Jeremías 17 - Quechua Ayacucho Bible 1987

Huchallikusqankurayku Juda nacion castigasqa kananmanta

¹ Juda nacionniyoq runakunapa huchallikusqanqa yuyasqam kachkan. Fierropa puntanwan hinam chaykunaqa qellqasqa kachkan. Nina rumipa puntanwan hinam chaykunaqa qellqasqa kachkan. Tablapi qellqasqa hinaraqmi sonqonkupi kachkan. Altarninkupa esquinankunapim qellqasqa kachkan.

² Rapisapa sachakunapa hichpanpi, alto moqokunapa puntanpi altarninkumantam churinkupas yuyarinku. Rapisapa sachakunapa hichpanpi, alto moqokunapa puntanpi Asera sutiyoq mamachakunamantam yuyarinku.

³ Chakrapi orqokunaman riqkunatam nikichik: “Enteron nacionnikichikpim capillakunapi huchallikurqankichik. Qori-qollqekichiktawan tukuy kapuqnikichiktam saqueachisqaykichik.

⁴ Herenciaykichikpaq allpa qosqaytam mana tarpuspa saqenkichik. Mana reqsisqaykichik nacionpim enemigoykichikta servichimusqaykichik. Wiñaypaq rupaq ninata hinaraq piñachiwasqaykichikraykum servichimusqaykichik.

Wakin willakuykunamanta

⁵ Tayta Diosmi kaynata nin: Ñoqamanta rakikuspa runamasillanpi hapipakuq runaqa ñakasqayá kachun. Ñoqamanta rakikuspa runapa kallpallanpi hapipakuq runaqa ñakasqayá kachun.

⁶ Chay runaqa kanqa chunniqpi wiñaq sacha hinam. Chay runaqa kawsanqa taqrapi wiñaq sacha hinam. Qollpa allpapi wiñaq sacha hinam payqa kanqa. Mana pipapas *f**yachanan allpapi wiñaq sacha hinam payqa kanqa.

⁷ Ñoqa Tayta Diospi hapipakuq runaqa bendecisqam kanqa. Ñoqa Tayta Diospi confiakuq runaqa bendecisqam kanqa.

⁸ Chayna runaqa kanqa yakupa hichpanpi plantasqa sacha hinaraqmi. Chayna runaqa kanqa yakupa patanpi sapichakuq sacha hinaraqmi. Payqa kanqa rupay tiempopipas verdey-verdey rapisapa sacha hinaraqmi. Usyay tiempopipas qali-qali sacha hinaraqmi payqa kanqa. Tiempollanpi mana tipispa ruruq sacha hinaraqmi payqa kanqa.

⁹ Tukuy imamantapas engañakuqllañam runapa sonqonqa. Mana hampiy atinañam runapa sonqonqa. ¿Pitaqsi reqsinman runapa sonqontaqa?

¹⁰ Ñoqa Tayta Diosllam runakunapa piensasqantaqa yachani. Ñoqa Tayta Diosllam runakunapa sonqontapas pruebani chaynapi kawsasqankuman hina sapakamam paganaypaq, chaynapi rurasqankuman hina sapakamaman paganaypaq.

¹¹ Mana runtusqan oqllaq yutumanmi rikchakun engañowan apuyaq runaqa. Manaraq machuyachkaptinmi qori-qollqenqa payta saqerunqa. Wañukunan hichpaqa sonso runañam rikurirunqa.

¹² Santuarionchikpa kasqan sitioqa qallariyninmantapuni alto-alto sitiom. Santuarionchikpa kasqan sitioqa reypa kancharichkaq tiyanan sitiom.

¹³ Israelpa hapipakunan Dios Taytalláy, pipas saqerusuqnikiqa penqaypim rikurinqa. Qam Tayta Diosmi ninki: Ñoqamanta rakiruq runakunaqa allpapi qellqasqa suti hinam chinkarunqa. Qam Tayta Diosta saqerususqaykiraykum chinkarunqaku. Kallpaq yaku hina kachkaptiki saqerususqaykiraykum chinkarunqaku.

Tayta Diosta Jeremias mañakusqanmanta

¹⁴ Dios Taytalláy, hampiykuwaptikiqa sanoyasaqmi. Dios Taytalláy, salvaykuwaptikiqa salvakusaqmi. Qamqariki kanki ñoqapa alabanaymi.

