Jeremías 16 - Quechua Ayacucho Bible 1987

Jeremiasta Tayta Dios kamachisqanmanta

¹ Tayta Diosmi rimapayawaspan niwarqa:

² —Kay nacionpiqa amam casarakunkichu nitaqmi churikipas kanqachu.

³ Ñoqa Tayta Diosmi nini kay nacionpi naceq churi-wawankunamanta, wachakuqnin mamakunamanta chaynataq taytankumantapas.

⁴ Paykunaqa ñakarichikuq onqoykunawanmi wañunqaku. Paykunamantaqa manam pipas waqanqachu nitaqmi pipas pampanqachu. Wanu hinam paykunaqa pampapi wischurayanqaku. Guerrawan, yarqaywanmi paykunaqa tukurunqa. Alton pawaq animalkunawan purun animalkunam ayankutapas mikunqa —nispa.

⁵ Tayta Diosqa niwarqataqmi: —Wañuchikuqpa wasinmanqa amam yaykunkichu. Amam waqaysinkichu nitaqmi llakiysinkichu. Kay runakunamantaqa qechuruniñam hawkayay qosqayta. Manañam paykunamantaqa kuyapayarikunichu nitaqmi llakipayarikunichu. Ñoqa Tayta Diosmi chaynata nini.

⁶ Warmakunawan yuyayniyoqkunam kay nacionpi wañunqaku ichaqa manam pipas paykunata pampanqachu. Paykunamanta waqaspankuqa manam cuerponkutapas kuchukunqakuchu nitaqmi chukchankutapas rutukunqakuchu.

⁷ Wañuchikuqkunata consuelanankupaq mikuytaqa manañam pipas ruranqachu. Chay wañuchikuqkunapa taytanña otaq mamanña wañukuptinpas manam copallatapas qonqakuchu consuelanankupaq.

⁸ —Amataqmi yaykunkichu convidopa kasqan wasimanpas mikuqkunawan mikunaykipaq otaq upyaqkunawan upyanaykipaqpas.

⁹ Israelpa yupaychasqan Llapallan Kamachiq ñoqa Tayta Diosmi nini: Kay sitiopi kusikuyllawanña qaparisqankutam chaynataq asikusqantam tanirachisaq. Tanirachisaqtaqmi casarakuqkunapa fiestan rurasqankutapas. Chaykunam qawachkaptikichik pasakunqa kawsasqaykichik tiempopi.

¹⁰ —Runakunaman kaykunata willaptikim paykuna tapusunki: “¿Imanasqataq Tayta Diosqa kay hatun castigokunamanta rimachisuchkanki? ¿Ima mana allintataq ruraruniku ñoqaykuqa? ¿Imapitaq huchallikuruniku yupaychasqanchik Tayta Diospa contranpiqa?” nispa.

¹¹ Chaymi ñoqa Tayta Diospa nisqayta kaynata ninki: “Qamkunapa abueloykichikkunam saqeruwaspan taytacha-mamachakunataña maskarqaku, chaykunapa qayllanpi qonqorakuspankum adorarqaku. Ñoqata saqeruwaspankumá yachachikuyniykunatapas mana kasukurqakuchu.

¹² Qamkunaqa abueloykichikkunamantapas aswanraqmi huchallikuchkankichik. Sapakamam rumi sonqoykichikpa mana allinkunalla munasqanpi kawsaspa mana kasuwarqankichikchu.

¹³ Chayraykum kay nacionmanta wischusqaykichik qamkunapapas nitaq abueloykichikpapas mana reqsisqan nacionman. Chaypim tuta punchaw adoramunkichik mana reqsisqaykichik taytacha-mamachakunata. Manañam llakipayasqaykichikchu” nispa.

¹⁴ —Chaywanpas ñoqa Tayta Diosmi nini: Hamuchkanmi tiempo: “Israelpa mirayninkunata Egipto nacionmanta horqomuq Kawsaq Tayta Diosraykum jurani” nispaña juranankupaq.

¹⁵ Aswanqa juraspaqa-juranqaku: “Israelpa mirayninkunata norte law nacionkunamanta chaynataq qarqosqan wakin nacionkunamanta horqomuq Kawsaq Tayta Diosraykum jurani” nispañam. Ñoqam kutichimusqaykichik abueloykichikkunaman qosqay allpaman.

¹⁶ —Ñoqa Tayta Diosmi nini: Challwiru kachamuchkaq hinam kachamusaq paykuna horqoq achka runakunata. Purun animalkuna hapiq runata kachamuchkaq hinam kachamusaq paykuna hapiq runakunata, chaynapim alto orqokunamanta, moqokunamanta hinaspa qaqapa raqrankunamanta paykunata horqomunqa.

¹⁷ Paykunapa imaynam kawsasqantaqa qawachkanim. Paykunapa mana allin kawsasqankuqa qayllaymantaqa manam chinkanmanchu, mana allin rurasqankupas ñawiymantaqa manam pakasqachu kachkan.

¹⁸ Puntataqa mana allinkuna rurasqankumantawan huchallikusqankumantam dobleta pagasaq. Paykunaqa wañusqa hina millakuypaq taytacha-mamachankuwanmi manaña asuykunaypaq hina allpayta rurarqaku, millakuypaq kaqkunawantaqmi huntachirqaku herenciankupaq qosqay allpatapas.

Tayta Diosta Jeremias mañakusqanmanta

¹⁹ Dios Taytalláy, qanmi kallpanchaqniyqa kanki. Dios Taytalláy, amparakuna wasi hinam qamqa kanki. Sasachakuypi lluptikunay wasi hinam qamqa kanki. Karu nacionkunamantam runakuna hamusunki. Kay pachapa cantonmantaraq hamuspankum nisunki: Abueloykum taytacha-mamachakunata hatallirqaku. Waspiy hina chinkaruq taytachakunallatam hatallirqaku. Mana imapaq valeq taytachakunallatam hatallirqaku.

²⁰ Runaqa ¿yaqachum dioskunata rurakunman? Chaykunaqa manam cheqap dioskunachu kanman.

Tayta Diospa contestasqanmanta

²¹ Chaynaqa kunanmi paykunaman yachachisaq atiyniyoq kasqayta. Chaynaqa kunanmi paykunaman yachachisaq kallpayoq kasqayta. Hinaptinmi yachanqaku sutiyqa Tayta Dios kasqanta.