Jeremías 18 - Quechua Ayacucho Bible 1987

Manka ruraqwan hinaspa mituwan rikchanachiymanta

¹ Tayta Diosmi ñoqa Jeremiasta niwarqa:

² —Manka ruraqpa wasinta riptikim chaypi willamusqayki imam ninayta —nispa.

³ Chaymi manka ruraqpa wasinta chayaruptiy payqa ruedapa hawanpi mankata rurachkasqa.

⁴ Ichaqa chay manka ruraqpa rurasqan mankam hukman llosirurqa chaymi munasqanman hina mosoqmantaña rurarqa.

⁵ Chaymi Tayta Dios niwarqa:

⁶ —Israel castakuna ¿manachum chay manka ruraq hina qamkunawanpas munasqayta rurayman? Manka ruraqpa makinpi mitu hinam qamkunapas makiypi kachkankichik. Ñoqa Tayta Diosmi chaynata nini.

⁷ Tanteasqay horapim rimarisaq mayqan naciontapas otaq mayqan gobiernotapas plantata pilachkaq hina puchukachinaypaq, tuñichinaypaq chaynataq chinkarachinaypaq.

⁸ Chaywanpas sichu chay anyasqay nacionpi runakuna mana allinkuna rurasqankumanta wanakuptinkuqa, chay castiganaypaq tanteasqay castigotam manaña kachamusaqchu.

⁹ Tanteasqay horapiqa rimarisaqtaqmi mayqan naciontapas otaq gobiernotapas hatarichinaypaq chaynataq plantachkaq hina takyachinaypaq.

¹⁰ Chaywanpas sichu chay nacionpi runakuna mana allinkunata ruraspanku willasqaykunatapas mana kasukuptinkuqa manam favorecesaqchu chay tanteasqay kaqkunawanpas.

¹¹ —Kunanyá Juda nacionpi runakunatawan Jerusalen llaqtapi *f**yachaqkunata nimuy: “Ñoqa Tayta Diosmi contraykichikpi piensaspa castiganaypaq tanteachkani. Chaynaqa sapakamayá mana allin kawsasqaykichikmanta wanakuspa vidaykichiktawan ruraynikichikta allichaychik.”

¹² Chaywanpas paykunaqa kaynatam nisunki: “Yanqañam chay niwasqaykikuqa. Tanteasqaykuman hinam ñoqaykuqa kawsakusaqku, mana kasukuq sonqoykupa munasqantam sapakama rurakusaqku” nispa.

¹³ Chayraykum Tayta Dios nin: Nacionkunapiyá tapukamuychik runakunata ¿Pitaq uyarirqa chaykunata? Sumaq doncellawan tupachisqa Israel runakunam rurarunku manchakuypaqta.

¹⁴ ¿Huk kutillaqa Libano alto orqopi riti chinkarunmanchum? ¿Huk kutillaqa karumanta kallpamuq chiri yaku chakirunmanchum?

¹⁵ Runaykunam ichaqa ñoqata qonqaruwanku. Taytacha-mamachakunamanñam inciensota kañanku. Chay runapa pantarachisqanñam kachkanku. Ñawpaq tiempopi kawsasqankumantam pantarachin. Purisqankupim paykunataqa urmarachin. Mana purinanku ñankunamanñam pantarachin.

¹⁶ Chayraykum allpankupas chunniq allpaña kanqa. Chayraykum allpankupas tukuy tiempo asipayanaña kanqa. Chayninta puriqkunam admirakunqaku. Umankutaraqmi kusikuymanta kuyuchinqaku.

¹⁷ Israel casta runakunataqa enemigonkunapa qayllanmantam cheqerachisaq. Intipa qespimunan lawmanta pukumuq wayrata hinam cheqerachisaq. Desgraciapi rikuriptinkum manaña qawarispay qepanchakurusaq.

Jeremiaspa contranpi rimanakusqankumanta

¹⁸ Chay runakunam ninakurqaku: —Hakuchikyá Jeremiaspa contranpi tanteanakamunanchikpaq. Manam faltanqachu Diosmanta yachachiqninchik sacerdotekunaqa nitaq consejaqninchik yachayniyoq runakunapas nitaq Diosmanta willaqkunapa palabrankunapas. Acusamuspayá ima rimasqantapas ama kasusunchikchu —nispa.

Tayta Diosta Jeremias mañakusqanmanta

¹⁹ Dios Taytalláy, atiendeykuwayá ñoqallayta. Dios Taytalláy, uyariykuyá enemigoykunapa nisqanta.

²⁰ ¿Paykunapaq rurasqaymantachu, allinnninkupaq rurasqaymantachu mana allinwan pagawanqaku? ¿Manachum sepulturaytaraq toqochkanku? Yuyariyá qayllaykipi favorninkupi rimasqayta. Yuyariyá piñakuynikita amachanaypaq mañakusqayta.

²¹ Chaynaqa churinkunatayá yarqaymanta wañuchiy. Chaynaqa espadawanyá paykunata wañuchiy. Warminkutapas manaña wawayoqtayá ruray. Paykunataqa manaña qosayoqtyá ruray. Qarikunapas peste onqoywanyá wañuchunku. Mozokunapas guerrapi peleaspayá wañuchunku.

²² Hapiwanankupaq allpata uchkurusqankuraykuyá salteaqkunata qonqaymanta kachaykuy chaynapi wasinkupipas qaparisqanku uyarikunanpaq. Chakiykunapaq toqllakunata churarusqankuraykuyá salteaqkunata qonqaymanta kachaykuy chaynapi wasinkupipas qaparisqanku uyarikunanpaq.

²³ Dios Taytalláy, qamqa yachankim contraypi tukuy rimasqankuta, wañuchiwanankupaq tukuy piensasqankuta. Mana allin rurasqankutaqa amayá pampachaychu. Qayllaykipi huchallikusqankutaqa amayá pampachaychu. Qayllaykipiyá urmachiy paykunataqa. Piñakusqayki tiempopiyá ruray chaynataqa.