Jeremías 13 - Quechua Ayacucho Bible 1987

Weqaw tapakunawan rikchanachiymanta

¹ Tayta Diosmi kaynata niwarqa: —Linomanta weqaw tapakunata rantiramuspaykim churakunki ichaqa amam yakuman challpunkichu —nispa.

² Tayta Diospa niwasqanta hinamá weqaw tapakunata rantiramuspay churakururqani.

³ Kaqllamantam Tayta Dios rimapayawaspan niwarqa:

⁴ —Rantiruspa chay churakusqayki weqaw tapakunata apaspayá riy Eufrates Mayukama, chaypiyá qaqapa raqranpi pakaramunki —nispa.

⁵ Rispaymá Eufrates Mayupa hichpanpi pakaramurqani Tayta Diospa kamachiwasqanpi hina.

⁶ Unaymantañam Tayta Dios niwarqa: —Eufrates Mayuman kutispaykiyá pakachimusqay weqaw tapakunata kutichimuy —nispa.

⁷ Eufrates Mayuman chayaruspaymi maymi pakasqaymanta chay weqaw tapakunata horqomurqani ichaqa ismuruspam manaña imapaqpas valesqañachu.

^8-9 Chaymi Tayta Diosñataq rimapayawaspan kaynata niwarqa: —Chay ismusqa weqaw tapakunata hinam Juda nacionniyoq runakunapa hinaspa Jerusalen llaqtayoq runakunapa ancha orgulloso kayninta ismurachisaq.

¹⁰ Kay mana allin runakunaqa palabraykunata mana kasukuspam rumi sonqo kayninkuman hinalla kawsachkanku. Taytacha-mamachakunataña maskaspam qonqoranpa pampaman kumuykunku. Chay ismusqa weqaw tapaku hinam paykunaqa mana imapaqpas valenkuchu.

¹¹ Ñoqa Tayta Diosmi kaynata nini: Runam churakusqan weqaw tapakunta watakun, chaynatam Israel nacionpi llapallan castakunatawan Juda nacionpi llapallan castakunatapas ñoqaman watasqata hina hatallirqani chaynapi runaykunaña kanankupaq, wakin runakunaman ñoqata reqsichiwanankupaq, alabawanankupaq hinaspa sumaq kasqaymanta rimanankupaq. Chaywanpas paykunaqa manam kasuwarqakuchu.

Vino huntayoq urpukunaman rikchanachiymanta

¹² —Paykunamanmi nimunkitaq Israelpa yupaychasqan ñoqa Tayta Diospa kayna nisqayta: “Llapa urpukunam vinowan huntasqa kanqa” nispa. Hinaptinmi paykunañataq nisunki: “¿Ñoqaykuqa manachum sumaqta yachaniku mayqan urpupas vinowan huntasqa kanantaqa?” nispa.

¹³ Chaymi qamñataq ñoqa Tayta Diospa nisqayta kaynata ninki: “Kay nacionpi llapallan *f**yachaqkunatam pasaypaqta sinkarachisaq. Sinkarachisaqmá Rey Davidpa castanmanta gobiernaq reykunata, sacerdotekunata, ñoqamanta willakuqkunata chaynataq Jerusalen llaqtapi llapallan *f**yachaqkunatapas.

¹⁴ Urpukunata takanachichkaq hinam taytantawan churinkunata takanachisaq. Manam harkakusaqchu, manam llakipayasaqchu, paykunata wañuchispayqa manam kuyapayasaqchu.”

Juda nacionpi kaqkunata avisasqanmanta

¹⁵ Uyarispayá atiendeychik Tayta Dios rimaptinqa. Amayá paytukuqllañaqa kaychikchu Tayta Dios rimaptinqa.

¹⁶ Manaraq tutayarachichkaptinyá Tayta Diosta yupaychaychik. Tutayaypa kasqan orqokunapi manaraq mitkaruchkaspayá payta yupaychaychik. Suyasqaykichik achkitam sinchillataña tutayarachinqa. Suyasqaykichik achkitam yana puyumanña tikrarunqa.

¹⁷ Mana kasukuptikichikqa pakasqapim waqasaq. Paytukuq kasqaykichikmantam anchata waqasaq. Tayta Diospa runankuna presochasqa risqankumantam waqasaq. Weqeypas yaku hinaña kallpanankamam aminaykama waqasaq.

Reypaq Tayta Dios willachisqanmanta

¹⁸ Reytawan mamantam ninki: “Humillakuspayá pampapi tiyaychik. Wichirunñam umaykichikta adornaq coronaykichik.”

¹⁹ Neguev llaqtakunam wichqasqaña kachkan. Manaña pipas kichayta atinanpaqmi wichqasqaña kachkan. Juda nacionniyoq lliw runakunatam pusarunku. Pasaypaq presochasqatam pusarunku.

²⁰ Qawariychikyá norte lawta. Qawariychikyá enemigopa hamusqanta. ¿Maytaq qanwan michichisqay ovejakunaqa? ¿Maytaq alabakunayki michichisqay ganadoqa?

²¹ ¡Imaninkiraq kikillaykipa yachachisqayki amistadnikikunawan Tayta Dios gobiernachisuptiki! Wachakuq warmipa nanaynin hinaraqmi qanmanpas nanay hamusunki.

²² Sichu sonqoykipi niwaq: “¿Imanasqataq kaykunaqa sucedewan?” nispa. “¿Imanasqataq kaykunaqa pasawan?” nispa. Mana allinkuna rurasqaykiraykum chaykunaqa pasarusunki. Chayraykum warmita hina qempispa abusasurqanki.

²³ Zambo runa ¿atinmanchu yana kaynin cambiaruyta? Uturungupas ¿atinmanchu muru pelon cambiaruyta? Chaynam huchallaman costumbrasqa kaqkunapas mana atiwaqchikchu allinkuna rurayta.

²⁴ Chayraykum chunniqpi wayrawan cheqerachisqaykichik. Wayrapa apakachasqan qopata hinam cheqerachisqaykichik.

²⁵ Ñoqa Tayta Diosmi nini: Israel castakuna, chaynam tocanciaykichik kanqa. Chaynaqa sucedesunki ñoqata qonqaruwasqaykiraykum. Chaynataq mana valeq taytachakunapi hapipakusqaykichikraykum.

²⁶ Chaynam ñoqapas walikita qempirusaq uyaykikama. Chaynatam rurarusqayki penqayniki qawakunankama.

²⁷ Rikurqanim hukwan-hukwan tupakurusqaykita. Rikurqanim weqeqeqeq yegua hina rurasqaykita. Rikurqanim moqokunapi millakuypaqkuna rurasqaykita. Rikurqanim chakrakunapi millakuypaqkuna rurasqaykita. ¡Ay Jerusalen llaqta, qamqa manam limpiakunkichu! ¿Haykapikamataq mana limpiakunkichu?