraykichikpi ancha hatun atiyniywan chaynataq hatun castigowan peleasaq. Ruparichkaq nina hina ancha piñakuyniywanmi peleasaq.

⁶ Kay llaqtapi *f**yachaqkunata castigaptiymi runakunapas chaynataq animalkunapas mancharikuypaq peste onqoywan wañunqaku.

⁷ Ñoqa Tayta Diosqa ninitaqmi: Babilonia nacionpa reynin Nabucodonosormanmi chaynataq wakin enemigonkunamanmi qoykusaq Juda nacionpa reynin Sedequiastawan serviqninkunata. Qoykusaqtaqmi peste onqoymanta puchuqkunatapas, guerrapi wañuqkunamanta puchuqkunatapas, yarqaywan wañuqkunamanta puchuqkunatapas chaynataq wañuymanta llaqtapi llapallan puchuqkunatapas. Paykunatamá Nabucodonosor mana kuyapayaspan, mana favorecespan hinaspa mana llakipayaspan guerrapi wañuchinqa.

⁸ —Chay runakunamanqa nimunkitaqmi ñoqa Tayta Diospa kayna nisqayta: “Kunanmi akllakunkichik kawsanaykichikpaq otaq wañunaykichikpaqpas.

⁹ Kay llaqtapi puchuqkunaqa guerrapim otaq yarqaymantam otaq peste onqoywanmi wañunkichik. Aswanqa Caldea runakunapa otaq kay llaqtapa muyuriqninmanta atacamuqkunapa makinman churakuspaqa kawsankichikmi. Vidallaykichiktapas salvankichikmi.

¹⁰ Ñoqa Tayta Diosmi nini: Ñam tantearuniña kay llaqtata manaña favorecespay castiganaypaq. Babilonia nacionpa reyninmanña qoykuptiymi kañaykunqa.”

Juda Nacion reypa contranpi willakuymanta

¹¹ Juda nacion reypa castankunamanyá nimuy, ñoqa Tayta Diospa nisqayta uyarinankupaqyá nimuy:

¹² “Rey Davidpa castankuna, ñoqa Tayta Diosmi kaynata nikichik: Sapa tempranonyá allin arreglota ruraychik. Ñakariqkunatayá ñakarichikuq runakunamanta libraychik chaynapi rupachkaq nina hina mana piñakurunaypaq, chaynapi mana allinkuna rurasqaykichikmanta mana piñakurunaypaq, chaynapi mana pipapas amachay atinan nina hina mana piñakurunaypaq.”

Jerusalen llaqta castigasqa kananmanta

¹³ Ñoqa Tayta Diosmi nini: Qechwapa altonpi tiyaq llaqta, ñoqaqa contraykipim kachkani. Pampapa chawpinpi hatun rumi hina llaqta, ñoqaqa contraykipim kachkani. “¿Pitaqsi ñoqanchiktaqa atacawasun?” nisparaqmi ninkichik. “¿Pitaqsi amparakunanchikmanqa chayamunqa?” nisparaqmi ninkichik.

¹⁴ Ñoqa Tayta Diosmi nini: Mana allinkuna rurasqaykichikpa rurunman hinam castigasqaykichik qamkunata. Muyuriqnikipi tukuy kaqkunatapas ruparunankamam kañaykachisaq montekikunata.