Jeremías 2 - Quechua Ayacucho Bible 1987

Israelpa mirayninkuna Diosta qepanchakusqankumanta

¹ Tayta Diosmi rimapayawaspan niwarqa:

² Jerusalen llaqtapi runakunaman nimuy. Allinta uyarinankupaq qaparispa nimuy: “Kaynatam Tayta Dios nin” nispayá nimuy. Sipas kaspa kuyawasqaykitam yuyarini. Casararuptiy kuyawasqaykitam yuyarini. Chunniqninta qatimuwasqaykitam yuyarini. Mana tarpusqa chunniqnin qatiwasqaykitam yuyarini.

³ Israel runakunaqa sapaqchakusqaymi karqankichik. Cosechaypa punta rurunkuna hinam karqankichik. Pipas dañasuqnikikunatam cargocharqani. Desgraciakunawanmi paykunata castigarqani. Ñoqa Tayta Diosmi chaynata nini.

⁴ Jacobpa castankuna, Tayta Diospa palabranta uyariychik. Israelpa llapallan castankuna, Tayta Diospa palabranta uyariychik.

⁵ Paymi qamkunaman kaynata nisunkichik: ¿Ima faltaytataq abueloykichikkuna tarirqa ñoqamanta karunchakunankupaqqa? ¿Ima faltaytataq abueloykichikkuna tarirqa mana imapaq valeq taytachakunata adoranankupaqqa, chaynapi mana imapaq valeq taytachakuna hina kanankupaqqa?

⁶ Ñoqamantaqa manam tapuyllapas-tapukurqakuchu: “¿Maytaq Egiptomanta horqomuwaspanchik chunniqninta pusamuwaqninchikqa?” nispallapas. “¿Maytaq qaqallaña chaki wayqonkunata pusamuwaspanchik chaki allpanta pusamuwaqninchikqa?” nispallapas. “¿Maytaq sinchi tutayay allpanta pusamuwaspanchik runapa mana purinanta pusamuwaqninchikqa?” nispallapas. “¿Maytaq runapa mana *f**yachanan allpankunata pusamuwaqninchikqa?” nispallapas.

⁷ Tukuy imakunapa wiñanan allpamanmi pusamurqaykichik. Rurunkunata mikunaykichikpaqmi pusamurqaykichik. Allinnin kaqkunata mikunaykichikpaqmi pusamurqaykichik. Ichaqa qamkunam kay allpayman yaykuramuspaykichik mana qawanaypaq hinataña rurarunkichik. Akllasqay allpatam millakuypaqtaña rurarunkichik.

⁸ Sacerdotekunaqa manam tapukurqakuchu: “¿Maytaq Tayta Diosqa?” nispallapas. Manam reqsiwarqakuchu yachachikuyniykunata yachachiqkunapas. Mana kasuwarqakuchu kamachikuqkunapas. Ñoqamanta willakuqkunapas Baal sutiyoq taytachamantañam willakurqaku. Mana valeq taytachakunatañam qatikurqaku.

Israel castapa contranpi Diospa quejakusqanmanta

⁹ Chayraykum ñoqa Tayta Dios nini: Huktawanmi quejakusqaykichik qamkunata. Huktawanmi quejakusaq willkaykichikkunata.

¹⁰ Chipre sutiyoq islapi runakunata qawamuychik. ¿Qamkunapa rurasqaykichikta hina rurasqakuchus? Cedar lawpi kaqkunata sumaqta tapuchimuychik. ¿Qamkunapa rurasqaykichikta hina rurasqakuchus?

¹¹ Diosninkuqa taytachakunalla kachkaptinpas ¿cambiasqakuchus? Wakin nacionkunaqa manam diosninkutaqa saqerqakuchu. Runaykunam ichaqa ñoqata saqeruwanku. Alabakunanku Diosninkutam saqeruwanku. Mana imapaqpas valeq taytachakunata qatinankuraykum saqeruwanku.

¹² Ñoqa Tayta Diosmi kaynata nini: Cielokuna, admirakuychik. Kay rurasqankumanta admirakuychik.

