Jeremías 15 - Quechua Ayacucho Bible 1987

Judá nacion castigasqa kananmanta

¹ Tayta Diosmi kaynata niwarqa: —Moisespiwan Samuelña ñawpaqniypi kaptinkupas manam kay runakunamantaqa llakipayarikuymanchu. Chaynaqa ñawpaqniymantayá qarqoy. Pasachunkuyá paykunaqa.

² “Maylawmantaq risaqku” niptinkuqa qanmi ninki: “Onqoywan wañunanpaq kaqkunaqa onqoywanyá wañuchunku. Guerrapi wañunanpaq kaqkunaqa guerrapiyá wañuchunku. Yarqaymanta wañunanpaq kaqkunaqa yarqaymantayá wañuchunku. Presota pusanankupaq kaqkunaqa huklaw nacionmanyá pusasqa kachunku.”

³ —Ñoqa Tayta Diosmi nini: Tawa rikchaq castigowanmi paykunata tukusaq. Guerrapi wañuchisqa kaptinkum allqokunaña paykunataqa qachachyanqa. Alton pawaq animalkunawan monte animalkunam tisapaspa mikunqaku.

⁴ Ezequiaspa churin Rey Manasespa otaq Juda nacion reypa Jerusalen llaqtapi imam rurasqanraykum kay pachapi llapallan nacionkunata katkatatachisaq.

⁵ Yaw Jerusalen llaqta ¿piraq qanmanta llakipayarikunqa? ¿Piraq qanmanta aynananaspa waqanqa? ¿Piraq “Hawkallachu” nispa tapurikunqa?

⁶ Ñoqa Tayta Diostam saqeruwarqanki. Qamqa qepamanmi kutirikurqanki. Chayraykum contraykipi makiyta hoqarispay castigasqayki. Llakipayayta amiruspaymi chinkarachisqayki.

⁷ Horquetawan wayrachichkaq hinam wayrachisqayki. Llaqtapa zaguanninkunapim chaynata rurasqayki. Mana churiyoqtañam runaykunataqa saqerusqaykichik. Mana kutirikamuwasqaykichikraykum ñoqaqa chinkarachisqaykichik.

⁸ Lamar qochapi aqomantapas achkataraqmi viudankutapas saqerusaq. Chawpi punchawllaraq kachkaptinmi mamantin mozokunaman wañuchiqta kachaykamusaq. Sonqoymantam llaqtataqa katkatatachispay mancharichisaq.

⁹ Qanchis wawayoq mamakunam desmayanqaku. Samatyaytapas mana atispankum desmayanqaku. Penqaypi kaspankum muspaypi hina rikurinqaku. Punchawraq kachkaptinmi inti tutayarunqa. Paykunamanta puchuqkunam wañuchisqa kanqa. Enemigonkum guerrapi wañurachinqa. Ñoqa Tayta Diosmi chaynata nini.

Jeremiaspa quejakusqanmanta

¹⁰ Ay mamáy ¿imapaqtaq wachakuwarqanki tukuy kay nacionpi runakunawan churanakunaypaq, tukuy kay nacionpi runakunawan atipanankunaypaq? Manam paykunataqa prestakurqanichu. Chaywanpas llapallanmi ñakawanku.

¹¹ Tayta Diosmi niwarqa: Cheqaptapunipas allinnikipaqmi librasqayki. Mana allin tiempopipas enemigollaykiwanmi ruegachisqayki. Sasachakuy tiempopipas enemigollaykiwanmi ruegachisqayki.

Tayta Diospa castigananmanta

¹² ¿Yaqachum pipas atirunman fierro pakiruyta? ¿Yaqachum pipas atirunman norte lawmanta fierro pakiruyta? ¿Yaqachum pipas atirunman bronce pakiruyta?

¹³ Qori-qollqekichiktam qechusuqnikichikkunaman qoykusaq. Llapallan huchaykichikmantam paykunamanña qoykusaq. Enteron nacionnikichikpi kapuqnikichiktam debaldella qoykusaq qechusuqnikichikkunaman.

¹⁴ Mana reqsisqaykichik nacionpim enemigoykichikta servichimusqaykichik. Piñakuyniymi nina hinaraq qamkunata tukurusunkichik.

Jeremiaspa mañakusqanmanta

¹⁵ Yachankim Dios Taytalláy. Yuyariwaspaykiyá watukaykamuway. Ñakarichiqniykunatayá vengakarapuway. Paykunapaq anaq piñakuq kaspaqa amayá munaychu wañurunaytaqa. Yachankimiki qamrayku insultawasqankutaqa.

¹⁶ Llapallan kamachiq Dios Taytalláy, rimapayawaptikim palabraykikunata mikuypaq-mikurqani. Chay palabraykikunaraykum sonqoypi anchallataña kusikurqani. Ñoqaqa sutikiwan sutichasqam kallani.

¹⁷ Kusikuyllapi piensaqkunamanqa manam hukllawakurqanichu. Akllawasqayki tiempomantam mana piwanpas *f**yacharqanichu. Piñakuynikiwan huntaykuwasqaykimantam mana piwanpas yacharqanichu.

¹⁸ ¿Imanasqataq manaña tukuq kay nanayniyqa? ¿Imanasqataq manaña hampiy atina kay heridayqa? ¿Chakiruqlla yaku hinachu ñoqapaq rikurirunki? ¿Mana takyaq yaku hinachu ñoqapaq rikurirunki?

Tayta Diospa contestasqanmanta

¹⁹ Chaymi Tayta Diosñataq niwarqa: Kutirikamuwaptikiqa kaqllamantam chaskisqayki. Kutirikamuwaspaykiqa kaqllamantam serviwanki. Yanqakuna rimaymanta wanakuspaykiqa ñoqapa rantiypim rimanki. Imam kaqllata rimaspaykiqa ñoqapa rantiypim rimanki. Paykunam qanman kutirikamunqa. Manam qamchu kutirinayki paykunamanqa.

²⁰ Tayta Diosqa niwarqataqmi: Kay runakunapaqmi allin takyaq perqata hina churarqayki. Qamtaqa broncemanta perqata hinam churarqayki. Contraykipi peleaspapas manam vencesunkichu. Qamta salvanaypaq yanapasqayraykum mana vencesunkichu. Qamta libranaypaq yanapasqayraykum mana vencesunkichu.

²¹ Mana allin runakunamantam lluptichisqayki. Mana llakipayakuq runakunamantam librasqayki.