Jeremías 20 - Quechua Ayacucho Bible 1987

Pasurpa contranpi Jeremiaspa rimasqanmanta

¹ Tayta Diospa templonpi kamachikuq, Imerpa churin sacerdote Pasurñataqmi Jeremiaspa rimasqankunata uyariruspan

² kamachirqa Diosmanta willakuq Jeremiasta azotenankupaq chaynataq cepo nisqankupi chakinkunata hapichinankupaq. Chay cepom karqa Tayta Diospa templonpa hichpanpi otaq Benjamin sutiyoq alto punkupi.

³ Paqarinnintin punchaw Jeremiasta cepomanta Pasur horqorachimuptinmi payta Jeremias nirqa: —Tayta Diosqa manañam Pasurwanñachu sutichasunki aswanqa Magor-misabibwanñam.

⁴ Tayta Diosmi nin: “Qamtaqa rurarusqayki kikikipapas chaynataq llapallan amistadnikikunapapas mancharikunantañam. Qawachkaptikim paykunata enemigoykikuna guerrapi wañuchinqaku. Juda nacionpi llapallan runakunatam qoykusaq Babilonia nacionpa reyninmanña. Paymi wakinta presochasqata Babilonia lawman pusachinqa, wakintañataqmi guerrapi wañuchinqa.

⁵ Enemigoykichikmantaqmi qoykusaq kay llaqtapa qori-qollqentapas, tukuy huñusqankutapas chaynataq tukuy kuyayllapaq kapuqninkutapas. Babilonia lawman astanankupaqtaqmi qoykusaq Juda nacion reykunapa llapa qori-qollqentapas.

⁶ Qampas Pasur, wasikipi llapallan *f**yachaqkunapiwanmi presochasqa rinkichik Babilonia lawman. Chaypi wañuspam chaypitaq pampasqa kanki, chaypitaqmi pampakunqaku llapallan amistadnikikunapas. Paykunamanmi Diosmanta willakuq tukuspa llullakunata willarqanki” nispa.

Tayta Diosman Jeremiaspa quejakusqanmanta

⁷ Dios Taytalláy, engañaypaqmi qamqa engañaruwanki. Munayniyoq kasqaykiraykum engañaruwanki. Tukuy punchawmi ñoqataqa asipayawanku. Llapallankum ñoqataqa burlakuwanku.

⁸ Sapa kutillam rimani. Sapa kutillam paykunaman qaparini. Dañolla kananmantam qayakuni. Tuñichisqa kananmantam qayakuni. Palabraykita willakusqayraykum tukuy punchaw insultawanku. Palabraykita willakusqayraykum tukuy punchaw burlakuwanku.

⁹ Ñoqam piensani qanmantaqa manaña yuyarinaypaq. Ñoqam piensani sutikipiqa manaña rimanaypaq. Chaywanpas palabraykiqa nina hinaraqmi sonqoypi ruparichkan. Chaywanpas palabraykiqa nina hinaraqmi tulluykunapi pakarayachkan. Chay nina hina rupariytaqa munarqanim harkayta. Ichaqa manamá atirqanichu harkayta.

¹⁰ Uyarichkanim achkallaña runakunapa rimasqanta: Tukuy hinastinpim mancharikuy kachkan, nispa rimasqankuta. Denunciaychik, nispam rimanakuchkanku. Denunciasunchik, nispam rimanakuchkanku. Llapan amistadniymi urmarunayta suyachkanku. Ichapas engañarachikunman, nispam nichkanku. Paytaqa vencesunchikmi, nispam nichkanku.

¹¹ Dios Taytalláy, chaywanpas qamqa ñoqawanmi kachkanki. Manchakuypaq soldado hinam ñoqawan kachkanki. Chayraykum qatikachawaqniykunaqa urmarunqaku. Paykunaqa manañam venceytaqa atiwanqakuchu. Paykunaqa hatun penqaypim rikurirunqaku. Manam imapas lloqsinqa allinninkupaqchu. Haykapipas manaña qonqay atina penqaypim kanqaku.

¹² Llapallan Kamachiq Dios Taytalláy, allin ruraqkuna reqsiq Dios Taytalláy, qamqa reqsinkim runapa sonqontaqa. Qamqa yachankim runapa piensasqantaqa. Qawachiwayá paykuna vengakusqaykita. Qanmanmi willakamurqayki asuntoyta.

¹³ Tayta Diospaqyá takiychik. Tayta Diostayá alabaychik. Mana imayoqtam payqa salvaykun. Mana allin ruraqkunamantam salvaykun.

¹⁴ Ñakasqayá kachun nacesqay punchawqa. Amayá bendecisqachu kachun mamaypa wachakuwasqan punchawqa.

¹⁵ Taytayta kusirichiqpas ñakasqayá kachun. Taytayman willaqpas ñakasqayá kachun. “Qarim nacerapusunki” niqpas ñakasqayá kachun.

¹⁶ Chayna runaqa kachun Tayta Diospa chunnichisqan llaqta hinayá. Payqa kachun mana llakipayaspa tuñichisqa llaqta hinayá. Achikyamuqtayá qapariyta uyarichun. Chawpi punchawpiyá guerrapi qapariyta uyarichun.

¹⁷ Manamya mamaypa wiksanpichu Tayta Dios wañurachiwarqa. Chayna kaptinqa mamaypa wiksallanpich sepulturay kanman karqa. Chayna kaptinqa wiñaypaqchá wiksallanpi kayman karqa.

¹⁸ ¡Imapaqraq mamay wachakuwarqa ñakariyllata qawanaypaq! ¡Imapaqraq mamay wachakuwarqa waqayllata qawanaypaq! ¡Imapaqraq mamay wachakuwarqa penqayllapi kawsaspa wañunaypaq!