¹⁵ Niwachkankum runakunaqa: ¿Imataq pasarun Tayta Diospa nisqantaqa? Kunanyá cumplikuchun paypa nisqankunaqa.

¹⁶ Qamta qatinaypaqqa manam michiq kayniytaqa saqerqanichu. Sasachakuy tiempokuna hamunantaqa manam munarqanichu. Qamqa yachankimiki chaykunataqa. Qampa qayllaykipim rimarqaniqa.

¹⁷ Amapuniyá manchachiwaychu qamqa. Castigo punchawpi amparaqniymi kanki qamqa.

¹⁸ Penqaymanyá churay qatikachawaqniykunataqa. Penqaymanqa amayá churawaychu ñoqallaytaqa. Paykunayá kachunku mancharichisqaqa. Amayá ñoqachu kasaq mancharichisqaqa. Desgracia punchawtaqa paykunamanyá chayachiy. Paykunatayá pasaypaqtaqa chinkachiy.

Samana punchawpi samanankumanta

¹⁹ Tayta Diosmi niwarqa: —Runakunapa Yaykunan sutiyoq zaguanman rispaykiyá chaypi sayaykamuy. Chaynintam yaykunkupas hinaspa lloqsinkupas Juda nacionpa reyninkuna. Chaynallatam ruranki Jerusalen llaqtapa llapallan zaguanninkunapipas.

²⁰ Chaypim kaynata nimunki: “Juda nacionpa reyninkuna, Juda nacionniyoq llapallan runakuna, Jerusalen llaqtapi *f**yachaqkuna otaq kay zaguanninta yaykuqkuna, uyariychik Tayta Diospa palabranta.

²¹ Paymi kaynata nin: ‘Vidaykichikraykuyá cuidakuychik. Samana punchawpiqa amam kay llaqtapa zaguan punkunkunata cargakunata apaykunkichikchu.

²² Chay punchawpiqa amataqmi wasikichikmantapas cargakunata horqonkichikchu, amamá imapipas llamkankichikchu. Abueloykichikkunaman kamachisqayta hinamá samana punchawtaqa ñoqapaq sapaqchankichik.

²³ Chay abueloykichikkunaqa manam kasukurqakuchu nitaqmi atienderqakuchu. Paykunaqa sonqonkuta rumiyaykachispam mana kasukurqakuchu nitaq corregikurqakuchu’ nispa.

²⁴ “Ñoqa Tayta Diosmi nini: ‘Kay llaqtapa zaguanninta samana punchawpi cargakunata mana apaykuptikichikqa chaynataq mana imallapipas llamkaspa chay punchawta ñoqapaq sapaqchapuwaptikichikqa.

²⁵ Rey Davidpa miraynin gobiernaq reykunawan kamachikuqkunam carretakunapi chaynataq caballokunapi sillasqa kay llaqtapa zaguanninta yaykunqaku. Paykunaqa yaykunqa Juda nacionniyoq runakunapiwanmi hinaspa Jerusalen llaqtayoq runakunapiwanmi. Kay llaqtapiqa runakunam wiñaypaq *f**yachanqaku.

²⁶ Runakunam hamunqa Juda nacionpi llaqtakunamanta, Jerusalen llaqtapa muyuriqninkunamanta, Benjamin castapa allpan lawmanta, waqtakuna lawmanta, orqokunamanta hinaspa Neguev lawmanta. Ñoqa Tayta Diospa temploymanmi apamunqaku lliw kañana animalkunata, wañuchipuwanankupaq wakin animalkunata, kawsaykunamanta ofrendakunata, inciensota hinaspa graciasta qowanankupaq ofrendakunata.

²⁷ Sichu mana kasuwaspaykichik samana punchawta mana sapaqchaspa chay punchawpiraq Jerusalen llaqtapa zaguan punkunkunata cargakunata apaykuptikichikqa kay llaqtapa zaguan punkunkunatam kañaykusaq hinaptinmi Jerusalen llaqtapa palacionkunatapas ruparunqa. Chay ninataqa manam pipas amachayta atinqachu.’ ”