¹³ Iskay rikchaq huchatam runaykuna rurarunku. Yakuyoq pozo hina kawsachiqninkutam saqeruwanku. Kikinkuñam toqokurunku pozokunata, yaku mana qochachiq pozokunata.

Huchankupa pagonmanta

¹⁴ ¿Israel castakunaqa sirvientechu suwasqa kanankupaqqa? ¿Paykunaqa nacerqaku sirvientepaqchu suwasqa kanankupaqqa?

¹⁵ Paykunapa contranpim malta leonkuna hina qaparkachanku. Paykunapa contranpim mancharikuypaqta qaparkachanku. Allpankutam chunnirachirqaku manaña pipas *f**yachananpaq. Llaqtankutam kañaykurqaku manaña pipas yachananpaq.

¹⁶ Menfis llaqtapi *f**yachaqkunam umaykita pakirunku. Tafnes llaqtapi yachaqkunam umaykita pakirunku.

¹⁷ Saqeruwasqaykichikraykum chaykunaqa pasasurqankichik. Yupaychasqaykichik ñoqa Tayta Diostam saqeruwarqankichik. Ñannin pusamusuqnikichiktam saqeruwarqankichik.

¹⁸ Kunanqa ¿imatataq horqokunki Egipto nacionman rispayki Nilo Mayupa yakunta tomaspaykiqa? Kunanqa ¿Imatataq horqokunki Asiria nacionman rispayki Eufrates Mayupa yakunta tomaspaykiqa?

¹⁹ Mana allinlla rurasqaykichikmi corregisunkichik. Ñoqata saqeruwasqaykichikmi sentenciasunkichik. Tanteaspaykichikyá cuentata qokuychik yupaychasqaykichik Tayta Diosta saqeruwaynikichikqa mana allinnikichikpaq kasqanta. Tanteaspaykichikyá cuentata qokuychik yupaychasqaykichik Tayta Dios saqeruwaynikichikqa llakikuynikichikpaq kasqanta. Manam respetawarqankichikchu ñoqataqa. Chaynatam nini Llapallan Kamachiq Tayta Diosqa.

Israelpa castankuna mana kasukusqanmanta

²⁰ Yugonta pakipachkaq toro hinam unayña hoqarikurqanki. Coyundanta tipipachkaq toro hinam unayña hoqarikurqanki. “Manam servisqaykiñachu” nispam niwarqanki. Llapa alto moqokunapim chuchumika warmi hina ankallarqanki. Llapa rapisapa sachakunapa sikinpim chuchumika warmi hina ankallarqanki.

²¹ Akllasqa uvas plantata hinam plantarqayki. Ancha allin uvaspa murunta hinam tarpurqayki. ¿Imaynanpimá purun uvas plantamanqa tikrakurunki? ¿Imaynanpimá manaña reqsipay uvas plantaqa rikurirunki?

²² Lejiawan mayllakuptikipas mana allin rurasqaykipa mirkantaqa hinallam qawachkani. Anchallataña jabonakuptikipas mana allin rurasqaykipa mirkantaqa hinallam qawachkani. Ñoqa Tayta Diosmi chaynata nini.

²³ Qamqa manapunim niwaqchu: “Manam qanrachakurqanichu” nispaqa. Qamqa manapunim niwaqchu: “Baal sutiyoq taytachataqa manam qatirqanichu” nispaqa. Yuyariy qechwapi purisqaykikunata. Reqsikuy tukuy rurasqaykikunata. Qamqa kanki kallpachkaq china camello hinam, chichukunanpaq kallpakachaq china camello hinam.

²⁴ Chichukunan punchawkunapi montepi china asno hinam qamqa kanki. Wayrakunapas muskikachaq monte asno hinam kanki. Chichukunanpaq rupariynintaqa ¿pitaq tanichinman? Orqo asnoqa mana pisipaspallanmi tariykunman. Chichukunan tiempopiqa chayllam tariykunman.

