Jeremías 14 - Quechua Ayacucho Bible 1987

Usyaywan castigasqa kasqankumanta

¹ Usyay kasqanraykum Tayta Dios ñoqa Jeremiasta niwarqa:

² Juda nacion runakunam waqachkanku. Llaqtakunapi runakunam hukmanyarunku. Jerusalenpi runakunam kumuykusparaq waqachkan. Paykunapa qaparisqanmi karukamaraq uyarikuchkan.

³ Apukunam sirvientenkuta yakuman kachanku. Ichaqa yarqakunaman rispam mana tarimunkuchu. Paykunaqa vacio puyñuyoqllam kutimunku. Penqakuyllawanñam kutimunku. Penqakuymantam uyankuta tapakurunku.

⁴ Manaña paraptinmi raqrapakurun allpapas. Penqakuymantam umankuta tapakurun tarpuqkunapas.

⁵ Luwichukunapas purunpi wacharuspanmi uñachankunata saqerun. Manaña pasto kaptinmi uñachankunata saqerun.

⁶ Monte asnokunam qala moqokunapi sayachkanku. Atoq hinam wayrallataña muskichkanku. Pastomantam ñawinkupas tutayasqaña kachkanku.

Jeremiaspa mañakusqanmanta

⁷ Dios Taytalláy, mana allinkuna rurasqaykum acusawachkanku. Huchaykuqa chayna kachkaptinpas sutikiraykuyá yanapaykullawayku. Mana kasukusqaykuqa nana-nanaqmi. Contraykipimá huchallikurqaniku.

⁸ Israel castakunapa confiakunan Diosnilláy, desgracia tiempokunapi salvaqnin Diosnilláy ¿imanasqataq kay nacionpiqa forastero hinallaña kachkanki? ¿Imanasqataq tuta samapakuq forastero hinallañaqa kachkanki?

⁹ ¿Imanasqataq muspaypi kaq runa hinaqa kachkanki? ¿Imanasqataq mana vencey atiq soldado hinaqa rikurirunki. Dios Taytalláy, chaywanpas ñoqaykuwanmi kachkanki qamqa. Sutikiwanmi sutichawarqankiku ñoqaykutaqa. Amayá saqerullawaykuchu ñoqaykutaqa.

¹⁰ Tayta Diosmi kay runakunamanta nin: Kay runakunaqa munasqankuman hinallam kawsachkanku. Mana samaykuspam mana allinllaman richkanku. Chayraykum manaña gustoypaqchu qawani paykunata. Kunanmi yuyarisaq mana allinkuna rurasqankumanta. Ñoqaqa castigasaqmi huchallikusqankumanta.

¹¹ Tayta Diosmi niwarqa: —Amañayá kay runakunapa favorninpiqa mañakuwayñachu.

¹² Ayunaspa mañakuwaptinkupas qapariyllawanña mañakuwasqankutaqa manam uyarisaqchu. Kañapuwanankupaq animalkunata chaynataq kawsaykunamanta ofrendakunata qowaptinkupas manañam gustoypaqchu kanqa. Paykunataqa guerrawan, yarqaywan chaynataq peste onqoywanmi tukurusaq —nispa.

¹³ Chaymi ñoqañataq nirqani: —Ay Señor Diosnilláy, qanmanta willakuqkunam runakunata nichkan: “Guerrataqa manam rikunkichikchu. Manam yarqaymantapas kankichikchu. Aswanqa cheqaptapunipas Tayta Diosmi hawka kawsakuyta qosunkichik kay sitiopi” nispa.

¹⁴ Chaymi Tayta Diosñataq niwarqa: —Ñoqamanta willakuqkuna chaynata sutiypi rimaspankuqa llullakuchkankum, paykunataqa manam kacharqanichu, manam kamachirqanichu nitaqmi rimapayarqanipaschu. Paykunaqa willakuchkanku yanqa revelacionkunallamantam, yanqakuna musyasqankumantam chaynataq sonqonkupi yanqa kaqkunallatam.

¹⁵ Chaynaqa ñoqa Tayta Diosmi kaynata nini: Ñoqapuni mana kachachkaptiy sutiypi rimaqkunaqa otaq: “Guerrapas nitaq yarqaypas kay nacionpiqa manam kanqachu” nispa niqkunaqa cheqaptapunipas guerrawan yarqaywanmi wañunqaku.

¹⁶ Chay willakuqkunapa nisqanta uyariqkunapas guerrawan yarqaywanmi wañunqaku warminkunawan chaynataq churinkunawan kuska. Ayankunatam Jerusalen llaqtapa callenkunaman wischunqaku ichaqa manam pipas pampaqninku kanqachu. Chaynatam paykunaman pagasaq mana allinkuna rurasqankumanta.

¹⁷ Paykunamanqa ninkitaqmi: “Mana samaykuspayá weqeykuna sutuchun. Tuta-punchawyá weqeykuna sutuchun. Kuyasqay castaykuna desgraciapi kasqanmantayá sutuchun. Kuyasqay castaykunapa llumpay heridanraykuyá sutuchun.

¹⁸ Chakrakunata rispaymi guerrawan wañuchisqakunata tarini. Llaqta ukuman yaykuspaymi yarqaymanta wañunayaqkunata tarini. Diosmanta willakuqkunam mana reqsisqanku nacionman pasanku. Sacerdotekunam mana reqsisqanku nacionman pasanku.”

Tayta Diosta Jeremias rimapayasqanmanta

¹⁹ Dios Taytalláy, Judá nacionpi runakunataqa ¿pasaypaqtachu qepanchakurunki? Sion Moqopi llaqtataqa ¿tukuy sonqoykiwanchu cheqnipakurunki? ¿Imanasqataq manaña hampiy atinata castigaruwankiku? Hawkalla kaytam suyachkarqaniku ichaqa manam ima allinpas kanchu. Sano kaytam suyachkarqaniku ichaqa mancharisqallam kachkaniku.

²⁰ Dios Taytalláy, reqsikunikum mana allinkuna rurasqaykuta. Reqsikunikum abueloykupa mana allinkuna rurasqankuta. Reqsikunikum huchaykuqa qampa contraykipi kasqanta.

²¹ Runaykikunataqa sutikiraykuyá ama qepanchakuruwaykuchu. Gobiernaspa tiyanayki llaqtataqa amayá yanqamanqa churaruychu. Yuyariyá ñoqaykuwan contrato rurasqaykitaqa. Amayá yanqacharuychu chay rurasqaykitaqa.

²² ¿Huklaw nacionkunapa taytachankuqa parachimunmanchum? ¿Cielokunaqa kikillanmanta paramunmanchum? Yupaychasqayku Dios Taytalláy, qamllam parachimuwaq chaynataqa. Qamllapim confiakuniku ñoqaykuqa. Qamllam ruranki tukuy chaykunataqa.