²⁵ Israel castakuna, cuidakuychik, yanqataq qala chakillaña puriwaqchik taytachakunata qatispa. Israel castakuna, cuidakuychik, yanqataq yakunayachikuwaqchik taytachakunata qatispa. Chaynata nichkaptiypas niwarqankichikmi: “Yanqañam, manam atiymanñachu” nispa. “Sapaq dioskunatañam kuyaruni” nispa. “Chaykunatañam qatikusaq” nispa.

Israel castakuna castigasqa kanankumanta

²⁶ Suwakuq runam tarirachikuspan rikurirun hatun penqaypi. Lliwmi Israel castaqa rikurirunkichik hatun penqaypi. Reynikichikkunawan kamachikuqkunam hatun penqaypi rikurirunqaku. Sacerdotekichikkunam ñoqamanta willakuqkunapiwan hatun penqaypi rikurirunqaku.

²⁷ Qamkunam sachata nichkankichik: “Qanmi taytayku kanki” nispa. Qamkunam rumita nichkankichik: “Qanmi wachakuqniyku kanki” nispa. Ñoqatam ichaqa qepanchakuruwankichik. Uyaykichiktapas ñoqamantam pakaruwankichik. Ñakarisqaykichik tiempopim ichaqa niwankichik: “Hatarispayki salvaykuwayku” nispaykichik.

²⁸ Juda castakuna, taytachakuna rurasqaykichikqa ¿maypitaq kachkanku? Achkallaña llaqtaykikuna hinam taytachaykikunapas achkallaña kachkanku. Ñakarisqaykichik tiempopiyá hamusunkichik. Qamkunaman hamuspankuyá librasunkichik.

²⁹ ¿Imanispataq ñoqapa contraypiqa quejakuwaqchik? Mana kasuwachkaspaykichikqa ¿imanispataq quejakuwaqchik? Ñoqa Tayta Diosmi chaynata nini.

³⁰ Yanqapaqmi castigarqani castaykichikkunatapas. Paykunaqa manam munarqakuchu corregikuytapas. Imaynam leon wañuchin runakunata. Chaynam espadawan wañuchirqankichik ñoqamanta willakuqkunata.

³¹ Yaw kunan miraykuna, atiendeychik, Ñoqa tayta Diospa palabraytayá atiendeychik: ¿Chunniq allpachum qamkunapaqqa karqani? ¿Tutayaypa kanan allpachum qamkunapaqqa karqani? Runaykuna ¿imanasqataq niwankichik: “Munasqaykupim purikuyta munaniku” nispaqa? ¿Imanasqataq niwankichik: “Manañam qanmanqa kutirimuymankuñachu” nispaqa?

³² Sipasqa ¿qonqarunmanchum adornonkunawan churakuyta? Casarakuqpas ¿qonqarunmanchum adornonkunata? Runaykunam ichaqa unayña qonqaruwanku ñoqata.

³³ Kuyaqnikikuna maskaytaqa sumaqtam yachanki. Mana allin warmikunatapas kawsasqaykitam yachachinki.

³⁴ Wakcha runakunapa yawarninwanmi pachaykita qanracharunki. Inocente runakunapa yawarninwanmi pachaykita yawarcharunki. Mana suwakuchkaq runa hapisqaykipa yawarninwanmi pachaykita qanracharunki.

³⁵ Chaywanpas ninkiraqmi: “Ñoqaqa mana huchayoqmi kani” nispayki. “Manam huchallikurqanichu” nisqaykiraykum sentenciasqayki.

³⁶ Mana valeqpaqmi churakurunki huklaw ñankunaman muyurispayki. Asiria nacionpi kaqkunam penqayman churasunki. Egipto nacionpi kaqkunapas penqaymanmi churasunki.

³⁷ Umaykita hapikuykuspaykim lloqsimunki. Penqakuywanmi Egipto nacionmanta lloqsimunki. Ñoqa Tayta Diosmi qepanchakuruni hapipakusqayki runakunataqa. Manam yanapasunkichikchu paykunaqa.